1 Más nojta ucꞌampibꞌir tuaꞌ aquetpa imbꞌutz uwirnar inteꞌ motor que matucꞌa ayan tacar,

que tuaꞌ aquetpa ajtumin y que aquetpa uputputir ut y oꞌjron calapir.

2 Pues matucꞌa ucꞌampibꞌir que inteꞌ uturbꞌa ubꞌa tuaꞌ uche lo que merato acano,

y majax imbꞌutz tuaꞌ acay aꞌjni jay merato utajwi tin e bꞌir.

3 Inteꞌ winic axin usati ucuxtar umen que uputputir ut,

y de allí axin ucꞌaye Cawinquirar Dios y che:

“¿Tucꞌa tuaꞌ que ache cocha era tacaren?” che tin e uputputir ut.

4 Tin e ajtumin abꞌoro tin e atzay uwira,

pero tin e matucꞌa ayan tacar axin actana ubꞌajner umen tin e atzay ani eꞌrna umener.

5 Inteꞌ ajchecsuyaj xeꞌ majax erach axin ajajtzꞌa,

y jay amajresian machix tuaꞌ uyubꞌi aꞌjni tut e jatzꞌuar.

6 Meyra gente axin usicbꞌa utacarsiaj inteꞌ ajcꞌotorer xeꞌ wechꞌer ucꞌabꞌ,

y tunor e gente atzay uwira tin e uyajcꞌu e regalo.

7 Tin e matucꞌa ayan tacar machi acꞌajna umen upiarobꞌ,

y tin e atzay ani uwira ubꞌa tacar axin anajtranobꞌ tut ubꞌan.

Y motor que jaxir axin acꞌotoy tutobꞌ tuaꞌ ucꞌajti e tacarsiaj, pero machi aꞌjcꞌuna.

8 Tin e uchꞌami e natanyaj war uyajta ut ubꞌa,

y cꞌani alocꞌoy tunor lo que uche tin e atzay uchꞌami e bꞌijnusiaj xeꞌ intam.

9 Inteꞌ ajchecsuyaj xeꞌ majax erach axin ajajtzꞌa,

y jay amajresian machix tuaꞌ uyubꞌi aꞌjni tut e jatzꞌuar.

10 Machi uwajpi que tin e uputputir ut aturuan bꞌan cocha tin e ajtumin,

y nien machi uwajpi tuaꞌ acꞌotori inteꞌ man tujor e nuquir ajcꞌamparobꞌ.

11 Tin e ayan ubꞌijnusiaj axin uquete ubꞌa tuaꞌ machi aqꞌuijna,

y axin atajttzꞌa tin e machi uturbꞌa ubꞌa tama inteꞌ ojroner conda acꞌayna.

12 Conda aqꞌuijna inteꞌ rey axin abꞌacta e gente bꞌan cocha conda aꞌru inteꞌ león,

pero conda incꞌun uwirnar e rey axin ajiri uyalmobꞌ e gente bꞌan ani cocha conda acꞌaxi e tijuꞌ tor e cꞌopot conda war asacojpa.

13 Inteꞌ maxtac xeꞌ uputputir ut uche unumse ubꞌa utata.

Y inteꞌ ixcarbꞌir xeꞌ aqꞌuecran iraj iraj ucꞌoyres unoxibꞌ

bꞌan ani cocha inteꞌ choro xeꞌ tijremix xeꞌ alocꞌoy e jaꞌ tamar iraj iraj.

14 Inteꞌ tatabꞌir erer uyajcꞌu uyunenobꞌ ingojr otot y tunor lo que ayan tacar conda achamay,

pero jax taca Cawinquirar Dios xeꞌ erer uyajcꞌu inteꞌ ixcarbꞌir xeꞌ ayan ubꞌijnusiaj.

15 E cꞌoyir uche awayan meyra inteꞌ,

pero inteꞌ winic xeꞌ ajcꞌoyir aquetpa tuaꞌ unumse ubꞌa meyra tama e winar, cocha machi cꞌani apatna.

16 Tin e oꞌbꞌian tut lo que arobꞌna tuaꞌ uche umen e Dios axin eꞌixna aturuan,

pero tin e uxejbꞌe ut lo que arobꞌna tuaꞌ uche, machi tuaꞌ eꞌixna aturuan.

17 Tin e utacre tin e matucꞌa ayan tacar,

aquetpa bꞌan ani cocha jay war utacre Cawinquirar Dios.

Y Cawinquirar Dios cꞌani asutpa uyajcꞌu utuanibꞌir.

18 Jatzꞌa amaxtac conda uche e mabꞌambꞌanir conda uyubꞌito acano,

porque jay majax bꞌan ache, e maxtac axin utijres ubꞌobꞌ.

19 Inteꞌ winic xeꞌ axin aqꞌuijna wacchetaca aquetpa tuaꞌ unumse ubꞌa,

y jay iꞌxin atacre tuaꞌ alocꞌoy tamar lo que aquetpa tuaꞌ acꞌaxi tujor, intaca aquetpa tuaꞌ isutpa atacre otronyajr.

20 Ubꞌianen tut uyojroner tin e war ubꞌijreset,

y bꞌan cocha era icꞌotoy iquetpa ajnatanyajet tama tunor acuxtar.

21 Inteꞌ winic erer ubꞌijnu lo que cꞌani uche,

pero tama ucꞌapesnibꞌir tunor era jax Cawinquirar Dios xeꞌ tuaꞌ ubꞌijnu lo que tuaꞌ achempa.

22 Inteꞌ inteꞌ winic uyusre que tin e atzay uwira ubꞌa tacar atacbꞌajri tacar.

Pero más nojta ucꞌampibꞌir tuaꞌ aquetpa que matucꞌa ayan tacar que tuaꞌ amajresian tuatix uchꞌami e tumin.

23 Tin e umanxujres ubꞌa tut Cawinquirar Dios cꞌani eꞌixna aturuan,

y cꞌani ajiri tama e acbꞌar y matucꞌa tuaꞌ unumse ubꞌa.

24 Inteꞌ ajcꞌoyir uchꞌami ucomida,

pero machi cꞌani utꞌabꞌse ucꞌabꞌ tuaꞌ uyari tuyej.

25 Jay ajajtzꞌa tin e asactzene uwira tin e ajnatanyaj, tin e matucꞌa ubꞌijnusiaj axin acano tamar lo que ayan ucꞌampibꞌir.

Pero conda acꞌayna tin e ayan e natanyaj tamar axin ucani más e natanyaj.

26 Tin e uche tzajtzaj utata y tin e uyajnes alocꞌoy utuꞌ tama uyotot

jax inteꞌ subꞌar tuaꞌ y axin eꞌrna que matucꞌa ucꞌampibꞌir.

27 Niunenet, jay awacta tuaꞌ iyubꞌian tut e canseyaj

cꞌani asuti apat tut e canuar xeꞌ acanix.

28 Inteꞌ ajchecsuyaj xeꞌ matucꞌa ucꞌampibꞌir axin asactzene tamar lo que arobꞌna umen e juez xeꞌ erach,

y tut inteꞌ ajmabꞌambꞌanir tuqꞌuic tuqꞌuic mabꞌambꞌanir lo que uche aquetpa bꞌan cocha inteꞌ wiar xeꞌ intzaj.

29 Pues Cadiosir turix tuaꞌ uwatzꞌi tin e ajsactzener,

y uwajpi tuaꞌ ayobꞌorna upat tin e uputputir ut.