1 Uyalma e rey aquetpa tama ucꞌabꞌ Cawinquirar Dios bꞌan cocha inteꞌ cojn xeꞌ tiaꞌ aꞌjni e jaꞌ,

y ubꞌijres tic taca tiaꞌ ucꞌani jaxir.

2 Inteꞌ winic erer ubꞌijnu que imbꞌutz tunor lo que war uche,

pero jax Cawinquirar Dios xeꞌ uwira jay imbꞌutz o jay majax imbꞌutz lo que war ubꞌijnu uche.

3 Pues más nojta ucꞌampibꞌir tut Cawinquirar Dios que inteꞌ uche lo que imbꞌutz y lo que erach

que tuaꞌ uchamse y uputa incojt arac tut Cawinquirar Dios.

4 Conda inteꞌ ajmabꞌambꞌanir uche ubꞌa que jax taquix xeꞌ unata o conda ubꞌijnu tama uyalma que otronteꞌ cocha jaxir matucꞌa,

jax inteꞌ janchꞌaquenar tama uyalma xeꞌ ubꞌijres tuaꞌ uche tunor lo que uche.

5 Tin e aturuan ubꞌijnu lo que tuaꞌ uche, axin atzꞌacta lo que ayan tacar,

pero tin e machi aturuan ubꞌijnu tamar lo que cꞌani uche axin aquetpa que matucꞌa ayan tacar.

6 E tumin lo que uchꞌami inteꞌ taca e majresiaj

aquetpa bꞌan cocha e tijuꞌ xeꞌ aqꞌuejcha axin umen e icꞌar,

y jax e tumin era xeꞌ tuaꞌ uqꞌueche axin tut e chamer.

7 E tzꞌojyir tuaꞌ tin e ajmabꞌambꞌanirobꞌ asutpa acꞌaxi tama ujorobꞌ,

cocha machi cꞌani uchiobꞌ lo que imbꞌutz.

8 Calapir e bꞌir tiaꞌ axana tin e ajbꞌetuar,

pero imbꞌutz e bꞌir tiaꞌ axana tin e erach.

9 Más ani imbꞌutz tuaꞌ aturuan inteꞌ ubꞌajner tama inteꞌ chuchu otot xeꞌ majax ustabꞌir

que tuaꞌ aturuan taca inteꞌ ixcarbꞌir xeꞌ ajqꞌuecraner tama inteꞌ nuxi otot xeꞌ galan uwirnar.

10 E ajmabꞌambꞌanirobꞌ uyusre uchiobꞌ e mabꞌambꞌanir iraj iraj,

y majax incꞌun uwirnarobꞌ tut upiarobꞌ.

11 Jay ajajtzꞌa inteꞌ ajsactzener, tin e matucꞌa ubꞌijnusiaj acꞌotoy uchꞌami e natanyaj,

y conda acansena tin e ayan e natanyaj tamar axin acano más e natanyaj.

12 Cadiosir xeꞌ erach inyajrer uwira lo que anumuy tama uyotot tin e ajmabꞌambꞌanirobꞌ,

y uche acꞌaxi e jatzꞌuar tujorobꞌ.

13 Tin e umaqui uchiquin tut tin e war ucꞌajti e tacarsiaj,

cꞌani utajwi que mamajchi umen tuaꞌ atacarna conda ucꞌajti e tacarsiaj ubꞌan.

14 Inteꞌ regalo xeꞌ ajcꞌuna mucur uchꞌancabꞌes uqꞌuijnar tin e war aqꞌuijna,

y inteꞌ sijpar xeꞌ ajcꞌuna tzꞌustaca axin usisijres uyalma tin e war oꞌjmay uchꞌichꞌer.

15 Tin e erach axin atzay conda inteꞌ juez ubꞌijnu uwira que erach tin e matucꞌa war uche,

pero tin e abꞌeto axin achincha umen e bꞌajcꞌut conda uyubꞌi lo que aquetpa tuaꞌ acꞌaxi tujor.

16 Tin e axin uyacta e bꞌir tiaꞌ ayan e bꞌijnusiaj xeꞌ intam,

axin acꞌotoy tiaꞌ aquetpobꞌ e chamenobꞌ.

17 Tin e uyusre usati e tumin tuaꞌ utzayres ubꞌa acꞌotoy aquetpa que matucꞌa ayan tacar,

y tin e atzay usati utumin tuaꞌ umani meyra vino y tuaꞌ umani meyra wiar xeꞌ atujri ma tiaꞌ tuaꞌ acꞌotoy aquetpa ajtumin.

18 Pues tin e ajmabꞌambꞌanirobꞌ aquetpa tuaꞌ acꞌaxi tujorobꞌ

bꞌan taca cocha cay uche unumse ubꞌobꞌ tin e matucꞌa war uche.

19 Más ani imbꞌutz que inteꞌ winic aturuan ubꞌajner tama inteꞌ choquem lugar

que tuaꞌ aturuan taca inteꞌ ixcarbꞌir xeꞌ aqꞌuecran iraj iraj.

20 Tama uyotot tin e ayan e natanyaj axin abꞌoro lo que ayan tacar xeꞌ galan,

pero tin e uputputir ut intaca usati tunor lo que ayan tacar.

21 Tin e usicbꞌa tuaꞌ uche lo que erach y tuaꞌ uyajta ut tunor upiarobꞌ iraj iraj

cꞌani uchꞌami e cuxtar xeꞌ eꞌixna y e erachir y e tattzꞌarsiaj.

22 Inteꞌ ajbꞌijresiaj tuaꞌ e ajtzꞌojyirobꞌ xeꞌ ayan e natanyaj tamar axin ucucru inteꞌ chinam tiaꞌ aturuanobꞌ meyra winicobꞌ xeꞌ aqꞌuecꞌuobꞌ,

y axin utijresobꞌ e nuxi petzbꞌir tun lo que war ani ucojcobꞌ tamar tin e aturuanobꞌ tama e chinam.

23 Tin e ucojco uyej tuaꞌ machi oꞌjron lo que mabꞌambꞌan

war ucojco ubꞌa tuaꞌ machi unumse ubꞌa.

24 Tin e ajsactzener uche ubꞌa que jax taca xeꞌ war unata,

y utattzꞌi ubꞌa iraj iraj que más nojta ucꞌampibꞌir que otronteꞌ.

25 Pues tin e ajcꞌoyir axin achamay umen e winar,

cocha acꞌoyi tuaꞌ apatna.

26 Y tin e ajmabꞌambꞌanir war uyusre iraj iraj tuaꞌ ani uchꞌami meyra cosa.

Pero tin e erach atzay tuaꞌ asijpa taca tin e matucꞌa ayan tacar.

27 Cawinquirar Dios uxejbꞌe ut e arac xeꞌ achamesna y apurutna tut umen tin e machi cꞌani uyacta uche e mabꞌambꞌanir,

pero más uxejbꞌe ut tin e war ubꞌijnu tuaꞌ taca ulocse ubꞌa tuaꞌ machi acꞌaxi e jatzꞌuar tujor.

28 Inteꞌ ajchecsuyaj xeꞌ ajmajresiaj axin ajajtzꞌa,

pero inteꞌ ajchecsuyaj xeꞌ erach actana tuaꞌ oꞌjron.

29 Tin e ajmabꞌambꞌanir uche ubꞌa que matucꞌa tuaꞌ unumse ubꞌa,

pero jay tin e imbꞌutz uwirnar acay ubꞌijnu tuaꞌ uche lo que majax imbꞌutz axin ubꞌijnu bꞌajxan que machi ani tuaꞌ uche, cocha unata que jay bꞌan uche que cꞌani unumse ubꞌa.

30 Pues motor que inteꞌ winic ayan unatanyaj y que ayan ubꞌijnusiaj xeꞌ intam, y que obꞌna abꞌijresian,

pero ma cocha erer atacarna umen e Dios jay majax imbꞌutz tut e Dios lo que cꞌani uche.

31 Pues e ajtzꞌojyirobꞌ erer uyustes uchijobꞌ tuaꞌ acꞌampesna tama inteꞌ tzojyir,

pero e tacarsiaj watar tuaꞌ Cawinquirar Dios tuaꞌ oꞌbꞌna ucucruobꞌ tin e war uchiobꞌ e tzojyir tacar.