GT:cak:Kaqchikel Romanos 3

1 Si ja achel ri xka'ij-ka, quiri' rubeyal, ¿achique más kabanon roj israelitas chiquivech ri man israelitas ta? Y, ¿achique utz nuq'uen-pe chi banon ri circuncisión chike? 2 Yin nin-ij chi c'o q'uiy utz nuq'uen-pe chike. Ri na'ey, ja chi pa kak'a' roj israelitas yo'on-vi can ri ruch'abel ri Dios. 3 Y masque ec'o israelitas man xquinimaj ta* ri Dios, pero man roma ta ri' man ta xtu'on ri ru'in can.* 4 ¡Man quiri' ta! Masque roj vinak konojel roj tz'ucuy tzij, pero ri ni'in ri kitzij, xaxe ri Dios. Achel ri tz'iban can chupan ruch'abel ri nu'ij:

Xtik'alajin ta c'a chi can kitzij vi ri ach'abel, rat Ajaf,

Y si ec'o xque'in chi man pa ruchojmil ta xa'an viq'uin pa ruvi' ri numac, xtik'alajin ta c'a chi man xasatz ta chi xaya' castigo pa nuvi'.*

Quiri' nu'ij chupan ri tz'iban can.

5 Pero si ja ri man choj ta ri yekabanala' nibano chi más nik'alajin-pe chi ri Dios can choj vi nu'on ronojel, ¿achique nika'ij tok ri Dios nuya' castigo pa kavi'? Nin-ij na c'a chive achique niqui'ij ri vinak aj-roch'ulef. Rije' quire' niqui'ij: Ri Dios man choj ta nu'on kiq'uin chi nuya' castigo pa kavi', yecha'. 6 Pero manak che'el chi ri Dios man ta choj. Roma si man ta choj, ¿achel xtunic'oj cánima ri vinak choch'ulef?* 7 Pero riq'uin juba' c'o jun nu'ij: Si roma ri tz'ucun tzij ri nin-en yin, romari' nik'alajin chi kitzij ronojel ri nu'ij ri Dios, y romari' más niyo'ox ruk'ij; si quiri', man utz ta nu'on chi rija' nuya' castigo pa nuvi' roma ri mac ri'. 8 Pero xa ta kitzij achel nu'ij ri jun ri', roj c'o ta che'el nika'ij chi tikabana' mac, richin quiri' nik'alajin-pe ri utz, achel ri k'eban tzij ri ni'an chikij roj chi jari' nikac'ut. Pero ri quiri' ye'in, can utz vi chi nika castigo pa quivi'.*

Man jun vinak choj ruc'aslen

9 Y, ¿achique nika'ij vacami? ¿Ri Dios, más cami utz nkurutz'et roj israelitas que chiquivech ri man israelitas ta? Man quiri' ta. Achel ri xka'ij yan ka, chi israelitas y man israelitas ta, konojel rojc'o chuxe' ruchuk'a' ri mac.* 10 Achel nu'ij ruch'abel ri Dios ri tz'iban can:

Man jun vinak choj ruc'aslen. Can man jun.*

11 Man jun reteman achique ri utz

Y man jun nicanon ri Dios.

12 Conojel xe'el-e chupan rubey ri Dios, man jun chic ric'a'tz xu'on-ka ri quic'aslen.

Man jun nibano ri utz. Can man jun.

13 Achel itzel ruxla'* quijul anima'i' jakal, quiri' ri ch'abel ntel pa quichi'.

Satzoj no'oj c'o chutza'n cak',

Y ri ch'abel ntel pa quichi', achel ru-ponzoña jun cumatz.

14 Ruyon yok'onic tak tzij yech'o;* q'uey-q'uey ri ch'abel ntel pa quichi'.

15 Man tiquic'axaj jun ch'uti tzij, ja nequibana' camic.*

16 Xa achique na lugar yek'ax-vi, ronojel niquiq'uis can ruk'ij y xe k'axomal niquiya' can.

17 Man juba' queteman niquic'uaj-qui' chuvi' uxlanen quiq'uin ch'aka' chic.

18 Man juba' niquixi'ij-qui' chuvech ri Dios.*

Quiri' nu'ij ri tz'iban can.

19 Y roj keteman chi ronojel ri tz'iban can chupan ri ley ri xyo'ox che ri Moisés, chique ri ec'o chuxe' ri ley ri' nich'o-vi. Riq'uin ri', y riq'uin ri ka'in chic, nikatz'et chi nis-ta jun vinak c'o che'el nu'ij chi manak rumac, y chi conojel nuc'ul chi c'o castigo nuk'at ri Dios pa quivi' tok xtunic'oj ri cánima. 20 Roma masque jun vinak rubanon ri nu'ij chupan ri ley, pero man roma ta ri' man jun rumac nrakalej chuvech ri Dios. Ri ley xaxe nuc'ut chikavech chi can roj aj-mac vi.*

Ri nuya' ránima riq'uin ri Jesucristo, man jun mac nrakalej chuvech ri Dios

21 Jac'a ri vacami, ri Dios ruk'alajrisan chikavech ri achel chi roj man jun chic kamac nikakalej chuvech, masque man kaniman ta ri nu'ij chupan ri ley ri xyo'ox che ri Moisés. Y ri c'ac'ac' ruchojmil re' ruc'uan-ri' riq'uin ri tz'iban can chupan ri ley y riq'uin ri tz'iban can coma ri profetas.* 22 Ri Dios nuc'ut chikavech chi xa achique na ri nuya' ránima riq'uin ri Jesucristo, man jun rumac nrakalej.* Roma chuvech ri Dios konojel xa roj junan,* 23 roma konojel xka'an mac, y naj rojc'o-vi che ri c'aslen c'o ruk'ij ri nusuj ri Dios. 24 Xaxe roma ru-favor* ri Dios tok man jun kamac nikakalej chuvech, y re' xa nusipaj chike, roma ri Jesucristo xojrulok' chic richin xojrelesaj pa ruk'a' ri ximiyon kichin. 25 Y ri Dios ja ri Jesucristo xuya' richin xrakalej* ri kamac konojel ri cukul kac'u'x chi riq'uin ri xbin ri ruquiq'uel ri Jesucristo, nkucolotaj chuvech ri mac. Quiri' xu'on ri Dios richin nuk'alajrisaj chikavech chi choj ri xu'on chi man xuya' yan ta rajil-ruq'uexel quimac ri vinak ojer can, tok jani na xerucoch'. 26 Roma nrojo' nuk'alajrisaj chi ja jun ri tiempo re' choj nu'on, y chi rija' can choj riq'uin ri najin tok nu'on chi man jun mac nrakalej xa achique na ri nuya' ránima riq'uin ri Jesucristo.

27 Y roma ri quiri', ¿utz cami chi roj israelitas nikaya-ka kak'ij?* Man utz ta. Roj xaxe riq'uin nikaya' kánima riq'uin ri Jesucristo ni'an chike chi man jun kamac nikakalej chuvech ri Dios, y man nikach'ec ta riq'uin ri yekabanala'. 28 Chiri' c'a nik'alajin-vi chi ri nuya' ránima riq'uin ri Jesús, jari' ri man jun rumac* nrakalej chuvech ri Dios, rubanon o man rubanon ta ri nu'ij ri ley ri xuya' ri Dios. 29 Y manak che'el nika'ij chi ri Dios xaxe kichin roj israelitas. Rija' qui-Dios mismo ri man israelitas ta. 30 Ri Dios xa jun, y ja rija' nibano chique conojel chi manak quimac nicakalej chuvech tok niquiya' cánima riq'uin ri Jesucristo, chi israelitas y man israelitas ta.* 31 Pero si roj kayo'on kánima riq'uin ri Jesús, man nu'ij ta tzij chi man jun rakale'n nika'an che ri ley ri xyo'ox che ri Moisés. Man quiri' ta. Roma roj ri kayo'on kánima riq'uin ri Jesús can nika'an che ri ley chi c'o rakale'n.*

*3:3 He. 4:2.

*3:3 Nm. 23:19.

*3:4 Sal. 51:4.

*3:6 Gn. 18:25; Sal. 9:8.

*3:8 Ro. 5:20; 6:1, 15.

*3:9 Ro. 3:23.

*3:10 Sal. 14:1-3; 53:1-3.

*3:13 Sal. 5:9; Mt. 23:27.

*3:14 Sal. 10:7.

*3:15 Pr. 1:16; Is. 59:7.

*3:18 Sal. 36:1.

*3:20 Ro. 7:7.

*3:21 Ro. 1:2.

*3:22 Ro. 10:4.

*3:22 Col. 3:11; Gá. 3:28.

*3:24 Ef. 2:8.

*3:25 1 Jn. 2:2; 4:10.

*3:27 1 Co. 1:29.

*3:28 Gá. 2:16.

*3:30 Ro. 10:12.

*3:31 Mt. 5:17.