1 Chuvech ri Dios y ri Ajaf Jesucristo*1 Ti. 5:21. ri rubanon chic rubanic richin nunic'oj cánima ri eq'ues y ri ecaminak tok xtuc'ut-ri' chi can Rey vi, nin-ij c'a chave: 2 Tatzijoj ruch'abel ri Dios; ruk'ijul man ruk'ijul, rat tacovij-avi' chubixic. Tacusaj richin yak'ilon pa ruvi' tzij ri xa quiq'uin vinak epetenak-vi, richin nik'alajin chi ri ruch'abel ri Dios, jari' ri kitzij. Cach'aben riq'uin ri man utz ta najin, capaxa'an, pero ekal tac'utu' ri nic'atzin netemex.*1 Ti. 4:13; Tit. 1:13. 3 Roma xtuka na jun k'ij tok ri vinak man chic xticajo' ta xquetijox riq'uin ri ch'abel ri man jun satzoj chupan,*1 Ti. 1:10. xa xtic'at cánima pa ruvi' ri achel nicajo' niquic'axaj, romari' xquequicanola' tijonel richin yetijox pa ruvi' ri man utz ta ri niquirayij. 4 Man xtiquiya' ta chic quixiquin riq'uin ri kitzij,*1 Ti. 1:6. xa riq'uin yan chic tzij nojin-pe coma vinak. 5 Jac'a rat tana' ronojel ri yatajin riq'uin, tacoch'o' xa achique na c'ayef pan ac'aslen, taya' rutzijol ri utzulaj ch'abel richin ri Jesucristo chique ri man quiniman ta, y tz'akat tabana' che ri samaj ri nrojo' ri Dios chave.

6 Roma yin xe chic voyo'en chi nitix nuquiq'uel,*Fil. 2:17. y ri k'ij richin ninya' can ri roch'ulef,*Fil. 1:23. nakaj chic c'o-vi. 7 Nutijon nuk'ij richin nubanon-pe ri nurayij ri Dios, xenq'uisa' yan ri bey yo'on can pa nuvi' chi nink'asaj, y man yin elenak ta chupan ri utzulaj tzij ri nuniman.*Hch. 20:24; 1 Ti. 6:12. 8 Roma c'a ri', yacon-apu*Sal. 31:19. chuve ri utzulaj sipanic*Ap. 2:10. ri xtiyo'ox chique ri xquic'uaj jun chojmilaj c'aslen. Ri Ajaf ri chojmilaj juez xtuya' chuve ri nimalaj rajil-ruq'uexel ri' chupan ri k'ij ri ruyo'on pa ránima chi nuya', y man xe ta chuve yin xtuya-vi, xa ja jun chique conojel ri riq'uin ronojel cánima coyo'en ri k'ij tok xtipe chic jun bey.

9 Timoteo, tabana' favor, tatija' ak'ij quino'atz'eta' cha'anin. 10 Roma ri Demas*Col. 4:14; Flm. 24. xa xiruya' can, roma más xka chuvech ri c'aslen richin ri roch'ulef,*1 Jn. 2:15. y xa xbe pa tinamit Tesalónica. Ri Crescente benak pa roch'ulef Galacia. Y ri Tito benak pa roch'ulef Dalmacia. 11 Xaxe chic ri Lucas c'o can viq'uin. Tok xcape, ta'ij che ri Marcos*Hch. 12:25; 15:37; Col. 4:10. chi tipe chavij, roma rija' nic'atzin chuve richin yiruto' chupan rusamaj ri Dios. 12 Ri Tíquico*Hch. 20:4. xintak-e pa tinamit Efeso. 13 Tok xcape, tac'ama-pe ri nuk'u' ri xinya' can chiracho ri Carpo pa tinamit Troas. Y que'ac'ama-pe ri nu-libros. Ri más yec'atzin chuve, ja ri ebanon riq'uin tz'un.

14 Ri Alejandro ri samajiy-ch'ich', jani na itzel ri erubanon chuve. Ri Ajaf xtuya' c'a ruq'uexel*2 S. 3:39; Sal. 28:4. che riq'uin ri erubanalo'n. 15 Romari', rat tabana' cuenta avi' chuvech, roma rija' jani na xupaba-ri' chuvech ruch'abel ri Dios ri nikatzijoj. 16 Tok xinuc'uax na'ey (mul, paj) chuvech ri gobernador richin ninto-vi', man jun xto'on vichin, conojel xinquiya' can. Man ta c'a xtu'on ri Dios chique chi nicakalej.*Hch. 7:60. 17 Pero ri Ajaf xc'uje' viq'uin y xuya' vuchuk'a', richin quiri' voma yin xbe rutzijol ri utzulaj ruch'abel ri Dios richin xquic'axaj conojel ri man israelitas ta, y can achel pa ruchi' león xirucol-vi.*Sal. 22:21; 109:31; 2 P. 2:9. 18 Yin veteman chi ri Ajaf xquirucol chuvech ronojel ruvech itzel ri xtipe chuvij,*Sal. 121:7. y xquiruchajij richin xquinoc chila' chicaj riq'uin, ri achique lugar ja rija' nibano gobernar. Can ta jumul-jumul xtuc'ul ruk'ij. Amén.

19 Taya' qui-saludo ri Prisca y Aquila,*Hch. 18:2. y conojel ri ec'o pa racho ri Onesíforo.*2 Ti. 1:16. 20 Ri Erasto*Hch. 19:22. xc'uje' can pa tinamit Corinto, y ri Trófimo*Hch. 20:4. xinya' can pa tinamit Mileto roma niyavej. 21 Y rat Timoteo, tabana' favor, tatija' ak'ij yape cha'anin viq'uin*2 Ti. 4:9. na'ey chi nitiquer ru-tiempo ri tef.*Ri achique lugar c'o-vi ri Pablo tok xutz'ibaj ri carta re', ri “invierno” man ruk'ijul ta job, xa ruk'ijul tef. Ri Eubulo, ri Pudente, ri Lino, ri Claudia, y conojel ri más chic ri ec'o vave' niquitak-e a-saludo.

22 Ri Ajaf Jesucristo xtic'uje' ta c'a pan avánima. Y xtic'uje' ta c'a ru-favor ri Dios iviq'uin chi'ivonojel ri rixc'o chiri'. Amén.