1 Iwe, ämi oupwe ekieki ngenikem pwe äm nöün Kraist chon angang, wisem pwe aipwe tümwünü än Kot we monomon mi let. 2 Eu chök mettoch epwe fokun aüchea ren eman chon angang, pwe epwe allükülük ngeni an samol. 3 Üsap fokun ekieki ika üpwe küna kapwüng me remi, ika me ren eu mwichen aramas ir soukapwüng. Üsap pwal mwo nge püsin apwüngüei. 4 Letipei a limöch, nge ei esap alletätä pwe esap wor ai tipis. Ach Samol chök i ewe epwe apwüngüei. 5 Iei mine ousap apwüngü eman me mwen an epwe war ewe fansoun mi fich. Ewe amüchülan kapwüng epwe witiwit tori ach Samol epwe war. I epwe asarama mine a monomonola lon rochopwak o pwärawu mine a monomon lon ekiekin aramas. Mürin aramas meinisin repwe angei me ren Kot iteüöchür lon met a fich ngeni eman me eman.

6 Ämi pwii kana, ekei mettoch meinisin üa kapas usun iei, üa eänikem me Apolos kapasen awewe, pwe oupwe tongeni kaiö me rem met wewen ekei kapas, “Oupwe chök apwönüetä mine a mak.” Esap wor eman epwe ingeiti eman are oputa eman. 7 Pun iö a seikuketä pwe kopwe lap seni ekewe ekoch? Ifa usun, Kot esap fang ngonuk mettoch meinisin mine ka eäni? Pwota ka aingaing won met mi wor reöm usun itä nge esap minen lifang?

8 Ifa usun, a fen wor remi mettoch meinisin oua osupwang ren? Oua fen pisekisekila? Ifa usun, oua sounemenem, nge äm aisap etikemi? Üa fokun äneän pwe amwo oupwe nemenem, pwe äm aipwe etikemi le nemenem. 9 Pun üa ekieki pwe Kot a aleniakem äm soukünö, pwe aipwe nom fälapalapen aramas meinisin, pwe aia wewe ngeni aramas a fen kapwüngüla pwe repwe ninnila me mwen mesen aramas, pwe aipwe och minen atakirikir me ren ekewe chon läng meinisin me chon fanüfan meinisin. 10 Äm chon umwes fänäsengesin Kraist, nge ämi chon tipachem lon Kraist! Äm chon apwangapwang, nge ämi chon pöchökül. Äm chon küna turunufas, nge ämi chon iteüöch. 11 Tori ei fansoun äm aia echik me kaka, aia üföüf üf mi kamwakam, ra wichikem, aia süsüfeil ngeni leni me leni. 12 Aia angang weires ren püsin pöüm. Lupwen ra ottekikem, aia afeiöchüür, lupwen ra ariaföüükem, aia engila ngeniir. ✡Föf 18.3 13 Lupwen ra aitengauakem, aia pölüeniir lon kapas pwetete. Aia wewe ngeni mettoch lon lenien koturula, aia wewe ngeni limengauen ei fanüfan tori ikenai.

14 Üa makei ekei kapas ngenikemi, sap pokiten üa mochen asäwakemi, nge fän iten ai mochen öüröürakemi usun püsin nei mi achengicheng. 15 Pun inamwo ika a wor engol ngeröü nöümi souemwen lon manauen ämi souläng, nge oua chök semeni eman. Pun lon Kraist Jesus üa wiliti eman sememi ren ai afalafala ewe Pworausen Manau ngenikemi. 16 Iei mine üa tüngormau ngenikemi pwe oupwe apirüei. ✡1.Kor 11.1; Filip 3.17 17 Iei popun üa tinala remi Timoty, i nei we mi achengicheng o allükülük lon ach Samol. I epwe achema ngenikemi usun ei manau mi fö üa manaueni lon Kraist Jesus usun üa afalafala lon ekewe mwichefel ekis meinisin.

18 Ekoch me leimi oua lamalamtekia, pun oua ekieki pwe üsap feito pwe üpwe churikemi. 19 Nge are epwe fen letipen Kot, ngang üpwe müttir feila remi. Mürin üpwe püsin küna ewe tufich ekei aramas mi lamalamtekia ra eäni, nge sap chök lon met ra apasa. 20 Pun Mwün Kot esap pwä lon kapas chök, nge lon manaman. 21 Met ämi oua mochen? Oua mochen ai üpwe feila remi fän efoch wok, ika üpwe feila remi fän tong me lukpwetete?