Ri carta ri xutz'ibaj ri apóstol San Pablo che ri Filemón
1
Ri Pablo nutak-e ru-saludo ri Filemón
1 Yin Pablo, yin yo'on pa cárcel*Ef. 4:1; 2 Ti. 1:8. roma rubi' ri Jesucristo. Yin y ri Timoteo ri junan kaniman ri Jesucristo riq'uin, nika'an-e ri vuj re' chave rat Filemón ri jani na yatkajo', y junan nika'an rusamaj ri Ajaf aviq'uin. 2 Chave rat, che ri xta Apia ri nikajo' pa rubi' ri Ajaf ri runiman, che ri Arquipo*Col. 4:17. ri junan katijon kak'ij riq'uin pa rusamaj ri Jesucristo, y chique ri quiniman ri Jesucristo ri niquimol-qui' chi'avacho,*Ro. 16:5; 1 Co. 16:19. quire' ri nikarayij pan ivi': 3 Ri favor y ri uxlanen ri nipe riq'uin ri Katata' Dios y ri Ajaf Jesucristo can ta xtic'uje' pan ivánima.
Ri Filemón nuc'ut chi jani na nrojo' ri Ajaf Jesús y cukul ruc'u'x riq'uin
4 Ninya' matiox*Col. 1:3; 1 Ts. 1:2; 2 Ts. 1:3. che ri Dios avoma rat Filemón, y jumul yatinc'uxlaj pa tak nu-oración, 5 roma ninvac'axaj chi rat jumul cukul ac'u'x riq'uin ri Kajaf Jesús y can najo' rija' y conojel ri erichin ri rutinamit ri Dios.*Ef. 1:15; 1 Jn. 3:23. 6 Ninc'utuj che ri Dios chi tok natzijoj ri achok riq'uin cukul-vi ac'u'x, xtic'atzin richin netemex jabel ronojel ri favor ri ic'ulun roma xa jun ibanon riq'uin ri Cristo Jesús.*Fil. 1:9. 7 Roj jani na nkuquicot y can xuna' ruchuk'a' ri kánima riq'uin ri ye'ajo' ri rutinamit ri Dios, roma ri cánima rije', jani na qui' xuna'*2 Co. 7:13; 2 Ti. 1:16. avoma rat ri junan kaniman ri Jesucristo aviq'uin.
Ri Pablo nuc'utuj chi utz tic'ul ruvech ri Onésimo
8 Romari' yin, masque ri Jesucristo rubanon chuve chi c'o nuk'a' richin nin-ij chave ri achique nic'atzin chi na'an, pero man quiri' ta nin-en. 9 Más utz ninc'utuj jun quemelal chave, roma can nikajo-ki' chikavech. Rat aveteman chi yin ja xirijix, y pa ruvi' ri', vacami yin yo'on pa cárcel*Ef. 3:1. roma rubi' ri Jesucristo. 10 Ninc'utuj quemelal chave pa ruvi' ri Onésimo,*Col. 4:9. roma rija' valc'ua'l*1 Co. 4:15; Gá. 4:19. chuvech ri Dios, roma vave' pa cárcel xunimaj-vi ri Jesucristo riq'uin ri xintzijoj che.
11 Rija' pa na'ey, man can ta xaruto' utz, jac'a ri vacami can xtic'atzin ri rusamaj chave rat, achel nic'atzin chuve yin. 12 Y riq'uin ri nintak chic e ri Onésimo aviq'uin, tabana' chi can achel ja yin nac'ul nuvech. 13 Yin xinrayij chi ri Onésimo c'a xc'uje' ta vave' viq'uin pan aq'uexel,*1 Co. 16:17; Fil. 2:30. richin yirilij re pa cárcel ri yinc'o-vi roma nintzijoj ri utzulaj ch'abel ri nu'ij achique ruchojmil yecolotaj ri vinak. 14 Pero man jun achique xinjo' xin-en ri man ta xatinc'ulubej pa ruvi', richin quiri' si na'an favor chi natak chic viq'uin, man ta roma chi manak chic jun bey chavech, xa roma jari' naya' pan avánima*1 Cr. 29:17; Sal. 110:3; 2 Co. 8:12; 9:7; 1 P. 5:2. chi na'an. 15 Riq'uin juba' ri achique roma*Gn. 45:5, 8. xel-e ri Onésimo aviq'uin jun tiempo, jare': chi ri vacami xtitzolij aviq'uin richin jumul. 16 Pero man xe ta chic lok'on asamajinel, vacami más chuvech jun asamajinel, roma rija' jun ri junan kaniman ri Jesucristo riq'uin.*Mt. 23:8; 1 Ti. 6:2. Yin can ninjo' rija', y veteman chi rat más xtajo' que chinuvech yin, man xe ta roma chi asamajinel, xa roma chi jun kabanon pa rubi' ri Ajaf riq'uin.
17 Roma c'a ri', si rat nana' chi kitzij junan kánima aviq'uin, utz tac'ulu' ruvech ri Onésimo, achel can ta ja yin nac'ul nuvech. 18 Pero si rija' c'o man utz ta rubanon can chave, o si c'o ruc'as aviq'uin, taya-ka pa nubi' yin. 19 Yin Pablo riq'uin nuk'a' nintz'ibaj-e chave chi xtintoj ri ruc'as. Pero man tamestaj chi rat, rat achel jun aj-c'as viq'uin roma ri c'ac'ac' ac'aslen xavil riq'uin ri Jesucristo. 20 Rat Filemón ri junan kaniman ri Jesucristo aviq'uin, ninjo' chi na'an ri favor ri ninc'utuj chave pa ruvi' ri Onésimo, roma xa jun kabanon riq'uin ri Ajaf aviq'uin. Pa rubi' ri Ajaf, tabana' che ri vánima*Flm. 7. chi qui' nuna'.
21 Y ri nintz'ibaj-e ri vuj re' chave, cukul nuc'u'x aviq'uin chi rat jun nimey tzij, roma veteman chi man xe ta ri favor ri ninc'utuj chave ri xta'an, xa can xta'an más. 22 Quiri' mismo ninc'utuj favor chave chi tabana-apu rubanic ri lugar ri xquinec'uje-vi tok (xquinapon, xquinebos) iviq'uin, roma yin voyo'en chi ri Dios can quiri' vi xtu'on roma ri i-oraciones.*2 Co. 1:11.
Ri ruq'uisbel tak saludo ri nitak-e che ri Filemón
23 Ri Epafras*Col. 1:7. ri junan roj yo'on pa cárcel riq'uin roma rubi' ri Cristo Jesús, nutak-e a-saludo. 24 Quiri' mismo ri Marcos,*Hch. 12:12. ri Aristarco,*Hch. 19:29. ri Demas*Col. 4:14. y ri Lucas*2 Ti. 4:11. ri junan roj rusamajela' ri Dios quiq'uin, niquitak-e a-saludo.
25 Ri ru-favor ri Kajaf Jesucristo xtic'uje' ta c'a pa tak ivánima chi'ivonojel. Amén.
*1:1 Ef. 4:1; 2 Ti. 1:8.
*1:2 Col. 4:17.
*1:2 Ro. 16:5; 1 Co. 16:19.
*1:4 Col. 1:3; 1 Ts. 1:2; 2 Ts. 1:3.
*1:5 Ef. 1:15; 1 Jn. 3:23.
*1:6 Fil. 1:9.
*1:7 2 Co. 7:13; 2 Ti. 1:16.
*1:9 Ef. 3:1.
*1:10 Col. 4:9.
*1:10 1 Co. 4:15; Gá. 4:19.
*1:13 1 Co. 16:17; Fil. 2:30.
*1:14 1 Cr. 29:17; Sal. 110:3; 2 Co. 8:12; 9:7; 1 P. 5:2.
*1:15 Gn. 45:5, 8.
*1:16 Mt. 23:8; 1 Ti. 6:2.
*1:20 Flm. 7.
*1:22 2 Co. 1:11.
*1:23 Col. 1:7.
*1:24 Hch. 12:12.
*1:24 Hch. 19:29.
*1:24 Col. 4:14.
*1:24 2 Ti. 4:11.