23
6
1 Conda iyopa tama inteꞌ wiar tuaꞌ inteꞌ nuxi ajcꞌotorer,
chꞌujcun awira tucꞌa uturbꞌa toit tuaꞌ acꞌuxi,
2 y jay itzay iweꞌ meyra
cojcon abꞌa bꞌan ani cocha jay aturbꞌa inteꞌ cuchillo tama anuc.
3 Y ira oꞌsre tuaꞌ acꞌuxi tunor e sian comida xeꞌ más intzaj xeꞌ uturbꞌa toit,
cocha bꞌajcꞌat war ubꞌijnu tuaꞌ umajreset tuaꞌ ache lo que ma ani jax imbꞌutz.
7
4 Ira aturbꞌa abꞌa tuaꞌ ipatna meyra tuatix abꞌoro lo que ayan tacaret,
sino que bꞌijnun tuaꞌ ache lo que más imbꞌutz tuaꞌ machi acꞌoyres abꞌa.
5 Porque axin asatpa e sian tumin era wacchetaca,
bꞌan ani cocha jay achecta ani uwich y achꞌuwan axin bꞌan ani cocha incojt nuxi mut.
8
6 Jay inteꞌ winic xeꞌ lochꞌor ucꞌabꞌ uyaret tuaꞌ iꞌxin iweꞌ tacar,
machi tuaꞌ oꞌsre acꞌuxi meyra e comida xeꞌ más intzaj lo que uturbꞌa tor e mesa,
7 porque war ubꞌijnu tamar taca lo que atujri e wiar lo que uyajqꞌuet.
Y motor que uyaret y che: “Wen y uchꞌen,” pero tama uyalma machi war atzay uyajqꞌuet.
8 Y conda icꞌotoy anata que machi war atzay uyajqꞌuet, axin axeꞌ tunor lo que acꞌuxi,
y tunor e ojroner xeꞌ galan lo que cay aware e winic era matucꞌa ucꞌampibꞌir.
9
9 Machi tuaꞌ iyojron taca tin e uputputir ut,
porque intaca asactzene conda uyubꞌi awojroner xeꞌ ayan e natanyaj tamar.
10
10 Ira anumse e tzetze lo que pacbꞌir umen atata viejo ixnix e tiempo,
y nien machi tuaꞌ achꞌami urum tin e chamen utatobꞌ,
11 porque jaxirobꞌ ayan inteꞌ Uyajcorpesiajobꞌ xeꞌ aqꞌuecꞌo,
xeꞌ tuaꞌ ucorpesobꞌ toit xeꞌ war alocse urumobꞌ.
11
12 Turbꞌan abꞌa tama e canuar,
y pasa achiquin tuaꞌ oybꞌi e canseyaj xeꞌ más imbꞌutz.
12
13 Machi tuaꞌ awacta aware amaxtac que majax imbꞌutz conda uchiobꞌ lo que mabꞌambꞌan,
y jay awatzꞌi taca inteꞌ chuchu ucꞌabꞌ teꞌ machi tuaꞌ achamay.
14 Porque jay awatzꞌi oynen taca inteꞌ chuchu ucꞌabꞌ teꞌ conda uche lo que machi ani tuaꞌ uche,
iꞌxin acorpes ucuxtar tuaꞌ machi axin tiaꞌ aquetpobꞌ e chamenobꞌ.
13
15 Niunenet, jay acꞌotoy aquetpa e natanyaj tama awalma,
nen cꞌani intzay meyra,
16 y cꞌani atzayresna meyra niwalma conda umbꞌi iyojron tamar lo que erach.
14
17 Machi tuaꞌ icꞌuxnaqꞌui awira lo que uchiobꞌ tin e ajmabꞌambꞌanirobꞌ,
sino que manxujres abꞌa tut Cawinquirar Dios iraj iraj.
18 Porque jay bꞌan ache cꞌani itzay tama tunor acuxtar,
y lo que war acojco tuaꞌ achꞌami tuaꞌ e Dios, cꞌani ixto achꞌami.
15
19 Ubꞌin ninuc, niunenet, y turbꞌan abꞌa tama e natanyaj,
y qꞌuecꞌojsen abꞌa tuaꞌ machi awacta e bꞌir xeꞌ erach.
20 Y machi tuaꞌ amorojse abꞌa taca tin e acarayobꞌ,
y nien machi tuaꞌ amorojse abꞌa taca tin e ucꞌuxiobꞌ meyra wiar xeꞌ más intzaj.
21 Porque tin e acarayobꞌ y tin e ucꞌuxiobꞌ meyra wiar xeꞌ más intzaj axin aquetpobꞌ que matucꞌa ayan tacarobꞌ,
y cocha jaxirobꞌ intaca awiobꞌ y awayanobꞌ axin atzucran ubꞌujcobꞌ.
16
22 Turbꞌan abꞌa tamar lo que uyaret atata xeꞌ uchꞌijrset,
y machi tuaꞌ anajpes atuꞌ conda onian ixiquix.
23 Mana e erachir y machi tuaꞌ achoqui.
Sicbꞌan e natanyaj y cojcon abꞌa tuaꞌ taca ache lo que imbꞌutz,
y sicbꞌan tuaꞌ achꞌami e bꞌijnusiaj xeꞌ más intam.
24 E tatabꞌirobꞌ tuaꞌ e maxtac xeꞌ erachobꞌ axin atzayobꞌ meyra,
y tin e ayan umaxtac xeꞌ ayan unatanyaj más axin atzay.
25 Que tzayicobꞌ meyra atata y atuꞌ,
y que tzayic meyra tin e ucuxiet.
17
26 Niunenet, turbꞌan abꞌa tamaren,
y turbꞌan unacꞌoit tama e bꞌir tiaꞌ war inxana tuaꞌ taca ache bꞌan cocha war inche nen.
27 Pues inteꞌ ajmabꞌambꞌan ixic y inteꞌ ajnajtir ixic
aquetpa bꞌan cocha inteꞌ chꞌen xeꞌ intam y xeꞌ intꞌum taca ut xeꞌ erer ani oꞌjri inteꞌ tamar.
28 Y e ixic era aquetpa bꞌan cocha inteꞌ ajxujch xeꞌ ucojco chi chi anumuy tama e bꞌir tuaꞌ uxujchꞌi lo que uqꞌuechiobꞌ,
y war ucojco tuqꞌuic tuqꞌuic winic tuaꞌ awayan tacar.
18
29 Cꞌani inwareox tama tin e war unumse ubꞌa taca e tzꞌintzꞌar,
y tama tin e tzajtaca ut,
y tama tin e war aqꞌuecran.
Y cꞌani inwareox tama tin e war abꞌiriti iraj iraj,
y tama tin e war uche e tzꞌojyir,
y tama tin e war aquetpa chacchac unacꞌut.
30 Jax tin e machi uyacta tuaꞌ uyuchꞌi e vino,
y tin e war uyejta tuqꞌuic tuqꞌuic vino xeꞌ más inchꞌaj.
31 Pero net machi tuaꞌ achꞌujcu awira jay galan e vino o jay ejpray ut tama e chꞌeu,
y nien machi tuaꞌ awejta tuaꞌ anata jay intzaj.
32 Pero tama ucꞌapesnibꞌir tunor era jay iꞌxin oychꞌi meyra vino y conda asacojpa tama otronteꞌ día axin uchiet anumse abꞌa
bꞌan ani cocha jay ucꞌuxiet incojt chan.
33 Conda axin icaray axin anutpa ajor este que iꞌxin awira lo que imbꞌacꞌajr uwirnar,
y este que axin iyojron tamar lo que matucꞌa ucꞌampibꞌir.
34 Y iꞌxin icucrema ichꞌan tut e rum y acay asutucna oit bꞌan ani cocha jay turet tama inteꞌ barco tor e nuxi jaꞌ
y que turet tor e nuxi teꞌ xeꞌ war tujor e barco xeꞌ war asoyrema axin cora cora tor e jaꞌ.
35 Y tamar era iꞌxin aware cocha era: “Yobꞌornen, pero majax inyaj.
Jajtzꞌen taca e teꞌ, pero nien machi innata ubꞌan.
Pero conda imbꞌixcꞌa cꞌani insutpa inxin unchꞌi otronyajr,” xeꞌ iꞌxin aware.