1 Y yen xintz'at chic jun ángel, re c'o poder pa ruk'a' y nika-pa chila' chicaj, y can pison rij roma jun nube, y c'o jun arco iris✡Ez 1.28. pa rue'. Xintz'at chuka' che re ángel re' can ancha'l nitzu'un re k'ij.✡Mt 17.2. Y re rakan ancha'l rurep-k'ak'.✡Ap 1.15, 16. 2 Y ruc'uan jun ch'et libro co'ol-oc, y re ch'et libro re' jakal. C'are' xuya' jun rakan pa rue' re mar, y re jun chic xuya' pa rue' re ruch'ulef. Jac'a re rakan re c'o pa rajquik'a' re xuya' pa rue' re mar y re rakan re c'o pa ruxocon xuya' pa rue' re ruch'ulef. 3 Re ángel✡Ap 15.1, 7. re', jun pa ruchi' xch'o, can ancha'l tak nisiq'uin jun león. Y tak xch'o-yan-ka, jec'o vuku' ancha'l tempestades✡Ap 8.5; 14.2. re xquibam-pa contestar. 4 Y tak re vuku' ancha'l tempestades re' quibanon chic-pa contestar, y yen can ja-yan ninjo' nintz'ibaj-ka re xquibij. Pero chila' chicaj c'o jun ch'abal re xinc'axaj, y xubij-pa chua: Xaxe aviq'uin rat✡Dt 29.29; Is 8.16; 29.11; Dn 8.26; 12.4. tic'ue-va-ka re xquibij re vuku' ancha'l tempestades, y man c'a tatz'ibaj.

5 Y re ángel re ruyi'on jun rakan pa rue' re mar y jun rakan pa rue' re ruch'ulef, xintz'at che xutzekej✡Dn 12.7. re rajquik'a' chicaj, 6 y xubij: Yen nimban jurar chach re Dios re c'o nojel tiempo,✡Jer 10.10; Dn 12.7; Ap 1.18; 4.9. re xbano re rocaj y re jec'o chupan, re xbano re ruch'ulef y re jec'o chach, re xbano re mar y re jec'o chupan, can chach reja' nimban-va jurar che man chic xtak'ax-ta más tiempo. 7 Roma xa can ja tak xtuxipuj re ru-trompeta re ruvuk✡Ap 11.15. ángel, can jare' tak jabal xtik'alajin re c'o pan eval riq'uin re Dios, re xubij chique re rusamajela' re xe'bin re andex xque'banataj.

8 Y re ch'abal re xinc'axaj-yan chila' chicaj, xch'o chic-pa jun bey chua y xubij-pa: Cabiyin y ta'c'ama-pa re ch'et libro jakal pa ruk'a' la jun ángel la ruyi'on jun rakan pa rue' re mar, y la jun chic ruyi'on pa rue' la ruch'ulef, xcha' chua.

9 Y can ximba-apo riq'uin re ángel, y xinc'utuj re ch'et libro cha. Y re ángel re' xubij chua: Ja libro re'. Tatija'.✡Ez 2.8; 3.1. Y re pan achi' can xtana' che ancha'l ruqui'il cab.✡Sal 19.10; 104.34; Jer 15.16. Pero tak xtika-ka cha'pan camas c'ay xtuban, xcha' chua.

10 Y yen can xinc'am-va-apo re ch'et libro pa ruk'a' re ángel, y xintaj-ka. Y re pa nuchi' can xina-va che can ancha'l ruqui'il re cab,✡Ez 3.3. pero re chinupan can c'ay xuban. 11 Y re ángel re' xubij chua, che can tabij chic jun bey re nubij re Dios chiquij re tenemit, chiquij re naciones, chiquij re reyes y chiquij re vinak re man junan-ta quich'abal, xincho'x.