1 Machi tuaꞌ icꞌuxnaqꞌui awira lo que uchiobꞌ tin e ajmabꞌambꞌanirobꞌ,

y nien machi tuaꞌ oꞌsre ixana tacarobꞌ,

2 porque war taca ubꞌijnuobꞌ tuaꞌ atzꞌojyobꞌ,

y iraj iraj oꞌjronobꞌ calapir tuatix utꞌabꞌsiobꞌ e problema tut e inmojr.

3 Pues ingojr otot xeꞌ imbꞌutz achena taca utacarsiaj e natanyaj,

y tin e ayan ubꞌijnusiaj xeꞌ intam axin oꞌbꞌna uqꞌuecꞌojse ufamilia.

4 Y taca meyra bꞌijnusiaj axin ubꞌutꞌi uyotot taca tuqꞌuic tuqꞌuic xeꞌ más galan y xeꞌ atujri meyra.

5 Más nojta ucꞌampibꞌir tin e ayan unatanyaj que tin e ayan meyra ucꞌotorer,

y más nojta ucꞌampibꞌir tin e ayan ucanuar que tin e ayan uqꞌuecꞌojsiaj.

6 Pues ucꞌani meyra bꞌijresiaj xeꞌ imbꞌutz jay abꞌijnu acajyes inteꞌ tzojyir taca otronteꞌ chinam,

y erer alocꞌoy ache taca utacarsiaj e ajbꞌijresiajobꞌ xeꞌ erachobꞌ.

7 Pues tin e uputputir ut machi unata tucꞌa e natanyaj,

y matucꞌa tuaꞌ uchecsu tut e nuquir winicobꞌ conda umorojse ubꞌobꞌ tama uyocher e chinam.

8 Tin e ubꞌijnu tuaꞌ taca uche unumse ubꞌobꞌ e inmojr

axin arobꞌna que jax inteꞌ winic xeꞌ imbꞌacꞌajr uwirnar.

9 Tunor lo que ubꞌijnu uche tin e uputputir ut mabꞌambꞌan inyajrer,

y mamajchi atzay uwira inteꞌ ajsactzener.

10 Jay ijayjayran wacchetaca conda achecta lo que intran toit,

chequer que imbꞌijc taca aqꞌuecꞌojsiaj.

11 Turbꞌan abꞌa tuaꞌ acorpes tin e turix ani tuaꞌ achamesna xeꞌ matucꞌa abꞌeto.

12 Y motor que iꞌxin aware que matucꞌa anata tama tunor era,

pero bꞌijnun que Cadiosir ubꞌisi cawalma tamar lo que cache y que war unata tunor lo que war cabꞌijnu cache.

Y Cadiosir xeꞌ war ucojco cacuxtar war unata que non canata lo que numuy,

y jaxir tuaꞌ utoyi uyeror ut inteꞌ inteꞌ tamar lo que uche.

13 Niunenet, macꞌa uchabꞌir e xux, y conda awejta iꞌxin anata que intzaj y que axin uqꞌuecꞌojset,

y lo que alocꞌoy tama upat axin aquetpa uchir tama awej.

14 Y bꞌan aquetpa e natanyaj ubꞌan tut tin e utajwi,

que aquetpa inchiꞌ tama uyalma,

y que cꞌani alocꞌoy imbꞌutz tunor tama ucuxtar,

y que lo que war ucojco uwira alocꞌoy tama ucuxtar machi tuaꞌ asatpa.

15 Ira amucres abꞌa tuyejtzꞌer uyotot tin e erach tuaꞌ ayopru bꞌan ani cocha uche inteꞌ ajmabꞌambꞌanir,

y nien machi tuaꞌ iyochoy tuyotot tuaꞌ acꞌapa atijres lo que ayan tamar.

16 Pues tin e erach, motor que axin acucrema siete veces, pero asutpa achpa otronyajr.

Pero tin e ajmabꞌambꞌanirobꞌ axin acucurnobꞌ inyajrer umen e satpar lo que axin acꞌaxi tujorobꞌ.

17 Machi tuaꞌ itzay conda awira acucrema tin e war aqꞌuijna uwiret,

y nien machi tuaꞌ inojqꞌuini conda achecta lo que uche unumse ubꞌa inteꞌ cocha era.

18 Porque jay bꞌan ache Cawinquirar Dios machi tuaꞌ atzay uwiret,

y tamar era machi tuaꞌ uche acꞌaxi uqꞌuijnar tujor tin e war aqꞌuijna uwiret.

19 Machi tuaꞌ iqꞌuijna awira lo que war uchiobꞌ tin e ajmabꞌambꞌanirobꞌ,

y nien machi tuaꞌ icꞌuxnaqꞌui awira lo que war uchiobꞌ tin e machi oꞌbꞌianobꞌ.

20 Porque tin e ajmabꞌambꞌanirobꞌ ma tiaꞌ tuaꞌ alocꞌoy imbꞌutz lo que uchiobꞌ tama ucuxtarobꞌ,

sino que axin asatpobꞌ bꞌan cocha atajpa inteꞌ cꞌajc.

21 Niunenet, manxujres abꞌa tut Cawinquirar Dios y tut e rey,

y ira amorojse abꞌa taca tin e machi cꞌani obꞌianobꞌ tut e Dios y nien tut e rey,

22 porque e satpar tuaꞌ Cawinquirar Dios y tuaꞌ e rey axin watar wacchetaca tuaꞌ acꞌaxi tujorobꞌ tin e machi cꞌani obꞌianobꞌ tutobꞌ.

Y ¿chi unata cobꞌa satpar tuaꞌ acꞌaxi tujorobꞌ?

Conda ayan tin e aquetpa tuaꞌ ubꞌijnu uwira jay imbꞌutz o jay mabꞌambꞌan lo que uche inteꞌ conda aquetpa tuchbꞌir,

majax bueno tuaꞌ taca uwira chi era y tamar era uchecsu que matucꞌa war uche.

24 Jay inteꞌ juez axin uyare tin e abꞌeto que matucꞌa war uche,

cꞌani abꞌaxna umen meyra gente,

y cꞌani axejbꞌna ut umen tin e aturuan tama intex chinam.

25 Pero e juez xeꞌ uche acꞌaxi tujor tin e abꞌeto cꞌani atzay eꞌrna umen meyra gente,

y axin abꞌoro meyra chojbꞌesiaj tamar.

26 Tin e axin uyare lo que erach conda oꞌbꞌna tuaꞌ,

aquetpa galan bꞌan cocha inteꞌ tzꞌujtzꞌiaj tama utiꞌ.

27 Conda icꞌotoy tama inteꞌ lugar ucꞌani tuaꞌ ipatna bꞌajxan tama achor,

y nacpat era erer ache oꞌtot.

28 Machi tuaꞌ iquetpa ajchecsuyaj upater apiar jay matucꞌa war uche,

y machi tuaꞌ imajresian taca inteꞌ ojroner upater.

29 Machi tuaꞌ iyojron cocha era y che: “Coner cꞌani inche utoyi lo que uche tacaren,

y bꞌan cocha era axin utoyi uyeror lo que uche nipater.” Pues ma tiaꞌ tuaꞌ iyojron cocha era.

30 Pues ayan inyajr conda numuyen tuyejtzꞌer uchor inteꞌ ajcꞌoyir,

y inwira tiaꞌ pacbꞌir e uva y cay imbꞌijnu que e winic era matucꞌa usasaꞌ,

31 cocha inwira que tic taca tama urum ayan e sian tꞌix y e sian cꞌopot,

y inwira que tijrem tunor e petzbꞌir tun xeꞌ xojybꞌir tama urum.

32 Y cay imbꞌijnu tama niwalma tuaꞌ incano tamar lo que inwira.

Y jax era lo que canuen:

33 Pues conda inteꞌ achꞌan awayan taca e día,

y uyacta ubꞌa tuaꞌ acꞌaxi e waynij tamar,

y umeqꞌue ucꞌabꞌ tuaꞌ achꞌan ajiri,

34 entonces wacchetaca aquetpa que matucꞌa ayan tacar,

y aquetpa bꞌan ani cocha jay achecta inteꞌ ajxujch xeꞌ ochoy ulocse taca e tzꞌojyir lo que ayan tabꞌa.