1 Iwe, chon Israel meinisin a mak iteiter lon tettelin uruwor o makelong lon ewe puken uruwon ekewe kingen Israel. Iwe, chon Juta ra oola Papilon pokiten ar tipis.

2 Ekewe akaeuin aramas mi liwinsefälito pwe repwe nomsefäl lon lenier kewe me lon ar kewe telinimw ir ekewe chon Israel, ekewe souasor, ekewe mwän seni ewe ainangen Lefi, pwal ekewe chon angang ngeni imwenfel. 3 A pwal wor aramas seni ekewe ainangen Juta, Peniamin, Efraim me Manasa, ra feila o imweimw lon Jerusalem. ✡Esr 2.27; Ne 7.73 4 Seni ewe ainangen Juta: Utai nöün Amihut, Amihut nöün Omri, Omri nöün Imri, nge Imri nöün Pani, i eman mwirimwirin Peres nöün Juta we mwän. 5 Seni ekewe mwirimwirin Shela: Asaia ewe mwänichi me nöün kewe mwän. 6 Nge seni ekewe mwirimwirin Sera: Jeuel me märärin kewe. Iteiten ekewe chon Juta meinisin wonopükü tiue. 7 Iwe, seni ewe ainangen Peniamin: Salu nöün Mesulam, Mesulam nöün Hotawia, nge Hotawia nöün Hasenua, 8 pwal Ipneia nöün Jehoram, Ela nöün Usi, Usi nöün Mikri me Mesulam nöün Sefatia, Sefatia nöün Reuel, nge Reuel nöün Ipnia. 9 Iwe, iteiten ekei aramas seni ewe ainangen Peniamin mi makelong lon tettelin uruwor tiuepükü lime me wonoman. Ätekei meinisin ir mwänirelan ar kewe cho.

10 Ikkei ir ekewe souasor mi imweimw lon Jerusalem: Jetaia, Jehoiarip, Jakin 11 me Asaria ewe mi lap lon imwen Kot, i nöün Hilkia, Hilkia nöün Mesulam, Mesulam nöün Satok, Satok nöün Meraiot, nge Meraiot nöün Ahitup, 12 Ataia nöün Jeroham, Jeroham nöün Pasur, Pasur nöün Malkia, pwal Masai nöün Atiel, Atiel nöün Jasera, Jasera nöün Mesulam, Mesulam nöün Mesilemit, nge Mesilemit nöün Imer. 13 Iwe, ekei souasor ir mwänirelan ar kewe cho iteiter engeröü füpükü wone mwän mi sip le föri angangen lon imwen Kot.

14 Ikkei ir ekewe mwän seni ewe ainangen Lefi mi imweimw lon Jerusalem: Semaia nöün Hasup, Hasup nöün Asrikam, nge Asrikam nöün Hasapia, eman mwirimwirin Merari, 15 pwal Pakpakar, Heres, Kalal me Matania nöün Mika, Mika nöün Sikri, nge Sikri nöün Asaf, 16 me Opatia nöün Semaia, Semaia nöün Kalal, nge Kalal nöün Jetutun, pwal Perekia nöün Asa, nge Asa nöün Elkana, ätewe mi nom lon wisoposopun lenien chon Netofa.

17 Ikkei ir ekewe chon tümwünü asamalapen ewe imwenfel mi imweimw lon Jerusalem: Salum, Akup, Talmon, Ahiman me märärir kewe. Iwe, Salum nöür we mi lap, 18 a wisen tümwünü ewe asamalapen king mi nom ötiu tori ikenai. Ätekei ir chon tümwünü asamalapen imwenfel, ra nom lon lenien ekewe mwän seni ewe ainangen Lefi. 19 Iwe, Salum nöün Kore, Kore nöün Epiasaf, Epiasaf nöün Kora, pwal märärin kewe seni än Kora cho, ra wisen föri ewe angangen tümwünü ewe lenien tolong lon ewe imwenfel, usun ar kewe lewo ra piin föri, lupwen ra tümwünü ewe lenien tolong lon imwen ewe Samol mi Lapalap. 20 Nge Pinehas nöün Eleasar a nemeniir me lom. Iwe, ewe Samol mi Lapalap a eti Pinehas. 21 Iwe, Sekaria nöün Meselemia a mamasa ewe asamalapen tolong lon ewe imw mangaku ia aramas ra churi Kot ie. 22 Ekei mwän meinisin mi kefil pwe repwe mamasa ekewe lenien tolong ükükün rüepükü engol me ruoman. Iwe, iteiter a mak lon tettelin uruwor me lon sopur. Ewe king Tafit me ewe soufos Samuel ra atolonga ar kewe lewo lon wiser, pun ra allükülük o wenechar. 23 Iwe, ir me mwirimwirir kewe ra wisen mamasa ekewe asamalapen imwen ewe Samol mi Lapalap. 24 Mi wor meilapen ekewe chon mamasa asamalap, ra nom ren ekewe rüanü pekin: ötiu, lotou, efeng me ör. 25 Nge märärir kewe mi nom lon sopur kewe ra wisen feito lon en me an fansoun, pwe repwe alisir lon ewe angang lon ükükün fisu rän. 26 Nge ekewe föman meilapen chon mamasa asamalap, ir ekewe mwän seni ewe ainangen Lefi, ra pwal wisen tümwünü ekewe rumwen lon ewe imwenfel me ekewe pisek aüchea mi nom lon. 27 Iwe, ra nonom pwelin ünükün ewe imwenfel, pun ra wisen mamasa o suki ekewe asamalap iteiten lesosor.

28 Iwe, ekoch me lein chon ewe ainangen Lefi ra wisen tümwünü ekewe pisek ra aea le angang lon imwenfel, pun ra wisen aleaniir, lupwen ra atorowu me atolongeer. 29 Pwal ekoch me leir ra fil pwe repwe tümwünü ekewe mettochun lon ewe imwenfel me ekewe sokopaten pisek mi pin, pwal ewe pilawa mi amas, ewe wain, ewe apüra, ewe apach mi pwokus me nofitin mongö. 30 Nge ekoch me lein ekewe souasor ra wisen nofitifengeni ekewe nofitin mongö. 31 Matitia eman lein ekewe mwän seni ewe ainangen Lefi, nöün Salum we mwänichi seni än Kora we cho, a wisen umuni ewe pilawa ra eäni le asor. 32 Nge ekoch me lein än Kohat we cho ra wisen föri ekewe pilawa mi pin, pwe repwe atetteliir won ewe chepel iteiten ränin sapat.

33 Iwe, ekewe mwänirela me lein ekewe chon köl seni ewe ainangen Lefi, ra nonom lon rumwen ewe imwenfel. Resap föri och angang me lükün, pun ra föri ar angang lerän me lepwin. 34 Ekei mwän meinisin ir souemwen pwal mwänirelan än semer kewe chon seni ewe ainangen Lefi mi makelong lon tettelin uruwor. Ra imweimw lon Jerusalem.

35 Iwe, Jeiel a popuetä le aüetä ewe telinimw Kipeon o imweimw lon. Iten pwülüan we Maka. 36 Iten nöün we mwänichi Apton, mürin Sur, Kis, Pal, Ner, Natap, 37 Ketor, Ahio, Sekaria me Miklot. 38 Nge Miklot semen Simeam. Ekei aramas ra pwal imweimw lon Jerusalem arap ngeni märärir kewe. 39 Iwe, Ner semen Kis, Kis semen Saul, nge Saul semen Jonatan, Malkisua, Apinatap me Espal *Espal a pwal iteni Isiposet. 40 Nöün Jonatan we mwän Merip-pal †Merip-pal a pwal iteni Mefiposet, nge Merip-pal semen Mika. 41 Nöün Mika kewe mwän: Piton, Melek, Taria me Ahas. 42 Ahas semen Jara, nge Jara semen Alemet, Asmafet me Simri. Iwe, Simri semen Mosa, 43 Mosa semen Pinea, Pinea semen Refaia, Refaia semen Eliasa, nge Eliasa semen Asel. 44 Iwe, nöün Asel kewe wonoman mwän: Asrikam, Pokeru, Ismael, Searia, Opatia me Hanan.