1 Ira atattzꞌi abꞌa tamar lo que cꞌani ache ejcꞌar,

porque machi anata tucꞌa tuaꞌ anumuy ejcꞌar.

2 Actan que otronteꞌ axin utattzꞌiet tamar lo que ache xeꞌ imbꞌutz,

y que tama uyej otronteꞌ tuaꞌ alocꞌoy e tattzꞌarsiaj tamar lo que ache,

y que majax net xeꞌ tuaꞌ achecsu tunor era tut e inmojr.

3 Pues ingojr tun abꞌari meyra y bꞌan e jiꞌ ubꞌan,

pero más imbꞌar conda tin e uputputir ut axin uyopru uyalma otronteꞌ taca inteꞌ ojroner xeꞌ calapir.

4 Pues e qꞌuijnar calapir

y imbꞌacꞌajr tut tin e turu tuyejtzꞌer tin e war oꞌjmay uchꞌichꞌer.

Pero más imbꞌacꞌajr uwirnar tin e acꞌuxnaqꞌui.

5 Más nojta ucꞌampibꞌir tuaꞌ carobꞌna conda ucꞌani tuaꞌ costes cabꞌa,

pero jay tin e turobꞌ ticawejtzꞌer machi uyareon que mabꞌambꞌan lo que war cache, war uchectes ubꞌobꞌ que machi war uyajtobꞌ coit.

6 Jay tin e catzay cawira cabꞌa tacar axin ucꞌayon,

ererto canata que warto atzay uwiron.

Pero jay tin e machi ucꞌanion axin uyajcꞌon inteꞌ tzꞌujtzꞌiaj,

erer canata que intaca war uche ubꞌa tuaꞌ umajreson.

7 Tin e bꞌutꞌur unac machi ixto ucꞌani e chabꞌ.

Pero tut tin e aꞌytzꞌa, motor que inchꞌaj ut lo que ayan, pero atzay ucꞌuxi.

8 Bꞌan cocha incojt mut xeꞌ anajtiri tut usijc,

y bꞌan inteꞌ winic xeꞌ anajtiri tut ufamilia.

9 Uyujtzner e perfume y e ujtzꞌubꞌ axin utzayreson meyra,

pero más utzayreson e bꞌijresiaj xeꞌ imbꞌutz tuaꞌ tin e uyajta coit.

10 Ira asuti apat tut tin e atzay uwiret,

y nien tut tin e atzay uwira ubꞌa taca atata.

Y conda achecta lo que uchiet anumse abꞌa machi tuaꞌ iꞌxin innajt esto tuyotot awermano tuaꞌ itacarna umener,

sino que quiqui tut tin e aturuan tawejtzꞌer tuaꞌ itacarna umener.

11 Niunenet, nen cꞌani intzay meyra jay net aturbꞌa abꞌa tuaꞌ achꞌami e natanyaj,

y bꞌan cocha era innata tucꞌa tuaꞌ inware conda ayan tin e oꞌjron apater.

12 Pues tin e oꞌbꞌna ubꞌijnu aquetpa chequer tut jay ayan lo que imbꞌacꞌajr uwirnar tiaꞌ war axana, y usicbꞌa wacchetaca tiaꞌ tuaꞌ amucuan.

Pero tin e machi oꞌbꞌna ubꞌijnu machi uturbꞌa ubꞌa tamar jay ayan lo que imbꞌacꞌajr uwirnar tor e bꞌir, y tamar era aquetpa tuaꞌ unumse ubꞌa.

13 Uputputir ut tin e aquetpa fiador tuaꞌ inteꞌ ajnajtir gente.

Y tin e uchꞌami e tumin era tawar tuaꞌ aloqꞌuesna ubꞌujc inyajrer jay machi anatanwa tiaꞌ ajlugar.

14 Tin e axin oꞌjron taca inteꞌ nuxi nuc tuaꞌ uchojbꞌes ut upiar conda wartocto asacojpa,

axin anatanwa que jax inteꞌ bꞌax.

15 Inteꞌ ixcarbꞌir xeꞌ aqꞌuecran iraj iraj axin ucꞌoyres uviejo,

bꞌan ani cocha conda coybꞌi ojri imbꞌijc imbꞌijc e jaꞌ tujor e otot conda war acꞌaxi e jajar.

16 Y tin e uturbꞌa ubꞌa tuaꞌ uchꞌancabꞌes inteꞌ ixcarbꞌir cocha era

aquetpa bꞌan cocha tin e cꞌani uquete uwabꞌu e icꞌar,

o aquetpa bꞌan cocha tin e cꞌani uquete e aceite tama ucꞌabꞌ.

17 Bꞌan cocha cacꞌampes inteꞌ taqꞌuin tuaꞌ cajuqꞌui inteꞌ machit xeꞌ chembꞌir taca e taqꞌuin ubꞌan,

y bꞌan inteꞌ winic ubꞌan que erer utacre upiar xeꞌ atzay uwira ubꞌa tacar tuaꞌ ubꞌijnu bꞌan cocha ucꞌani.

18 Pues bꞌan cocha tin e ucojco e teꞌ xeꞌ ucꞌabꞌa higuera erer umaqꞌui uyutir,

y bꞌan tin e ucojco lo que ayan tuaꞌ upatron que axin uchꞌami utuanibꞌir.

19 Bꞌan cocha inteꞌ winic xeꞌ unata cocha turu uwirnar conda uwira ubꞌa tama e jaꞌ,

y bꞌan aquetpa chequer ticoit lo que ayan tama uyalma inteꞌ winic conda cawira lo que uche.

20 Pues bꞌan cocha ma tiaꞌ tuaꞌ atzꞌacta lo que cꞌani uchꞌami e lugar tiaꞌ aquetpobꞌ e chamenobꞌ,

y bꞌan inteꞌ winic que ma tiaꞌ tuaꞌ acꞌoy uyusre uchꞌami tuqꞌuic tuqꞌuic lo que ayan tara tor e rum.

21 Erer canata jay matucꞌa e sojc tama e plata y tama e oro conda cachꞌabꞌu tama ingojr bꞌejt tor e cꞌajc tuaꞌ ajacha* Iranic e nota lo que ayan tama e Proverbios 8:19 tuaꞌ iwira más tama e plata xeꞌ imbꞌutz.,

y bꞌan cocha era aquetpa chequer lo que ayan tama uyalma inteꞌ winic conda cawira lo que uche conda atajttzꞌa tamar lo que uche xeꞌ imbꞌutz.

22 Pues tin e uputputir ut, motor que caxin ani catene tama inteꞌ mortero,

pero ma cocha erer caquete lo que uyusre uche xeꞌ matucꞌa ucꞌampibꞌir.

23 Turbꞌan abꞌa tuaꞌ awira cocha turu tunor e oveja,

y turbꞌan abꞌa tuaꞌ acojco tunor e wacax,

24 porque tunor lo que cachꞌamix machi tuaꞌ eixna,

y nien machi canata jay axin aquetpa tuaꞌ acꞌotori uyunen tin e war acꞌotori era.

25 Pues conda acꞌapa amorojsena tunor e sacate tuaꞌ atꞌabꞌesna tuaꞌ ayan tucꞌa tuaꞌ ucꞌuxiobꞌ e aracꞌobꞌ,

y acay achujchuri otronyajr,

26 jax e hora conda erer asusi utzutzer upat e sian oveja tuaꞌ ache abꞌujc tamar,

y jax e hora conda erer achoni cora chivo tuaꞌ atzꞌacta e tumin tuaꞌ uyubꞌi amani inteꞌ tajo rum.

27 Y tama e chivo lo que quetpato axin alocse meyra uyarar uchuꞌ tuaꞌ oychꞌi,

y tuaꞌ uyuchꞌiobꞌ amaxtacobꞌ,

y axin atzꞌacta ubꞌan tuaꞌ uyuchꞌiobꞌ e ixictac xeꞌ war apatnobꞌ tacaret.