1 Jax era cora ojroner lo que arobꞌna umen inteꞌ winic xeꞌ ucꞌabꞌa Agur xeꞌ unembꞌir tuaꞌ e Jaqué, xeꞌ checsuna tut chateꞌ winicobꞌ xeꞌ ucꞌabꞌobꞌ Itiel y Ucal.

2 “Pues nen jaxen inteꞌ winic xeꞌ matucꞌa nicꞌampibꞌir inyajrer,

y matucꞌa nibꞌijnusiaj xeꞌ intam bꞌan cocha ayan tuaꞌ e inmojr winicobꞌ.

3 “Ma tiaꞌ cꞌotoyen inchꞌami e canseyaj tama e natanyaj,

y nien machi innata meyra tama e Dios xeꞌ erach.

4 “Pero ayan lo que cꞌani umbꞌi tibꞌa: ¿Chi tꞌabꞌay ixin tichan tut e qꞌuin y sutpa tari otronyajr?

Y ¿chi oꞌbꞌna uquete e icꞌar tama ucꞌabꞌ?

Y ¿chi oꞌbꞌna ubꞌasi e nuxi jaꞌ taca inteꞌ nuxi bꞌujc?

Y ¿chi uche ucajyesnibꞌir y ucꞌapesnibꞌir or e rum?

¿Tucꞌa ucꞌabꞌa xeꞌ ixin uche tunor era?

Y ¿tucꞌa ucꞌabꞌa uyunen?

Arenen jay anata, pero jay machi uyubꞌi awaren, ira awaren que anata meyra tama Cadiosir.

5 “Inteꞌ inteꞌ ojroner tuaꞌ e Dios tawar tuaꞌ acꞌubꞌesna.

Y jaxir jax inteꞌ ajcojcsiaj tuaꞌ tunor tin e usicbꞌa ut.

6 “Machi tuaꞌ atzꞌacse nien inteꞌ ojroner tama uyojroner e Dios

tuaꞌ machi icꞌayna umener

y tuaꞌ machi ichectesna que jaxet inteꞌ ajmajresiaj.

7 “Ayan taca chateꞌ cꞌajtmayaj lo que cꞌani inche tacaret, Nidiosiret.

Quisinic que awajqꞌuen tunor era bꞌajxan que inxin inchamay.

8 “Tacrenen que ma tiaꞌ tuaꞌ inxin inmajresian.

Y machi tuaꞌ awacten tuaꞌ inquetpa que matucꞌa ayan tacaren, y nien machi tuaꞌ awacten tuaꞌ inquetpa ajtumin winic.

Ajcꞌunen jax taca lo que aquetpa tuaꞌ incꞌuxi tama inteꞌ inteꞌ día.

9 “Porque jay acꞌotoy inquetpa ajtumin,

bꞌajcꞌat acay imbꞌijnu tuaꞌ insuti nipat toit este que inware cocha era:

‘Matucꞌa ucꞌampibꞌir e Dios taniut’

O jay acꞌotoy inquetpa que matucꞌa ayan tacaren

bꞌajcꞌat inxin inxujchꞌian, y bꞌan cocha era inxin insubꞌajres acꞌabꞌa, Nidiosiret.

10 “Ira iyojron upater inteꞌ man tut upatron,

pues jay bꞌan ache, jaxir axin ubꞌaxet y aquetpa tuaꞌ anumse abꞌa tamar lo que ache.

11 “Ayan cuatro mabꞌambꞌanir lo que uchiobꞌ e gente: Ayan tin e ubꞌaxe utata

y xeꞌ machi ucꞌajti taca e Dios tuaꞌ achojbꞌesna utuꞌ,

12 y ayan tin e war uchebꞌiobꞌ que imbꞌutz turobꞌ,

pero mato jax pocbꞌirobꞌ tama umabꞌambꞌanirobꞌ xeꞌ más calapir.

13 Y ayan tin e war ubꞌijnuobꞌ que otronteꞌ cocha nen matucꞌa conda uwirobꞌ tin e turobꞌ tuyejtzꞌer,

y ubꞌijnuobꞌ que matucꞌa ucꞌampibꞌir e inmojr era.

14 Y ayan tin e uche unumse ubꞌobꞌ e inmojr taca e qꞌuecraner y aquetpa ut uyej bꞌan cocha inteꞌ machit,

y ut ucham aquetpa bꞌan cocha cora cuchillo xeꞌ aqꞌuecꞌo,

y turix tuaꞌ acꞌapa usati tin tin xeꞌ matucꞌa ayan tacar tama tunor or e rum.

15 Ayan inteꞌ nuxi ubꞌiꞌ xeꞌ axana tama e jaꞌ xeꞌ erer atacwan ticawerir tuaꞌ utzꞌu cachꞌichꞌer.

Y ayan tin e uyusre uchꞌami meyra cosa xeꞌ ayan chateꞌ uyej xeꞌ aꞌru taca inteꞌ nuxi nuc y che:

‘Ajcꞌunen, ajcꞌunen lo que incꞌani,’ chenobꞌ.

Pues ayan uxteꞌ lo que ma tiaꞌ atzay tamar lo que ayan tacarobꞌ,

y ayan esto cuatro lo que ma tiaꞌ ubꞌijnu que atzꞌacta lo que ayan tacarobꞌ:

16 jax e mujr,

y inteꞌ ixic xeꞌ machi uyubꞌi achꞌijrtesian,

y e rum xeꞌ warto ucꞌani e jaꞌ iraj iraj,

y e cꞌajc xeꞌ ma tiaꞌ atzꞌacta lo que cꞌani uputa.

17 Inteꞌ maxtac xeꞌ intaca asactzene uwira utata

y xeꞌ ma tiaꞌ oꞌbꞌian tut utuꞌ,

tawar ani tuaꞌ aloqꞌuesna unacꞌut umen inteꞌ nuxi oror,

y tuaꞌ acꞌujxa umen e sian usij.

18 Ayan uxteꞌ lo que ubꞌajcꞌusen inwira,

y ayan este cuatro lo que machi incꞌotoy innata tamar:

19 E tꞌiuꞌ xeꞌ achꞌuwan axin tama e icꞌar,

y e chan xeꞌ anumuy axin tor e tun,

y inteꞌ barco xeꞌ achꞌuwan axin tor e jaꞌ,

y lo que uche inteꞌ chꞌom sitz conda acay uyajta ut inteꞌ ijchꞌoc.

20 Pues lo que uche inteꞌ ajmabꞌambꞌan ixic jax era:

Axin awayan taca inteꞌ winic y de allí usujcu uyej y che:

‘Nen matucꞌa mabꞌambꞌanir war inche,’ xeꞌ che e ixic era.

21 Ayan uxteꞌ lo que uche achincha or e rum,

y ayan esto cuatro lo que machi atzay eꞌrna:

22 Lo que uche inteꞌ man jay acꞌotoy aquetpa rey,

y conda tin e uputputir ut ayan meyra lo que tuaꞌ ucꞌuxi,

23 y conda inteꞌ ixic xeꞌ axejbꞌna ut axin utajwi chi tacar tuaꞌ anujbꞌi,

y lo que uche inteꞌ ajpatnar ixic jay acꞌotoy aquetpa ixcarbꞌir tuaꞌ upatron.

24 Ayan cuatro bꞌiqꞌuit yer animalobꞌ tara tor e rum xeꞌ ayan unatanyajobꞌ:

25 E xinich xeꞌ chuchu taca y xeꞌ machi aqꞌuecꞌo,

pero tama e verano axin umorojse lo que ucꞌani tuaꞌ ucꞌuxiobꞌ conda ayan e jajar,

26 y e ajcꞌopot tꞌur xeꞌ machi aqꞌuecꞌo,

pero xeꞌ uchiobꞌ uyotot tujam e tun tor e witzir,

27 y e sajc xeꞌ matucꞌa urey,

pero xeꞌ axin anumuyobꞌ tzoro tzoro,

28 y e ajpat xeꞌ erer achujca,

pero xeꞌ acꞌotoy axanobꞌ tic taca motor tama uyotot e rey.

29 Ayan uxteꞌ xeꞌ axanobꞌ galan ustabꞌir,

y ayan esto cuatro xeꞌ uche ubꞌobꞌ que jax taquix conda axanobꞌ:

30 inteꞌ nuxi león xeꞌ más aqꞌuecꞌo tama tunor e inmojr animalobꞌ

xeꞌ machi alocꞌoy aꞌjni tut tuqꞌuic tuqꞌuic lo que uwira,

31 y incojt utata acꞌach,

y incojt utata chivo,

y inteꞌ rey conda war axin tut uyajtzꞌojyirobꞌ.

32 Pues jay cay ache abꞌa bꞌan cocha inteꞌ xeꞌ uputputir ut xeꞌ utattzꞌi ubꞌa,

o jay cay abꞌijnu tuaꞌ ache lo que mabꞌambꞌan,

turbꞌan acꞌabꞌ tama awej tuaꞌ machi ache.

33 Porque bꞌan cocha alocꞌoy e mantequilla tama e leche conda ayabꞌarna,

y bꞌan cocha alocꞌoy e chꞌich tama uniꞌ inteꞌ conda ayobꞌorna,

y bꞌan cocha era axin achecta inteꞌ tzꞌojyir jay caxin caqꞌuijnes otronteꞌ.