22
1 Más nojta ucꞌampibꞌir e tattzꞌarsiaj que tuaꞌ aquetpa ajtumin inteꞌ.
Y más imbꞌutz tuaꞌ atajttzꞌa umen e inmojr que tuaꞌ uchꞌami meyra plata o meyra oro.
2 Pues interobꞌ taca tin e ajtuminobꞌ taca tin e matucꞌa ayan tacar,
cocha chatertiobꞌ chembꞌirobꞌ umen Cawinquirar Dios.
3 Pues tin e oꞌbꞌna ubꞌijnu aquetpa chequer tut jay ayan lo que imbꞌacꞌajr uwirnar tiaꞌ war axana, wacchetaca usicbꞌa tiaꞌ tuaꞌ amucuan tuaꞌ ucorpes ubꞌa.
Pero tin e machi oꞌbꞌna ubꞌijnu machi uturbꞌa ubꞌa tamar lo que uwira, y tamar era aquetpa tuaꞌ unumse ubꞌa.
4 Tin e umanxujres ubꞌa y acotuan tuaꞌ uyujtzꞌi ut Cawinquirar Dios taca tunor uyalma axin aquetpa ajtumin,
y cꞌani uchꞌami e tattzꞌarsiaj tuaꞌ e inmojr y cꞌani aturuan meyra año.
5 E bꞌir tiaꞌ axana e ajmabꞌambꞌanirobꞌ bꞌutꞌur taca e sian tꞌix y e sian chꞌen,
pero tin e ucojco ubꞌa aquetpa innajt tut tunor era.
6 Cansen amaxtac tuaꞌ axanobꞌ tama e bꞌir xeꞌ imbꞌutz,
y conda acꞌapa aꞌchꞌiobꞌ ma tiaꞌ tuaꞌ anajtranobꞌ tama e bꞌir era.
7 Tin e ajtumin acꞌotori tujor tin e matucꞌa ayan tacar,
y tin e ucꞌajti e tumin prestado axin aquetpa man tuaꞌ tin e uyajcꞌu e tumin.
8 Tin e upaqꞌui e mabꞌambꞌanir axin uche cosechar meyra mabꞌambꞌanir ubꞌan,
pero e qꞌuijnar lo que uchiobꞌ taca e inmojr cꞌani asajta umen Cawinquirar Dios.
9 Tin e wechꞌer ucꞌabꞌ tut e inmojr cꞌani achojbꞌesna umen e Dios,
porque uwese tin e matucꞌa ayan tacar.
10 Ajnes chic tin e ajsactzener y axin acꞌapa uqꞌuijnar
y uqꞌuecraner y e subꞌar lo que uche tut e inmojr.
11 Tin e uyajta ut lo que erach y xeꞌ incꞌun uyojroner
axin atzay eꞌrna umen e rey.
12 Cawinquirar Dios war ucojco tin e ayan ubꞌijnusiaj xeꞌ intam,
pero axin utijres lo que war ubꞌijnu uchiobꞌ tin e ajmajresiajobꞌ.
13 Inteꞌ ajcꞌoyir oꞌjron cocha era y che: “Patir ayan inteꞌ nuxi león,
y jay inlocꞌoy patir tuaꞌ impatna bꞌajcꞌat uchamsen,” che e ajcꞌoyir era.
14 Uyej inteꞌ ajnajtir ixic aquetpa bꞌan ani cocha inteꞌ nuxi chꞌen xeꞌ intam,
y tin e axin uqꞌuijnes Cawinquirar Dios axin oꞌjri tamar.
15 Pues e putputir aquetpa cachar tama uyalma e maxtacobꞌ,
pero erer anajtijresna tunor era conda axin ajajtzꞌobꞌ.
16 Tin e uche tzajtzaj tin e matucꞌa ayan tacar tuaꞌ ulocse utumin,
y tin e axin uyajcꞌu meyra regalo tin e ajtumin tuaꞌ uchiobꞌ e mabꞌambꞌanir,
axin aquetpa que matucꞌa ayan tacar.
E treinta ojroner tuaꞌ tin e ayan e natanyaj tamar
17 Turbꞌan abꞌa tamar lo que cansenet umen tin e ayan e natanyaj tamar,
y bꞌijnun tuaꞌ iyubꞌian tut lo que cay incanset.
18 Pues bueno tuaꞌ atꞌabꞌse tunor e ojroner era tama awalma,
tuaꞌ aquetpa turix tama awej tuaꞌ uyubꞌi acanse apiarobꞌ.
19 Pues war incanset tunor era tuaꞌ uyubꞌiet icꞌubꞌseyan tama Cawinquirar Dios coner.
20 Pues nen intzꞌijbꞌix treinta ojroner xeꞌ intam xeꞌ ayan e natanyaj tamar
tuaꞌ ubꞌijreset y tuaꞌ ucanset lo que más imbꞌutz.
21 Y bꞌan cocha era icꞌotoy anata lo que erach
tuaꞌ uyubꞌiet achecsu tut tin e uyubꞌiobꞌ tacaret.
1
22 Ira axujchꞌi lo que ayan tuaꞌ tin e matucꞌa ayan tacar umen taca que machi uyubꞌi ucorpes ubꞌobꞌ,
y nien machi tuaꞌ ache unumse ubꞌobꞌ tut inteꞌ juez,
23 porque Cawinquirar Dios jax xeꞌ tuaꞌ ucorpes,
y jax xeꞌ tuaꞌ utoyi uyeror tin e axujchꞌian tuaꞌ tin e matucꞌa ayan tacarobꞌ.
2
24 Machi tuaꞌ ixana taca tin e oꞌjmay uchꞌichꞌer iraj iraj,
y nien machi tuaꞌ ixana taca tin e aqꞌuijna wacchetaca,
25 tuaꞌ machi icano iquetpa bꞌan cocha jaxir,
porque jay bꞌan ache axin acachi abꞌa tacar lo que uche jaxir.
3
26 Machi tuaꞌ iquetpa ajtojmar tamar ubꞌetuar otronteꞌ,
y nien machi tuaꞌ iquetpa fiador tuaꞌ otronteꞌ,
27 cocha jay jaxir machi uyubꞌi utoyi y jay net matucꞌa ayan tacaret tuaꞌ atoyi e bꞌetuar era
axin ulocse este achꞌacteꞌ.
4
28 Ira anumse e tzetze lo que pacbꞌir umen atata viejo ixnix e tiempo
tuaꞌ ani axujchꞌi e rum tuaꞌ apiar.
5
29 ¿Awira ca inteꞌ winic xeꞌ imbꞌutz tunor upatnar?
Acꞌotoy aquetpa ajpatnar tuaꞌ e reyobꞌ cocha jax e ajpatnarobꞌ cocha era xeꞌ acꞌajna umen e reyobꞌ y machi apatna tuaꞌ tin e majax nuquir winicobꞌ.