3
Ana e niimihi wo Padué bwolihi
1-2 3.1 Filipi 1.7,13 3.2 Kolosé 1.25[Wo Padué, ke e pwo me céiu genye: wogeme lépwo *Juif, me wogewé na time geé uce Juif.] Ke é mu ko anaa kuti, na woéo, Paulo, ke é pipwoeabwé te Kériso Iésu, he é penem me dewé. Ke é jenaa ni, ke é mu he karépu mu ko a penem naa. Kona time geé uce temehi anaa? Be e ne tong a penem naa wo Padué ne ha a wâé ten, beme e pacuwohi ana e niimihi.
3 3.3 Éféso 1.9−10; Kolosé 1.26Time e uce pii beetihi *a bwo niimihinaado ten naa, na e ha aduwo [mu ha atabuhi kon]. Kehe icehi ana é jenaa ni, ke e habwii tong, ke é bwo ko tabuhi pii tewé ne ha a tii ce. 4 Ke, me geé pine, ke geé o temehi ana é temehi, woéo, ne ko a bwo niimihinaado ten naa, na e pacuwohi ne ko Kériso.
5 Ânebun, ke te tice apulie celi lé temehi ehi anaa. Kehe icehi ana wo Padué, ke e caa pwo me lé temehi ne ni *apostolo me ni péroféta ko a *Jenen Iitihi ten. Be woélé ni apulie ten na e caa pipégalilé* 3.5 Ni apulie ten na e caa pipégalilé—Grek: Na lé iitihi..
6 3.6 Éféso 2.13,16−19Weengi a bwo niimihi nen den: Heme lé mu ko Kériso Iésu wo lépwona time uce lépwo Juif, ke lé caa te â pwohewii lépwo Juif, be caa â céiu a bele† 3.6 Céiu a bele—Grek: Céiu a éé apulie.. Ke lé tai hegi ni wâé me a *adéihi te Padué. Ke a piapwo te Padué, ke te a delé ati. Weengaa kuti a Pwooti Wâé!‡ 3.6 Weengaa kuti a Pwooti Wâé—ai Ko a Pwooti Wâé.
Pahede Paulo beme e pipatemehi
7-8 3.7 Kolosé 1.25 3.8 1 Korénit 15.9−10Woéo, ke te piticenaado ne kong koja ati ni apulie te Padué. Kehe icehi ana e te junihe pwopweehi ne kong ha a *pipwoééhe tice ja kon den, ke e pipégaliéo beme é eabwé ten. Ke e penem kong ko a junuun, beme é pipatemehi a Pwooti Wâé ten ne te lépwona time uce lépwo Juif. Ke é pii telé ati ni adéihi ten na e daaité, ke piwéden, na e [ne tenye, na nye] mu he Kériso.
9 E pahedeéo ngen, beme é habwii te ati ni apulie ni bwopwonen den, me e pacuwohi a bwo niimihinaado ten na e ha aduwo mu ha atabuhi kon, he li e tabuhi ati ni naado. 10 Ke [habwii mwo] te ati ni pihuô, me ni pwojunuun he miiden [me a bwohemwo] pie, te junihe ubwo a bwo temehinaado ten, weeng Padué, na ati he ni naado. Be lé o alihi [a bwo céiu lépwo Juif me ni béén, ne ha a puapulie ten], a Mwaiitihi§ 3.10 Be lé o alihi…a Mwaiitihi—ai Lé o bo temehi anaa, é mu ko a bwo patemehi na a Pwooti Wâé te a Mwaiitihi. Grek: …É mu ko a Mwaiitihi..
11 Ati ninaa, ke e caa te niimihi ha atabuhi kon pie me e bo pwo. Ke e caa pacuwohi ne ko Kériso Iésu Padaame henye.
12 3.12 Ioane 14.6; Roma 5.2Wogenye, ke genye mu ko Kériso, ke genye céihi ne kon. Ke é mu ko anaa, na pwo mwomwon denye, me nye âbé céii Padué, me nye mu pelen. Ke time uce piwâ genye [ke time uce mwotikenye].
13 Ke wonaa, ana é pii tewé pie, me geé nemwo pwo me pinekepé tewé ko a bwo mu he ni picani tong me dewé. Be é mu ko anaa [ke piubwo da a céihi tewé]. Ke o ne tewé me geé mu pele Padué, ne ha a bwo ubwo na a wâé ten* 3.13 Dernière phrase—Grek: Be wonaa a bwo ubwo na a wâé tewé.!
Te junihe ubwo a pipwoééhe te Kériso me denye
14 É tidihi jiling he pwahamii Padué Caa [ke é pipaunueng] ko anaa. 15 Be weeng pa Caa te ati lépwona élé jeda he miiden, ke éni pwo bwohemwo. Ke e pwo me nye tai apulie ha a bele na céiu† 3.15 Ke e pwo me nye tai apulie ha a bele na céiu—Grek: E ne ni nii ni pétaapwo pwomwoiu.. 16 Te junihe ubwo a wâé ten, ke te junihe hiwon ni adéihi ten. Ke é ilehi kojaeng pie, me e bo pamwoiukewé ko a Jenen Iitihi ten, beme mang ni pwonimewé.
17 3.17 Ioane 14.23; Kolosé 1.23, 2.7Wâé heme e mu he pwonimewé wo Kériso mu ko a céihi tewé! Wâé heme [geé pwohewii ni acuwo na mwoiu] ni waan, ke e bwolu ne ha a pipwoééhe ten. 18 Ke me wonaa, ke wogewé me ati ni béé apulie te Padué, ke geé temehi ehi pie, te junihe ubwo wéden a pipwoééhe te Kériso, na ati he ni bwomunen‡ 3.18 Junihe ubwo wéden… Grek: Ubwo, bwali, eda ke numwihi (large, long, haut et profond.). 19 Be e piwéden koja ni bwo temehinaado tenye lépwo apulie. Ke wâé heme oba gewé ko a mulihe Padué, ke me e mu kowé ati.
20 E penem konye wo Padué ko a junuun na junihe ubwo. Ke jan me e pwo ce naado celi junihe ubwo ne konye koja nina nye niimihi pie me nye ilehi kojaeng.
21 Wogenye a Mwaiitihi ten na nye mu ko Kériso Iésu, ke wâé heme nye pipaunueng taaci dieli mwo! Amen! Wâé heme wonaa!
3:1-2 3.1 Filipi 1.7,13
3:1-2 3.2 Kolosé 1.25
3:3 3.3 Éféso 1.9−10; Kolosé 1.26
*3:5 3.5 Ni apulie ten na e caa pipégalilé—Grek: Na lé iitihi.
3:6 3.6 Éféso 2.13,16−19
†3:6 3.6 Céiu a bele—Grek: Céiu a éé apulie.
‡3:6 3.6 Weengaa kuti a Pwooti Wâé—ai Ko a Pwooti Wâé.
3:7-8 3.7 Kolosé 1.25
3:7-8 3.8 1 Korénit 15.9−10
§3:10 3.10 Be lé o alihi…a Mwaiitihi—ai Lé o bo temehi anaa, é mu ko a bwo patemehi na a Pwooti Wâé te a Mwaiitihi. Grek: …É mu ko a Mwaiitihi.
3:12 3.12 Ioane 14.6; Roma 5.2
*3:13 3.13 Dernière phrase—Grek: Be wonaa a bwo ubwo na a wâé tewé.
†3:15 3.15 Ke e pwo me nye tai apulie ha a bele na céiu—Grek: E ne ni nii ni pétaapwo pwomwoiu.
3:17 3.17 Ioane 14.23; Kolosé 1.23, 2.7
‡3:18 3.18 Junihe ubwo wéden… Grek: Ubwo, bwali, eda ke numwihi (large, long, haut et profond.)