1 Machi uwajpi tuaꞌ acꞌaxi e chirjaꞌ xeꞌ insis ut conda fuerte e qꞌuin,

y nien machi uwajpi tuaꞌ acꞌaxi e jajar conda war amorojsena e cosecha,

y bꞌan ubꞌan que machi uwajpi tuaꞌ atajttzꞌa tin e uputputir ut.

2 Bꞌan cocha incojt mut xeꞌ machi utajwi tiaꞌ tuaꞌ apacwan,

y bꞌan ubꞌan que ma cocha erer acꞌaxi inteꞌ bꞌax tujor tin e matucꞌa war uche.

3 Tuaꞌ cache oꞌbꞌian incojt chij ucꞌani tuaꞌ cawatzꞌi taca inteꞌ jarbꞌir qꞌuewer,

y tuaꞌ cache oꞌbꞌian incojt chuchu chij ucꞌani tuaꞌ cacachi uniꞌ,

y bꞌan tuaꞌ cache ubꞌan taca tin e uputputir ut que ucꞌani tuaꞌ cawatzꞌi tuaꞌ cache oꞌbꞌian.

4 Ma erer casutpa caware tin e uputputir ut bꞌan cocha uyareon taca cora ojroner xeꞌ matucꞌa ucꞌampibꞌir,

porque jay bꞌan cache caxin caquetpa bꞌan taca cocha jaxir.

5 Ucꞌani tuaꞌ casutpa caware tin e uputputir ut bꞌan cocha uyareon taca cora ojroner xeꞌ matucꞌa ucꞌampibꞌir,

porque jay majax bꞌan cache jaxir tuaꞌ axin uchebꞌe que nojta ujor.

6 Jay casicbꞌa tin e uputputir ut tuaꞌ cawebꞌta axin tuaꞌ uqꞌueche inteꞌ ojroner tut otronteꞌ,

caquetpa que ma ani tucꞌa cabꞌijnusiaj bꞌan ani cocha jay cachꞌaqui coc,

o jay coychꞌi e veneno.

7 Jay tin e uputputir ut uturbꞌa ubꞌa tuaꞌ uchecsu inteꞌ ojroner xeꞌ nojta ucꞌampibꞌir machi alocꞌoy uche,

bꞌan cocha machi uyubꞌi axana tin e tzꞌej uyoc.

8 Matucꞌa ucꞌampibꞌir tuaꞌ catattzꞌi tin e uputputir ut,

bꞌan ani cocha jay cacachi ingojr chuchu tun tama e honda que ma tiaꞌ atobꞌoy axin.

9 Conda tin e uputputir ut uturbꞌa ubꞌa tuaꞌ uchecsu inteꞌ ojroner xeꞌ nojta ucꞌampibꞌir, mamajchi utacre.

Aquetpa bꞌan cocha conda tzꞌapar inteꞌ tꞌix tama ucꞌabꞌ inteꞌ ajcarer xeꞌ machi uyajchꞌi ubꞌa que ayan e tꞌix tamar.

10 Tin e uyare tin e uputputir ut o tin tin xeꞌ war axana tor bꞌir tuaꞌ apatna tama uchor,

aquetpa bꞌan cocha tin e ucꞌampes uchꞌantꞌin tuaꞌ uꞌri tin tin xeꞌ anumuy.

11 Bꞌan cocha inteꞌ tzꞌi asutpa umaqꞌui uxej,

y bꞌan tin e uputputir ut xeꞌ asutpa uche lo que matucꞌa ucꞌampibꞌir.

12 ¿Awira ca inteꞌ winic xeꞌ war utattzꞌi ubꞌa que más ayan unatanyaj?

Más alocꞌoy lo que uche tin e uputputir ut que e winic era.

13 Inteꞌ ajcꞌoyir oꞌjron cocha era y che: “Bꞌajcꞌat ayan inteꞌ nuxi león patir,

y tamar era ma cocha erer inlocꞌoy tuaꞌ inxin impatna,” che e ajcꞌoyir.

14 Bꞌan cocha inteꞌ puerta asutpa axin y asutpa watar tama ubisagra,

y bꞌan e ajcꞌoyir ubꞌan que yaꞌ taca asutrema tama uchꞌacteꞌ.

15 Inteꞌ ajcꞌoyir uyose ucꞌabꞌ tama uwiar,

pero machi utꞌabꞌse ucꞌabꞌ tuaꞌ uturbꞌa tama uyej.

16 Inteꞌ ajcꞌoyir war ubꞌijnu que nojta ujor,

y tamar era war uchebꞌe que más ayan unatanyaj que siete winicobꞌ xeꞌ unata abꞌijresianobꞌ.

17 Uputputir ut tin e uyose ubꞌa tama inteꞌ tzꞌojyir xeꞌ majax tacar,

y aquetpa bꞌan cocha tin e uchuqui uchiquin incojt tzꞌi xeꞌ war anumuy tama e bꞌir xeꞌ imbꞌacꞌajr.

18 Bꞌan cocha inteꞌ xeꞌ satrem usasaꞌ xeꞌ uꞌri inteꞌ sarac xeꞌ ayan e cꞌajc tamar tuaꞌ ani uchamse inteꞌ,

19 y bꞌan tin e umajres upiar ubꞌan y de allí oꞌjron y che:

“Jax taca inteꞌ aras ojroner,” xeꞌ che inteꞌ.

20 Conda acꞌapa e siꞌ axin atajpa e cꞌajc,

y conda mamajchi war oꞌjron upater otronteꞌ axin asisa tunor e qꞌuecraner.

21 Bꞌan cocha aturbꞌana cora ut acꞌar tama e cꞌajc tuaꞌ ajeray ut,

y bꞌan cocha aturbꞌana más e siꞌ tama e cꞌajc tuaꞌ atzꞌajbꞌa,

y bꞌan ubꞌan inteꞌ ajqꞌuecraner xeꞌ uturbꞌa ubꞌa tuaꞌ utꞌabꞌse más e qꞌuijnar iraj iraj.

22 Pues galan uyubꞌnar inteꞌ ojroner upater otronteꞌ,

y atzay uyacta oꞌchoy macuir uyalma tin e uyubꞌi.

23 Pues bꞌan cocha ingojr bꞌejt xeꞌ chembꞌir taca e tzꞌijc rum xeꞌ ayajra e pintura tama tunor upat tuaꞌ aquetpa galan,

y bꞌan tin e uche ubꞌa que erach tunor uyojroner,

pero macuir uyalma warix ubꞌijnu tucꞌa mabꞌambꞌanir tuaꞌ uche otronyajr.

24 Tin e war aqꞌuijna uwiret uche ubꞌa que incꞌun uwirnar toit,

pero tama uyalma war amajresian.

25 Y motor que galan incꞌun uyojroner toit,

pero ira acꞌubꞌse lo que uyaret,

cocha uyalma bꞌutꞌur taca e sian mabꞌambꞌan bꞌijnusiaj.

26 Y motor que erer umucres uqꞌuijnar taca e majresiaj,

pero tunor lo que war uche cꞌani aquetpa chequer tut e inmojr conda umorojse ubꞌobꞌ tuaꞌ unatobꞌ tucꞌa numuy.

27 Jay inteꞌ winic upajni inteꞌ nuxi chꞌen tuaꞌ oꞌjri otronteꞌ tamar,

jax taca jaxir tuaꞌ oꞌjri tamar.

Y jay inteꞌ winic axin uwarcu ingojr nuxi tun tuaꞌ acꞌaxi tama tin tin xeꞌ anumuy,

tamar taca jaxir tuaꞌ acꞌaxi.

28 Tin e axin amajresian war uxejbꞌe ut tin e war umajres,

y tin e axin amajresian taca e tattzꞌarsiaj war uturbꞌa ubꞌa tuaꞌ usubꞌajres tut e inmojr.