9
Än eman soukünö pwüüng me wisan
9.1-27
Ifa usun, sap ngang eman aramas mi ngas? Ifa usun, sap ngang eman soukünö? Üsap fen küna ren mesei ach Samol Jesus? Ifa usun, sap ämi uän ai angang fän iten ach Samol? Inamwo ika ekoch aramas resap etiwaei usun eman soukünö, nge fen iei mine oua föri! Pokiten ämi oua souläng, iei met a alletätä pwe ngang eman soukünö.
Lupwen aramas ra esitaei, iei met üa püsin peniei won: Ifa usun, esap wor ai pwüüng ai üpwe angei anei me ünümei fän iten ai angang? Ifa usun, esap wor ai pwüüng ai üpwe uwei eman pwülüei souläng lon ai sai, usun chök ekewe ekoch soukünö me ekewe pwiin ach Samol pwal Petrus ra föri? Ika äm chök me Parnapas aipwe wisen angang fän iten met aipwe manau ren? Iö sounfiu a püsin mönätiu liwinin mettochun lupwen a nom lon an mwichen sounfiu? Ifa usun, eman chon tanipi esap ochoch uän fotan wain seni lon an tanipi? Ifa usun, eman chon masen sip esap ünümi milik seni püsin nöün sip?
Ifa usun, üa chök kapas usun pwüngün lefilen aramas? Ifa usun, ekewe Allük resap wewefengen le kapas usun ei mettoch? Pun a mak lon än Moses kewe Allük, “Kosap föti awen eman ätemwänin kow lupwen a puri ekewe umwun wiich, pwe föün repwe towu seni pöör.” Ifa usun, Kot a chök ekieki ekewe ätemwänin kow? Tut 25.4; 1.Tim 5.18 10 Ifa usun, esap fokun ekieki kich lupwen a apasa ekei kapas? Ewer, ekei kapas ra mak fän itach. Ewe mwän mi tuw pwül, pwal ätewe mi kini ekewe föün irä lon fansoun räs repwe föri ar angang fän apilükülük, pwe repwe angei wiser seni ewe räs. 11 Äm aia amworafeili ewe sokun pwükil lefilemi mi afisätä ämi feiöch lon pekin ngün, ifa usun, epwe ngau are aipwe angei senikemi ekewe feiöchün fanüfan? Rom 15.27 12 Are ekewe ekoch a wor ar pwüüng pwe repwe angei alilisiir senikemi, ifa usun, esap fen wor watten äm pwüüng won met aipwe angei senikemi?
Nge äm aisap aea ei sokun pwüüng, pwe aia fen tupwöl fän sokopaten osukosuk, pwe aisap epeti ewe Pworausen Manau usun Kraist pwe epwe rongofeil. 13 Ämi oua fokun silei, pwe ekewe mwän mi angang lon ewe imwenfel ra angei aner mongö seni ewe imwenfel, nge chokewe mi föri ewe angangen asor won ewe rongen asor ra angei wiser seni ewe asor. Tut 18.1 14 Iei usun ach Samol a allük, pwe chokewe mi arongafeili ewe Pworausen Manau repwe manau seni ewe angang ra föri. Mat 10.10; Luk 10.7
15 Nge üsap aea och me lein ekei pwüüng. Üsap pwal makkei ekei kapas, pun üa apilükülükü pwe oupwe föri ekei mettoch fän itei. Epwe fen öch ai üpwe mäla akom, pwe esap wor eman epwe akasiwili ai aingaing mi pwüng ngeni kapas mi pön. 16 Nge esap wor ai pwüüng pwe üpwe aingaing pokiten üa afalafala ewe Pworausen Manau, pun iei wesewesen wisei Kraist a allük ngeniei pwe üpwe föri. Feiengauei are üsap afalafala ewe Pworausen Manau! 17 Pun are üa föri ai angang seni püsin mochenin letipei, epwe wor liwinin ai angang. Nge üa föri ei angang fän asopwisek, pun Kot a awisa ngeniei pwe üpwe föri. 18 Iwe, met sokun liwin üpwe angei? Iei chök liwini, pwe üpwe afalafala ewe Pworausen Manau nge üsap angei och liwin seni, üsap aea ai pwüüng lon ai angang fän iten ewe Pworausen Manau.
19 Ngang eman aramas mi ngas, esap wor eman a nöüniei amanau, nge püsin ngang üa atolongaei ai üpwe eman amanau fän iten aramas meinisin, pwe üpwe asoulängala chomong me leir. 20 Lupwen üa afalafala ewe Pworausen Manau ngeni ekewe chon Juta, üa manau usun chök eman chon Juta, pwe üpwe asoulängirela. Lupwen üa afalafala ewe Pworausen Manau ngeni ekewe mi nom fän än Moses kewe Allük, üa manau usun chök eman mi nom fän ekewe Allük, inamwo ika üsap nom fän ekewe Allük. Nge üa föri ei, pwe üpwe asoulängirela. 21 Pwal ina chök usun, lupwen üa afalafala ewe Pworausen Manau ngeni ekewe chon lükün Israel, üa manau usun chök eman chon lükün Israel esap nom fän än ekewe chon Juta Allük, pwe üpwe asoulängirela. Ei esap wewen pwe üsap aleasochisi än Kot kewe allük, pun üa fokun nom fän än Kraist allük. 22 Lupwen üa nom lein ekewe mi apwangapwang lon ar lükülük, üa usun chök eman mi apwangapwang me leir, pwe üpwe asoulängirela. Iei usun üa manaueni sokun manau meinisin lein sokun aramas ese lifilifil, pwe üpwe tongeni amanaua ekoch me leir ren met epwe tufich ngeniei.
23 Ekei mettoch meinisin üa föri fänäsengesin ewe Pworausen Manau, pwe üpwe angei wisei lon ekewe feiöch. 24 Ousap silei pwe ekewe chon kitir meinisin ra sä lon lenien kitir, nge eman chök leir a angei winnan? Iei mine oupwe kitir, pwe oupwe angei winnemi. 25 Iteiten sensü meinisin ra achocho ngeni ar repwe fiti pwüngün allükün ar rensü, pwe repwe angei epa mwärämwär mi morokai. Nge kich sipwe achocho ngeni manauen ach souläng, pwe sipwe angei epa mwärämwär epwe nonom tori feilfeilachök. 26 Iei popun üa sä wenechar ngeni ewe tepkiri, pwal iei popun üa wewe ngeni eman chon köfön esap chök köfön chöü. 27 Üa fokun pöchökül ngeni inisi o anomu fän nemeniei, pwe üsap afalafala ekoch, nge püsin ngang üa lipwäkingau.

9:9: Tut 25.4; 1.Tim 5.18

9:11: Rom 15.27

9:13: Tut 18.1

9:14: Mat 10.10; Luk 10.7