10
1 “Ang mga taga-Israel kaniadto
sama sa tanom nga ubas nga daghag bunga.
Sa ilang pag-uswag nagpatukod usab sila
ug daghang mga halaran,
ug gipatahom nila ang ilang sagrado
nga mga bato nga ilang gisimba.
2 Mga limbongan sila,
ug kinahanglan nga mag-antos sila
tungod sa ilang mga sala.
Gub-on sa Ginoo ang ilang mga halaran
ug sagrado nga mga bato.
3 “Unya moingon sila, ‘Wala kamiy hari
tungod kay wala kami motahod sa Ginoo.
Apan bisan pag aduna kami hari,
unsa may iyang mahimo nga maayo alang kanamo?’
4 Magsige lang silag sulti, manumpa,
ug maghimog mga kasabotan nga dili nila tumanon.
Busa ang hustisya nahisama sa makahilo
nga sagbot nga nanurok sa dinaro nga yuta.
5 Mahadlok ang mga lumulupyo sa Samaria
tungod kay mawala ang mga dios-dios
nga mga dumalagang baka sa Bet Aven.
Sila ug ang ilang mga pari nga nalipay sa katahom
niining mga dios-dios magsubo gayod
tungod kay kuhaon kini gikan kanila
6 ug dad-on sa Asiria ingon nga gasa
ngadto sa gamhanang hari.
Maulawan ang Israel*Israel: sa Hebreo, Efraim. Naghisgot kini sa usa sa mga tribo sa Amihanan nga bahin sa gingharian sa Israel.
tungod sa tambag nga iyang gisunod.
7 Mahanaw ang iyang†iyang: sa Hebreo, Samaria. Mao kini ang kapital sa Israel ug nagrepresentar sa tibuok gingharian sa Israel. hari sama sa usa ka gamay
nga sanga nga gianod sa tubig.
8 Gub-on ang mga simbahanan diha sa habog nga mga dapit sa Aven,‡Aven: mao usab kini ang Bet Aven o Betel. Tan-awa usab ang Ose. 4:15.
nga mao ang nahimong hinungdan
sa pagpakasala sa mga taga-Israel.
Motubo ang tunokon nga mga tanom
ug motabon sa ilang mga halaran.
Unya moingon sila sa mga bukid, ‘Taboni kami!’
ug sa mga bungtod, ‘Tumpagi kami!’ ”
9 Miingon ang Ginoo,
“Kamong mga katawhan sa Israel
nagpadayon sa pagpakasala sukad pa sa panahon sa inyong mga katigulangan sa Gibea.
Wala gayod kamo nausab.
Busa kamong mga kaliwat sa mga daotan sulongon sa Gibea.
10 Silotan ko kamo sumala sa akong gusto.
Maghiusa ang mga nasod sa pagpakig-gira kaninyo
tungod sa inyong padayong pagpakasala.
11 Kaniadto nagpahayahay lang kamo;
sama kamo sa dumalagang baka
nga nabansay sa paggiok ug nakaangay na niining trabahoa.
Apan karon lisod-lisoron ko kamong mga taga-Israel§Israel: sa Hebreo, Efraim. Tan-awa usab ang Ose. 4:17.
ug lakip ang mga taga-Juda;
mahisama kamo sa dumalagang baka
nga sangonan ug yugo ang iyang liog
nga wala pa makubali ug unya padaruhon.
12 Miingon ako kaninyo, ‘Pahumoka ang inyong kasing-kasing
sama sa yuta nga gidaro. Pagtanom kamo
ug pagkamatarong ug aniha ang paghigugma.
Kay panahon na kini nga modangop kamo kanako
hangtod nga moabot ako ug magdala
ug kaluwasan nga sama sa ulan.’
13 “Apan nagtanom kamo ug kadaotan,
busa miani usab kamo ug kadaotan.
Nalingla kamo sa mga bakak tungod kay misalig kamo
sa inyong kaugalingong katakos
ug sa inyong daghang mga sundalo.
14 Busa ang kasamok sa gubat batok
sa inyong mga katawhan ug mangaguba
ang inyong pinarilan nga mga lungsod.
Himuon sa inyong mga kaaway ang sama sa gihimo ni Shalman*Shalman: posible nga usa ka hari sa mga Moabihanon.
sa lungsod sa Bet Arbel nga gidugmok niya
ang mga inahan ug ang ilang mga kabataan.
15 Mao usab kana ang mahitabo kaninyong mga taga-Betel
tungod kay labihan ang inyong kadaotan.
Inig-abot sa adlaw sa paghukom, sa pagbanagbanag pa lang,
sigurado gayod nga mamatay na ang hari sa Israel.”
*10:6 Israel: sa Hebreo, Efraim. Naghisgot kini sa usa sa mga tribo sa Amihanan nga bahin sa gingharian sa Israel.
†10:7 iyang: sa Hebreo, Samaria. Mao kini ang kapital sa Israel ug nagrepresentar sa tibuok gingharian sa Israel.
‡10:8 Aven: mao usab kini ang Bet Aven o Betel. Tan-awa usab ang Ose. 4:15.
§10:11 Israel: sa Hebreo, Efraim. Tan-awa usab ang Ose. 4:17.
*10:14 Shalman: posible nga usa ka hari sa mga Moabihanon.