1 Tin e uyuchꞌi meyra vino aquetpa inteꞌ ajsactzener,

y tin e uyuchꞌi e vino xeꞌ más inchꞌaj aquetpa inteꞌ ajtzꞌojyir,

y tin e aquetpa cachar tama e uchꞌer ma cocha erer aquetpa e natanyaj tamar.

2 E bꞌajcꞌut lo que ucojco inteꞌ tut inteꞌ rey xeꞌ war aqꞌuijna aquetpa bꞌan cocha e bꞌajcꞌut lo que ucojco inteꞌ tut inteꞌ nuxi león xeꞌ war aꞌru,

y tin tin xeꞌ axin uqꞌuijnes bꞌajcꞌat axin achamesna.

3 Tin e ucojco ubꞌa tuaꞌ machi ucajyes inteꞌ qꞌuecraner taca otronteꞌ axin atajttzꞌa,

pero tin e uputputir ut axin ucꞌaye otronteꞌ wacchetaca.

4 Inteꞌ ajcꞌoyir machi uyustes uchor atiempo conda merato acꞌaxi e jajar,

y tamar era matucꞌa tuaꞌ umorojse conda achecta e hora tuaꞌ e cosecha.

5 E bꞌijnusiaj lo que ayan tama uyalma inteꞌ winic intran tuaꞌ anatanwa y aquetpa bꞌan cocha inteꞌ ut jaꞌ xeꞌ intam xeꞌ intran tuaꞌ aloqꞌuesna e jaꞌ tamar,

pero tin e oꞌbꞌna ubꞌijnu tin e imbꞌutz erer acꞌotoy unata tunor era.

6 Ayan meyra tin e uchecsu ubꞌobꞌ que ma tiaꞌ tuaꞌ acꞌapa ucꞌunersiaj tut inteꞌ,

pero intran tuaꞌ atajwina tin e uche cocha era.

7 Tin e erach axana tama e erachir,

y cꞌani achojbꞌesna umaxtacobꞌ ubꞌan.

8 Conda inteꞌ rey aturuan tor uturtar tuaꞌ ubꞌijnu uwira chi xeꞌ cay uche lo que erach y chi xeꞌ cay uche lo que mabꞌambꞌan,

ma intran tut tuaꞌ acꞌotoy unata tin xeꞌ uche e mabꞌambꞌanir.

9 ¿Chi canic erer oꞌjron cocha era y che: “Nen cay incojco niwalma tuaꞌ aquetpa imbꞌutz inyajrer.

Y ma tiaꞌ cay inche e mabꞌambꞌanir”?

10 Tin e ucꞌampes inteꞌ bꞌijsibꞌ xeꞌ majax erach

axejbꞌna ut umen Cawinquirar Dios.

11 Motor e bꞌiqꞌuit maxtac axin anatanwa jay imbꞌutz o jay majax imbꞌutz

conda eꞌrna lo que uche.

12 Pues unacꞌut inteꞌ jax tuaꞌ eꞌron y uchiquin inteꞌ jax tuaꞌ oꞌbꞌian tamar,

y chatertiobꞌ chembꞌirobꞌ umen Cawinquirar Dios.

13 Tin e atzay awayan acꞌotoy aquetpa que matucꞌa ayan tacar.

Quetpen bꞌixir tuaꞌ ipatna y axin abꞌoro lo que ucꞌani tuaꞌ acꞌuxi.

14 Inteꞌ ajmanuar uyare tin e war achonma y che: “Matucꞌa ucꞌampibꞌir lo que war achoni,” xeꞌ che e ajmanuar.

Pero conda acꞌapa amano, axin tut tin e atzay uwira ubꞌa tacar y acay utattzꞌi ubꞌa que barato mano.

15 Pues motor que ayan meyra oro y meyra bꞌiqꞌuit tunyujy xeꞌ meyra atujri,

pero más nojta ucꞌampibꞌir tin e oꞌjron taca e natanyaj.

16 Uputputir ut tin e aquetpa fiador tuaꞌ inteꞌ ajnajtir gente.

Y tin e uchꞌami e tumin era tawar tuaꞌ aloqꞌuesna ubꞌujc inyajrer jay machi anatanwa tiaꞌ ajlugar.

17 Pues e comida lo que uchꞌami inteꞌ taca e majresiaj aquetpa inchiꞌ tut,

pero tama ucꞌapesnibꞌir tunor era aquetpa bꞌan ani cocha jay jiꞌ war ucꞌuxi.

18 Tunor e bꞌijnusiaj lo que arobꞌna xeꞌ imbꞌutz axin utacre inteꞌ tuaꞌ alocꞌoy tunor lo que war ubꞌijnu uche jay uchꞌami e ojroner era.

Y jay war abꞌijnu acajyes inteꞌ tzojyir taca otronteꞌ chinam, ucꞌani tuaꞌ asicbꞌa chi chi xeꞌ ayan unatanyaj tuaꞌ ubꞌijreset.

19 Tin e oꞌjron upater e inmojr iraj iraj axin uchecsu tunor lo que machi ani tuaꞌ uchecsu,

y tamar era cojcon abꞌa tuaꞌ machi amorojse abꞌa taca inteꞌ cocha era xeꞌ uputputir ut.

20 Pues tin e axin ubꞌaxe utata o utuꞌ,

axin aloqꞌuesna ucuxtar bꞌan ani cocha atajpesna inteꞌ cꞌajc tama e acbꞌar.

21 Tin e axin uchꞌami tunor lo que ayan tuaꞌ utata conda chꞌom maxtacto,

machi tuaꞌ aquetpa inteꞌ chojbꞌesiaj tut tama ucꞌapesnibꞌir tunor era.

22 Ira aware tin e uche e mabꞌambꞌanir apater y che: “Cꞌani intoyet uyeror tamar lo que cay ache nipater.”

Cojcon tama Cawinquirar Dios que jax tuaꞌ uyustes tunor era.

23 Cawinquirar Dios uxejbꞌe ut tin e ucꞌampes inteꞌ bꞌijsibꞌ xeꞌ majax erach,

y machi aquetpa imbꞌutz tut inteꞌ bꞌijsibꞌ xeꞌ amajresian.

24 Cawinquirar Dios unatix tiaꞌ tuaꞌ axana inteꞌ winic.

Entonces ¿tucꞌa tuaꞌ que caxin caturbꞌa cabꞌa tuaꞌ acꞌotoy canata lo que tuaꞌ anumuy?

25 Axin aquetpa intran tut inteꞌ jay uyare e Dios que cꞌani uyajcꞌu lo que ayan tuaꞌ conda merato ubꞌijnu tucꞌa war uche,

porque ucꞌani ani tuaꞌ ubꞌijnu bꞌajxan tama tunor era.

26 Inteꞌ rey xeꞌ ayan e natanyaj tamar

axin utajwi chi xeꞌ war uchiobꞌ e mabꞌambꞌanir y axin uyare tuaꞌ achamesnobꞌ.

27 Lo que ayan tamaron xeꞌ uchecsu ticoit jay imbꞌutz o jay majax imbꞌutz

jax ujanchꞌaquenar Cawinquirar Dios.

28 Inteꞌ rey xeꞌ uchecsu e cꞌunersiaj tut tin e turobꞌ tuyejtzꞌer,

y xeꞌ ma tiaꞌ uyacta tuaꞌ acꞌapa uche tunor lo que uyare,

ma tiaꞌ tuaꞌ aloqꞌuesna tama uturtar conda warto uche cocha era.

29 E tattzꞌarsiaj tuaꞌ e chꞌom maxtacobꞌ jax uqꞌuecꞌosiajobꞌ,

y e tattzꞌarsiaj tuaꞌ e onian gente jax e natanyaj.

30 Conda axin cajajtzꞌa umen que war cache e mabꞌambꞌanir axin utacrion tuaꞌ cawacta cache,

y conda ayan tin e uyopruon tamar lo que war cache, axin utacrion tuaꞌ caquetpa imbꞌutz.