1 Inteꞌ ajmabꞌambꞌanir alocꞌoy aꞌjni motor que mamajchi umen war aꞌjnesna,

pero tin e erach axin aqꞌuecꞌuobꞌ bꞌan cocha inteꞌ nuxi león.

2 Conda ayan meyra mabꞌambꞌanir tama inteꞌ chinam machi tuaꞌ eꞌixna acꞌotori inteꞌ inteꞌ ajcꞌotorer,

pero conda acꞌotori tin e ayan e natanyaj tamar y xeꞌ ayan ubꞌijnusiaj xeꞌ intam axin eꞌixna acꞌotori.

3 Inteꞌ xeꞌ matucꞌa ayan tacar xeꞌ uche unumse ubꞌobꞌ tin e matucꞌa ayan tacar ubꞌan,

aquetpa bꞌan cocha conda acꞌaxi meyra jajar este que acꞌapa utijres tunor e cosecha.

4 Tin e machi oꞌbꞌian tut e ley, axin utattzꞌi tin e ajmabꞌambꞌanirobꞌ,

pero tin e oꞌbꞌian tut e ley axin uquete uwabꞌu tin e war uche e mabꞌambꞌanir.

5 Inteꞌ ajmabꞌambꞌanir machi uyubꞌi ubꞌijnu uwira tin e erach y tin e mabꞌambꞌan,

pero tin e oꞌbꞌian tut Cawinquirar Dios unatobꞌ ixto tin e erach.

6 Nojta ucꞌampibꞌir tuaꞌ aquetpa erach inteꞌ tamar lo que uyare motor que matucꞌa ayan tacar,

que tuaꞌ aquetpa ajtumin xeꞌ majax erach tamar lo que uyare.

7 Inteꞌ maxtac xeꞌ oꞌbꞌian tut e ley axin utzayjres utata.

Pero inteꞌ maxtac xeꞌ umorojse ubꞌa taca tin e uputputir ut axin usubꞌajres utata.

8 Tin e uche abꞌoro utumin umen que ucꞌajti meyra interes,

intaca war utꞌabꞌse e tumin tuaꞌ aquetpa tuaꞌ tin e incꞌun uwirnar tut tin e matucꞌa ayan tacar.

9 Tin e usuti upat tut uley e Moisés,

aquetpa intuj ucꞌajtmayaj tut e Dios.

10 Tin e ubꞌijres tin e erach tuaꞌ uche lo que mabꞌambꞌan, tujor taca tuaꞌ acꞌaxi e mabꞌambꞌanir,

pero tin e erach cꞌani alocꞌoy meyra lo que imbꞌutz tutobꞌ.

11 Tin e ajtumin war ubꞌijnu que ayan unatanyaj,

pero tin e matucꞌa ayan tacar xeꞌ oꞌbꞌna ubꞌijnu tin e imbꞌutz machi tuaꞌ amajresna umen e ajtumin era.

12 Conda tin e erach aquetpa ajcꞌotorer tunor e gente axin atzay,

pero conda tin e ajmabꞌambꞌanir aquetpa ajcꞌotorer, tunor e gente abꞌactobꞌ este que axin amucuanobꞌ.

13 Machi tuaꞌ alocꞌoy lo que uche tin e umucres umabꞌambꞌanirobꞌ,

pero tin e axin uchecsu umabꞌambꞌanir tut e Dios y uyacta tuaꞌ uche, axin utajwi ucꞌunersiaj.

14 Chojbꞌesbꞌir e winic xeꞌ umanxujres ubꞌa tut e Dios iraj iraj,

pero tin e uqꞌuecꞌojse ubꞌa tuaꞌ machi umanxujres ubꞌa tut e Dios aquetpa tuaꞌ unumse ubꞌa tamar lo que intran.

15 Conda tin e ajmabꞌambꞌanir war acꞌotori tujor tin e matucꞌa ayan tacar,

aquetpa imbꞌacꞌajr uwirnar bꞌan cocha inteꞌ nuxi león xeꞌ war aꞌru, o bꞌan cocha inteꞌ nuxi oso conda turix tuaꞌ uchuqui lo que cꞌani ucꞌuxi.

16 Inteꞌ ajcꞌotorer xeꞌ machi oꞌbꞌna ubꞌijnu uche unumse ubꞌobꞌ e gente,

pero inteꞌ ajcꞌotorer xeꞌ machi aquetpa ajtumin umen que machi ulocse meyra impuesto, cꞌani aturuan meyra año tara tor e rum.

17 Inteꞌ ajchamseyaj axin alocꞌoy aꞌjni tic taca este que axin achamay.

Pues que mamajchi umen atacarna tuaꞌ alocꞌoy aꞌjni tut e jatzꞌuar.

18 Tin e uche lo que imbꞌutz iraj iraj cꞌani acojcna umen e Dios,

pero tin e machi uche lo que uyare cꞌani asatpa wacchetaca.

19 Tin e uturbꞌa ubꞌa tuaꞌ apatna tama urum axin atzꞌacta meyra e cosecha lo que tuaꞌ ucꞌuxi,

pero tin e uturbꞌa ubꞌa tamar taca cora proyecto xeꞌ matucꞌa ucꞌampibꞌir aquetpa que matucꞌa ayan tacar.

20 Tin e axin uche tunor lo que uyare que bꞌan tuaꞌ uche axin achojbꞌesna,

pero tin e uturbꞌa ubꞌa tuaꞌ uchꞌami meyra tumin wacchetaca, aquetpa tuaꞌ uchꞌami e jatzꞌuar.

21 Majax bueno tuaꞌ taca uwira chi era conda war cabꞌijnu tuaꞌ catacre inteꞌ o machi,

pero ayan tin e turix tuaꞌ uche e mabꞌambꞌanir tuaꞌ taca uchꞌami incojt paꞌ.

22 Inteꞌ winic xeꞌ lochꞌor ucꞌabꞌ war uyusre tuaꞌ aquetpa ajtumin wacchetaca,

pero machi unata que watar e día conda cꞌani aquetpa que matucꞌa ayan tacar.

23 Tama ucꞌapesnibꞌir tunor era cawira que acꞌajna tin e uyare inteꞌ que majax imbꞌutz lo que war uche,

pero tin e amajresian taca e tattzꞌarsiaj machi acꞌajna.

24 Tin e axin uxujchꞌi lo que ayan tuaꞌ utata y utuꞌ y de allí oꞌjron y che:

“Majax mabꞌambꞌan lo que inche,”

aquetpa intera taca tin e achamsan.

25 Tin e uyusre uchꞌami meyra tumin axin utꞌabꞌse e qꞌuecraner iraj iraj,

pero tin e acꞌubꞌseyan tama Cawinquirar Dios cꞌani alocꞌoy tunor lo que uche.

26 Uputputir ut tin e axin ubꞌijnu que imbꞌutz tunor ubꞌijnusiaj,

pero tin e axana taca e natanyaj axin acorpesna tut lo que imbꞌacꞌajr.

27 Tin e axin utacre tin e matucꞌa ayan tacar cꞌani atacarna tuaꞌ machi acꞌapa lo que ayan tacar,

pero tin e machi cꞌani utacre tin e matucꞌa ayan tacar cꞌani abꞌaxna.

28 Conda tin e ajmabꞌambꞌanir aquetpa ajcꞌotorer, tunor e gente abꞌactobꞌ este que axin amucuanobꞌ,

pero conda machix war acꞌotoriobꞌ, acay acꞌotoriobꞌ tin e erachobꞌ.