1 Jax era cora ojroner tuaꞌ e Lemuel xeꞌ jax e rey tuaꞌ e chinam Masá, bꞌan cocha cansena umen utuꞌ.

2 Niwaret xeꞌ cuchuanet nimener,

cꞌani inwaret que cay incꞌajti taca e Dios tuaꞌ icuxpa.

3 Y tamar era Lemuel, ira asati aqꞌuecꞌojsiaj taca e ajmabꞌambꞌan ixictac,

y nien machi tuaꞌ ixana taca e ixictac xeꞌ utijres e reyobꞌ.

4 Y cꞌani inwaret, Lemuel, que inteꞌ rey ma erer uyuchꞌi meyra vino,

y que inteꞌ rey machi tuaꞌ uyusre uyuchꞌi e vino xeꞌ más inchꞌaj.

5 Porque jay inteꞌ rey axin uyuchꞌi meyra vino

bꞌajcꞌat axin unajpes e ley lo que tzꞌijbꞌabꞌir umener,

y axin asatpa lo que erach tut tin e war unumse ubꞌobꞌ.

6 Ajcꞌun tuaꞌ uyuchꞌiobꞌ e cerveza tin e war unumse ubꞌobꞌ

y tin e war achꞌajran uyalmobꞌ.

7 Que uyuchꞌic jaxirobꞌ tuaꞌ axin unajpesobꞌ que matucꞌa ayan tacarobꞌ,

y tuaꞌ anajpa umenerobꞌ lo que war unumse ubꞌobꞌ.

8 Pero net, Lemuel, ojronen tuaꞌ atacre tin e machi uyubꞌi ucorpes ubꞌa,

y sicbꞌan chi chi tuaꞌ utacre tin e machi uyubꞌi ucojco ubꞌobꞌ.

9 Ojronen tut tin e juez tuaꞌ ubꞌijnu uche jax taca lo que erach tut tin e war atujchꞌa,

y ojronen tuaꞌ atacarnobꞌ tin e matucꞌa ayan tacarobꞌ y tin e tzajtaca utobꞌ.

10 Intran tut inteꞌ winic tuaꞌ utajwi inteꞌ uwixcar xeꞌ imbꞌutz y xeꞌ nojta ucꞌampibꞌir,

pues más atujri inteꞌ ixic cocha era que ingojr tunyujy.

11 Y unoxibꞌ atacbꞌajri inyajrer tamar jaxir,

cocha tacar utacarsiaj uwixcar era cꞌani atzꞌacta tunor lo que ucꞌani.

12 Y e ixcarbꞌir era machi uche unumse ubꞌa unoxibꞌ y utacre iraj iraj,

y uche jax taca lo que imbꞌutz tut tama tunor ucuxtar.

13 Y uche e tzꞌojnoc xeꞌ cobꞌiric ut tuaꞌ apatna tacar.

14 Y e ixic era aquetpa bꞌan ani cocha inteꞌ ajchonmar

xeꞌ axana innajt tama inteꞌ barco tuaꞌ umani lo que tuaꞌ ucꞌuxi y tuaꞌ asutpa uchoni.

15 Y incsibꞌanto achpa tuaꞌ uyustes e wiar tuaꞌ awiobꞌ umaxtacobꞌ

y uyare e ijchꞌoctacobꞌ xeꞌ apatnobꞌ tacar lo que aquetpa tuaꞌ uchiobꞌ tama e día era.

16 Y axin usicbꞌa inteꞌ tajo rum xeꞌ más imbꞌutz, y jay utajwi inteꞌ tajo rum bꞌan cocha ucꞌani, umani taca e tumin lo que war uchꞌami tama e chonmar,

y utoyi tuaꞌ apajcꞌa cora uva tamar.

17 Y jaxir machi acꞌoy,

y aqꞌuecꞌo ucꞌabꞌ tuaꞌ apatna.

18 Y war uwira que alocꞌoy imbꞌutz e chonmar lo que war uche,

y machi utajpes ucꞌajc tama e acbꞌar cocha warto apatna.

19 Y apatna taca ucꞌabꞌ tuaꞌ uyustes e tzꞌojnoc

tuaꞌ ujari e bꞌujc tamar.

20 Y wechꞌer ucꞌabꞌ tut tin tzajtaca utobꞌ

y tut tin e matucꞌa ayan tacar.

21 Y conda ayan e sisar machi abꞌacta que axin unumse ubꞌobꞌ umaxtac y unoxibꞌ,

cocha cay ujari e bꞌujc xeꞌ impim ut tuaꞌ ulapiobꞌ.

22 Y ujari e nuquir cobija tuaꞌ ucꞌampesobꞌ tama e acbꞌar,

y jaxir ubꞌujcse ubꞌa taca e bꞌujc xeꞌ más atujri y xeꞌ galan chacbꞌuren ut.

23 Y unoxibꞌ acꞌajna umen e nuquir winicobꞌ tama e chinam,

y umorojse ubꞌa tacarobꞌ tama uyocher e chinam tuaꞌ ubꞌijnuobꞌ cocha tuaꞌ utacriobꞌ e chinam.

24 Pues e ixic era uchuyi e bꞌujc y e cincho

tuaꞌ uchoni taca e ajchonmarobꞌ.

25 Y ayan e qꞌuecꞌojsiaj tama uyalma y acꞌajna umen e inmojr,

y machi amerecna tamar lo que erer anumuy tama e día ejcꞌar.

26 Y oꞌjron taca meyra natanyaj,

y acanseyan taca e cꞌunersiaj.

27 Y war uwira tunor lo que war anumuy tuyotot

y ma tiaꞌ acꞌoyi tuaꞌ uche e patnar.

28 Y war atajttzꞌa umen umaxtac y umen unoxibꞌ

xeꞌ che:

29 “Ayan meyra ixictac xeꞌ imbꞌutz uwirnarobꞌ y xeꞌ nojta ucꞌampibꞌirobꞌ,

pero net más imbꞌutz awirnar que tunor e inmojr era,” xeꞌ chenobꞌ unoxibꞌ y umaxtac.

30 Pues erer camajresna umen inteꞌ ixic xeꞌ galan uwirnar,

cocha machi war canata tucꞌa ayan tama uyalma,

y ugalanir inteꞌ ixic cocha era erer asatpa conda anumuy e tiempo.

Pero inteꞌ ixic xeꞌ umanxujres ubꞌa tut Cawinquirar Dios tawar tuaꞌ atajttzꞌa.

31 Tattzꞌic inteꞌ ixic cocha era tut tunor e gente tama e chinam,

y checsunic tutobꞌ cobꞌa uche xeꞌ nojta ucꞌampibꞌir.