1 Pues era jax cora ojroner xeꞌ nojta ucꞌampibꞌir xeꞌ tzꞌijbꞌabꞌir umen e Salomón ubꞌan

xeꞌ sutpa tzꞌijbꞌna umen uyajcꞌamparobꞌ e Ezequías xeꞌ rey tama e nuxi chinam Judá.

2 Jax inteꞌ tawarer tuaꞌ e Dios tuaꞌ umucres inteꞌ bꞌijnusiaj tuaꞌ machi aquetpa chequer ticoit,

y jax inteꞌ tattzꞌarsiaj tuaꞌ e rey tuaꞌ uchꞌujcu uwira lo que aquetpa mucur tuaꞌ acꞌotoy unata, y asutpa uchecsu ticoit otronyajr.

3 Pues bꞌan cocha machi uyubꞌi anatanwa cobꞌa uwatar ut e qꞌuin o cobꞌa utamir or e rum,

y bꞌan ubꞌan que machi uyubꞌi anatanwa lo que war anumuy tama uyalma e reyobꞌ.

4 Locsen e sojc tama e plata conda war oꞌjmay * Iranic e nota lo que ayan tama e Proverbios 8:19 tuaꞌ iwira más tama e plata xeꞌ imbꞌutz.

tuaꞌ aquetpa turix tuaꞌ achena e chꞌeu tamar umen tin e unata apatna tamar.

5 Y bꞌan tuaꞌ alocse e ajmabꞌambꞌanirobꞌ ubꞌan tama uyotot e rey,

y bꞌan cocha era axin aqꞌuecꞌo uturtar cocha uyubꞌi uche lo que erach.

6 Ira atattzꞌi abꞌa tut inteꞌ rey,

y nien machi tuaꞌ aware iturbꞌana tujam tin e más nojta ucꞌampibꞌirobꞌ.

7 Más imbꞌutz tuaꞌ acojco ipejcna umen e rey xeꞌ che: “Lar turen taniwejtzꞌer,”

que tuaꞌ isubꞌarna tut tunor e nuquir winicobꞌ umen que iyarobꞌna cocha era: “Loqꞌuen tarex tuaꞌ aquetpa e lugar tuaꞌ otronteꞌ”.

Conda iꞌxin awira taca unacꞌoit lo que war uche otronteꞌ xeꞌ mabꞌambꞌan,

8 ira iꞌxin wacchetaca tut e juez tuaꞌ achecsu tunor era,

porque tama ucꞌapesnibꞌir tunor era bꞌajcꞌat achecta otronteꞌ ajchecsuyaj xeꞌ intiachix uyojroner tut e juez y net tuaꞌ iquetpa subꞌajresbꞌiret.

9 Jay war iyojron taca inteꞌ apiar tamar lo que war aquetpa intran ibꞌijnusiaj, ucꞌani tuaꞌ iyustes ibꞌa nox taca.

Pero machi tuaꞌ achecsu lo que anata tama otronteꞌ,

10 porque bꞌajcꞌat ayan chi xeꞌ uyubꞌi lo que war aware y wacchetaca axin uchecsu tut e inmojr este que acꞌaxi inteꞌ nuxi subꞌar tama ajor,

y tamar era ma tiaꞌ tuaꞌ acꞌapa e mabꞌambꞌan ojroner apater.

11 Pues nojta ucꞌampibꞌir conda arobꞌna inteꞌ ojroner xeꞌ bꞌan cocha uwajpi,

pues aquetpa galan bꞌan cocha cora manzana xeꞌ chembꞌir taca e oro xeꞌ turbꞌabꞌir tama inteꞌ chiquiꞌ xeꞌ chembꞌir taca e plata.

12 Conda inteꞌ winic xeꞌ ayan e natanyaj tamar axin uyare tin e turix tuaꞌ uyubꞌi uyojroner xeꞌ che que ma ani jax bueno lo que war uche,

axin aquetpa imbꞌutz tut tin e uyubꞌi e ojroner era,

bꞌan cocha jay chꞌur inteꞌ tunyujy tama unuc,

o bꞌan cocha jay jurur inteꞌ anillo tama orucꞌabꞌ xeꞌ chembꞌir taca e oro.

13 Pues bꞌan cocha aquetpa galan conda aꞌjni e icꞌar conda war amorojsena e cosecha,

y bꞌan aquetpa galan ubꞌan tin e eꞌbꞌtana axin xeꞌ erach tuaꞌ uqꞌueche axin inteꞌ ojroner,

cocha war anatanwa umen upatron que bꞌan cocha arobꞌna y bꞌan tuaꞌ uchecsu tut tin e tuaꞌ uchꞌami e ojroner.

14 Tin e axin uyare que cꞌani asijpa y matucꞌa uyajcꞌu,

aquetpa bꞌan cocha e tocar xeꞌ achecta taca e icꞌar, pero xeꞌ machi uyacta acꞌaxi e jajar.

15 Pues tin e unata ucojco ubꞌa tuaꞌ machi aqꞌuijna wacchetaca erer uchꞌabꞌu uyalma inteꞌ ajcꞌotorer,

y bꞌan cocha era e ojroner xeꞌ incꞌun erer utacre otronteꞌ tuaꞌ uchꞌami e bꞌijnusiaj.

16 Pues jay atajwi uchabꞌir e xux machi tuaꞌ amaqꞌui meyra,

porque jay bꞌan ache intaca iꞌxin axeꞌ abꞌa.

17 Pues jay iꞌxin tuaꞌ awarajse inteꞌ apiar,

ira iꞌxin iraj iraj tuaꞌ machi acꞌoyran uwiret este que axin uxejbꞌe oit.

18 Tin e acꞌotoy tut inteꞌ juez tuaꞌ uchecsu inteꞌ ojroner xeꞌ majax erach upater upiar,

aquetpa bꞌan cocha tin e uyobꞌi upiar taca inteꞌ martillo o taca inteꞌ corbo o jay ujuriꞌ taca inteꞌ sarac xeꞌ jucbꞌir.

19 Jay tin e war amerecna axin ucojco tuaꞌ atacarna umen tin e uputputir ut,

aquetpa bꞌan cocha tin e aweꞌ conda war acꞌuxun ut ucham,

y aquetpa bꞌan cocha conda axana tin e tzꞌej uyoc.

20 Tin e ucꞌaywijres inteꞌ cꞌay xeꞌ ayan e tzayer tamar tut tin e war atzꞌintzꞌa,

aquetpa intran tut bꞌan cocha tin e ulocse ubꞌojchꞌibꞌ conda ayan e sisar,

o bꞌan cocha conda inteꞌ axin uyari e vinagre tama inteꞌ chec.

21 Jay ayan inteꞌ xeꞌ war uxejbꞌe oit war aꞌytzꞌa, ajcꞌun tucꞌa tuaꞌ ucꞌuxi.

Y jay war ataqui utiꞌ, ajcꞌun uyuchꞌic e jaꞌ.

22 Porque conda ache lo que imbꞌutz tut inteꞌ xeꞌ war uxejbꞌe oit axin asubꞌajres,

y tama tunor lo que ache xeꞌ imbꞌutz Cawinquirar Dios cꞌani utoyet.

23 Pues bꞌan cocha e icꞌar xeꞌ ajicna watar tiaꞌ atobꞌoy watar e qꞌuin utares e jajar,

y bꞌan ubꞌan que tin e uche e ojroner upater otronteꞌ uche aqꞌuijna wacchetaca conda acꞌotoy unata que war achena e ojroner upater.

24 Más ani imbꞌutz tuaꞌ aturuan inteꞌ ubꞌajner tama inteꞌ chuchu otot xeꞌ majax ustabꞌir

que tuaꞌ aturuan tama inteꞌ nuxi otot xeꞌ galan uwirnar taca inteꞌ ixcarbꞌir xeꞌ usicbꞌa e qꞌuecraner iraj iraj.

25 Conda acꞌotesna ticoit inteꞌ ojroner xeꞌ galan tuaꞌ inteꞌ xeꞌ aturuan innajt, axin ujirijse cawalma,

bꞌan cocha conda cajcꞌuna e jaꞌ xeꞌ insis conda ataqui catiꞌ.

26 Jay inteꞌ winic xeꞌ erach axin uyacta ubꞌa tuaꞌ amanxujresna umen tin e ajmabꞌambꞌanir,

aquetpa bꞌan cocha inteꞌ ut jaꞌ xeꞌ xex ut.

27 Majax imbꞌutz tuaꞌ amajcꞌa meyra uchabꞌir e xux,

y majax imbꞌutz tuaꞌ usicbꞌa inteꞌ tuaꞌ atajttzꞌa umen e inmojr.

28 Inteꞌ winic xeꞌ machi oꞌbꞌna ucojco ubꞌa tuaꞌ machi aqꞌuijna wacchetaca ma cocha erer ucorpes ubꞌa,

aquetpa bꞌan cocha inteꞌ chinam xeꞌ tijresbꞌir e petzbꞌir tun tamar xeꞌ ma erer ucorpes ubꞌobꞌ tin e turobꞌ tamar.