1 Tin e uqꞌuecꞌojse ubꞌa tuaꞌ machi uyustes ubꞌa motor que arobꞌna que mabꞌambꞌan lo que war uche,

cꞌani atijresna wacchetaca, y ma cocha erer uyustes ubꞌa.

2 Conda tin e erach aquetpa ajcꞌotorer tunor e gente axin atzay,

pero conda tin e ajmabꞌambꞌanir aquetpa ajcꞌotorer, e gente axin aꞌjcnobꞌ.

3 Inteꞌ maxtac xeꞌ uyajta ut e natanyaj axin utzayjres utatobꞌ,

pero tin e utoyi iraj iraj e ajmabꞌambꞌan ixictac axin acꞌapa utumin.

4 Inteꞌ rey xeꞌ ubꞌijnu uche lo que erach uqꞌuecꞌojse e chinam tiaꞌ war acꞌotori,

pero inteꞌ rey xeꞌ atzay uchꞌami meyra impuesto axin utijres uchinam.

5 Pues tin e umajres upiar taca e tattzꞌarsiaj

war uturbꞌa inteꞌ lazo tut uyoc tuaꞌ uche acucrema.

6 E mabꞌambꞌanir aquetpa bꞌan cocha inteꞌ wajr tut inteꞌ ajmabꞌambꞌan winic xeꞌ axin aquetpa cachar tamar,

pero e winic xeꞌ imbꞌutz uwirnar erer acꞌaywi umen e tzayer.

7 Tin e erach ubꞌijnu tuaꞌ ucorpes tin e matucꞌa ayan tacar conda war unumse ubꞌa tut inteꞌ juez,

pero tin e ajmabꞌambꞌanir matucꞌa ubꞌijnu tamarobꞌ.

8 Tin e ajsactzener uche unumse ubꞌobꞌ tunor tin e turobꞌ tama inteꞌ chinam,

pero tin e ayan e natanyaj tamar axin usisijres uqꞌuijnarobꞌ.

9 Jay tin e ayan e natanyaj tamar uqꞌueche axin tin e uputputir ut tut inteꞌ juez,

tin e uputputir ut era intaca oꞌjron taca inteꞌ nuxi nuc y asactzene y matucꞌa tuaꞌ aquetpa ustabꞌir.

10 Tin e atzay achamsan uxejbꞌe ut tin e uche jax taca lo que imbꞌutz,

pero tin erach uturbꞌa ubꞌobꞌ tuaꞌ utacriobꞌ.

11 Tin e uputputir ut uyacta ubꞌa tuaꞌ aqꞌuijna bꞌan taca cocha ucꞌani,

pero tin e ayan e natanyaj tamar ucojco ubꞌa tuaꞌ machi aqꞌuijna wacchetaca.

12 Jay tin e war acꞌotori uturbꞌa ubꞌa tamar e majresiaj,

tunor uyajcꞌamparobꞌ cꞌani aquetpobꞌ ajmabꞌambꞌanirobꞌ ubꞌan.

13 Pues interobꞌ taca tin e matucꞌa ayan tacar y tin e uche unumse ubꞌobꞌ,

cocha umen Cawinquirar Dios ajcꞌunobꞌ unacꞌutobꞌ inteꞌ intiobꞌ.

14 Conda inteꞌ rey xeꞌ erach uwirnar ubꞌijnu uwira bꞌan cocha ucꞌani tuaꞌ uche taca tin e matucꞌa ayan tacar,

axin eꞌixna acꞌotori.

15 Conda inteꞌ maxtac ajajtzꞌa taca inteꞌ chuchu ucꞌabꞌ teꞌ conda war uche lo que mabꞌambꞌan, axin uchꞌami e natanyaj.

Pero inteꞌ maxtac xeꞌ actana uche bꞌan taca cocha ucꞌani, axin usubꞌajres utuꞌ.

16 Conda tin e ajmabꞌambꞌanirobꞌ war acꞌotoriobꞌ, axin abꞌoro e sian mabꞌambꞌanir.

Pero tin e erachobꞌ axin uwirobꞌ conda axin asatpobꞌ.

17 Jatzꞌa amaxtac conda war uchiobꞌ lo que majax imbꞌutz,

y conda axin acanuobꞌ axin achecta e jiriar tama awalma y axin utzayresetobꞌ.

18 Conda matucꞌa ubꞌijresiaj e Dios, e gente machi uquete ubꞌobꞌ tuaꞌ machi uchiobꞌ e mabꞌambꞌanir.

Pero cꞌani achojbꞌesnobꞌ tunor tin e axin oꞌbꞌianobꞌ tut uley e Dios.

19 Pues inteꞌ man xeꞌ machi cꞌani oꞌbꞌian ma erer oꞌstana tacar taca inteꞌ ojroner,

porque motor que axin uyubꞌi lo que arobꞌna, pero machi axin oꞌbꞌian.

20 ¿Awira ca inteꞌ winic xeꞌ axin oꞌjron wacchetaca conda merato ubꞌijnu tucꞌa tuaꞌ uchecsu?

Pues más uyubꞌi cacojco alocꞌoy imbꞌutz lo que uche inteꞌ xeꞌ uputputir ut que tuaꞌ e winic era.

21 Pues tin e axin uchojres ut meyra inteꞌ uman conda maxtacto,

umener tuaꞌ acꞌapa axujchna tunor lo que ayan tuaꞌ conda axin aꞌchꞌi.

22 Inteꞌ winic xeꞌ machi ucojco ubꞌa tuaꞌ machi aqꞌuijna, axin ucajyes meyra qꞌuecraner,

y axin uche tuqꞌuic tuqꞌuic mabꞌambꞌanir.

23 Inteꞌ winic xeꞌ uche ubꞌa que jax taquix axin amanxujresna,

pero tin e umanxujres ubꞌa axin atajttzꞌa.

24 Tin e aquetpa ajtacarsiaj tuaꞌ inteꞌ ajxujch war uxejbꞌe ut ubꞌa cocha jax taca war uche acꞌaxi e bꞌax tujor,

porque jay ajajbꞌna umen e ley ma cocha erer oꞌjron upater e ajxujch, cocha jay bꞌan uche aquetpa tuaꞌ acꞌaxi tujor ubꞌan.

25 Tin e axin ubꞌacre e inmojr aquetpa bꞌan cocha inteꞌ wajr tut,

pero tin e acꞌubꞌseyan tama Cawinquirar Dios cꞌani acojcna umener.

26 Meyra gente usicbꞌa inteꞌ ajcꞌotorer tuaꞌ atacarna umener conda ayan lo que war unumse ubꞌa,

pero jax taca Cawinquirar Dios xeꞌ unata tin e tawar tuaꞌ atacarna y tin e tawar tuaꞌ ajajtzꞌa.

27 Tin e erach uxejbꞌe ut tin e mabꞌambꞌan uwirnar,

y tin e mabꞌambꞌan uwirnar uxejbꞌe ut tin e erach.