Tii Iitihi: Élele Iitihi na mwo Coho Ébéru 2

E pébé a pwaaden @ na te nihe pwonaado ne kon

Nemwo pwo me piticenaado ne kon

1 É mu ko anaa*, ke wâé heme genye engen ehi, cehi ni pwooti na genye téne. Be koli genye bo piâ ité kojan. 2 Be é ne ko ni *patén de Moosé†, ke e habwii pie a juuju, ke e pwo me lé pwocuhinaado ati wo lépwona time lé uce ju âcehin.

3 Kehe icehi ana [wo Padué, ke] e caa ne tenye a pwaaden na te nihe pwonaado ne kon! Ke genye o woté ko ace bwo cela tenye ko a cuhinaado, hemepie time genye uce âcehi a pwaaden naa?! Be te wo Padaame Iésu li e mi patemehi a pwaaden. Ke wo lépwona lé téneeng, ke lé *pajuujuhi ne tenye.

4 Ke wo Padué mwo, ke e pipajuujueng ne ko ni *inenaado na pwojunuun: ni naado na lé o téetihi ne ni apulie. Ke e muko ne ni âpipati, na e pwaadeniin bé na a *Jenen Iitihi, âcehi ana nimen kon.

E pwo me piwahin nang me denye

5 É ko pacihekewé ko a Mwametau‡ na e o bo tuie. Ke o time uce ni âcélo na e bo nelé me lé pihuô nelang wo Padué. 6 Be e pii ten wo pa céiu apulie, ne ha a céiu duaan ne he ni *tii iitihi pie:

Woo pa apulie,

beme go o niimieng, [go Padué]?

Ke é mu ko ade na eânimem

de pa nahi apulie§?

7 Go pineeng ole koja lépwo âcélo

ha a cuwo benaamwon.

Go ne ten a kuron he daame.

Go pwo me pipaunueng.

8 Go tai ne haahi ni an

[me e pihuô ne ko ati ni naado].

Psaume 8.5−7

Be te tice ace céiu naado celi e o mu ité koja ni pihuô ten*. Kehe icehi ana é jenaa, ke genye te ju alihi ehi, pie mwo time uce cuwo ati ni pwooti naa. 9 Ke genye alihi mwo pie, e caa neole Iésu haahi ni âcélo, ha a cuwo benaamwon. Be e mu he ni picani, ke e mele me denye, ati ni apulie, é mu ko a *pipwoééhe tice ja kon de Padué. Ke é mu ko ana e pwo wo Iésu, ke caa ne ten a kuron: a bo lépwo daame. Ke genye alihi pie pipaunueng [pwohewii a pwooti naa, ne he ni tii iitihi].

Pa cuwo ati ni naî Padué

10 Wo Padué, ke e ne ati ni naado me den, ke e tee ko wéa kolé. Pwo ni béé naî Padué mwo, na te nihe hiwon jélé [wogenye kuti†]. Ke wâé ten, me genye tai mu ha a bwo ubwo na a wâé ten, na e pipwaadeniin bé a bwo mu he ni picani te Iésu me a bwo mele ten. Ke é mu ko anaa kuti, ke wo Padué, ke e ne te Iésu a atebwo na hején, ke jan ne kon. Be wo Iésu, ke Padaame na e *celuimi ati ni naî Padué, ke e pipéélé nge [ha *a ju mulip‡].

11 Te wo Iésu kuti, na e pwo me pwéélang ni pwonimenye, ke e péékenye, wogenye ni apulie ten, nge céii Padué§ [pa caa ten] beme céiu pa caa tenye ati me weeng. É mu ko anaa kuti, na time uce tanim nang me e pii konye pie ni âjiénen. 12 Be weeng na e pii te Padué pie:

É bo pipatemehi a niim

te lépwo âjiénung.

É bo pwonyebi ko ni nyebi tem,

heme lé pitapitilé*.

Psaume 22.23

13 Ke e pii mwo pie: Woéo mwo, ke é bo céihi ne ko Padué.Ésaïe 8.17

Ke a céiu mwo:

Woéo-ni, me ni béén

na e nelé tong wo Padué,

beme ni naîng.

Ésaïe 8.18

E pé a éé apulie pwohewiikenye

14 Wogenye ni naî Padué, ke tai etenye ati, a éé apulie na e bo mele. Ke e pé a éé apulie wo Iésu, beme e pwohewiikenye. Ke e caa mele me denye, beme e pétaabwon a junuu *Caatana, pana e pwo me genye mele. 15 Ke me wonaa, ke e tuwokenye koja a bwo mwotikenye ko a mele, na genye teko mu hen ânebun, ati he ni tan.

16 Genye temehi ehi pie, time e uce âbé wo Iésu beme e picani te ni âcélo. Kehe e âbé picani te ni piebehi *Abérama. 17 Ke e pipwohewiikenye, ne ha ati ni bwomunen. Be [mepie time uce wonaa, ke wieli o time uce jan me] pa apipépwooti† ha awiemenye me Padué. Ke e caa *apwoâpwailo ubwo tenye, na e piténede Padué, ne ha a bwo penem den. Ke e pipwoééhenye [wogenye na tice niihenye]. Ke e pwo a âpwailo, beme pineuhi ni ta pwo tenye. 18 Ke te jan me e picani tenye, hemepie e tuiebé ne konye ni tacebwén. Be e temehi ni tacebwén, me ni picani mwo.

*2:1 2.1 Anaa—A bwo ubwo na a wâé te pa Naî Padué, na e pii ehi ne ha a pwahamii tii 1.

2:2 2.2 Galat 3.19

†2:2 2.2 Patén de Moosé—Grek: A pwooti na lé pébé wo lépwo âcélo, ke e cuwo. Lé pii wo lépwo Juif pie, lé hegi ni patén de Moosé na lé pwaadeniin bé wo lépwo âcélo. Omehi Apostolo 7.53.

2:3 2.3 Ébéru 10.29, 12.25

2:4 2.4 Maréko 16.20; 1 Korénit 12.4,11

‡2:5 2.5 Mwametau—Grek: Monde.

2:6 2.6 Psaume 8.5−7

§2:6 2.6 Pa nahi apulie—A pwooti mu ha a Psaume 8.5−7, na a pwooti konye ni apulie. Kehe icehi ana wo pana e tii a tii te lépwo Ébéru, ke e pii pie wo Iésu, na pii kon pie, pa Nahi Apulie.

*2:8 2.8 Pihuô ten—ai Pihuô tenye. Wieli e piikenye ni apulie, ai wieli wo Iésu Kériso, pa Nahi Apulie.

2:9 2.9 Filipi 2.8−9

†2:10 2.10 Wogenye kuti—Geme caa tii pie wogenyeni naîn ne he ni niide a tii 10−18, be wogenye ni naî Padué, wogenye na nye céihi ne ko Iésu. Omehi Ébéru 3.6.

‡2:10 2.10 (Niide a tii)—ai Ati ni naado, ke ni den [de Padué] ke lé âbé mu kon, ke lé mu kon. Ke e pé ni naîn na hiwon jélé ne ha a bwo ubwo na a wâé ten. Ke wâé ten me e pwo me hején [Iésu] na e pwaadeniin bé a bwo mele ten, weeng [Iésu] pana e tabuhi a bwo celuimilé. Ni pwooti, ke lé pwo me hején [Iésu] ke wieli a bwo hegi nen den a atebwo ten ne he miiden, ai wieli a bwopiinen pie, o hején a bwo celuimikenye ten.

2:11 2.11 Mataio 25.40

§2:11 2.11 E péékenye…nge céii Padué—ai E tuwo ni apulie koja ni ta pwo telé. Grek: E pwo me lé iitihi.

2:12 2.12 Psaume 22.23

*2:12 2.12 Ni pwooti mu ha a Psaume 22.23, ana e tii wo pa daame Davita. Wo pana e tii a tii ce te lépwo Ébéru, ke e pii pie, te wo Iésu na e mi pii ni pwooti naa te Padué, he li lu mu he miiden, ânebuhe a bwo tabuhi na a bwohemwo.

2:13 2.13 Ésaïe 8.17,18

2:14 2.14 1 Ioane 3.8; Pii Beetihi 12.10

†2:17 2.17 Pa apipépwooti… e caa apwoâpwailo. Omehi a note ko Ébéru 6.19−20.