1 Iwe, are mi wor anini lefilen ruoman mwän, nge ra tori kapwüng, ekewe soukapwüng repwe eäni kapwüng lefiler. Iwe, repwe amusa ätewe esap tipis o apwüngü ätewe mi tipis. 2 Are a pwüngüla pwe ätewe mi tipis epwe wichiwich, ewe soukapwüng epwe üreni pwe epwe chapala pwe epwe wichiwich me fän mesan aükük ngeni ükükün an tipis. 3 Nge ätewe mi wichi ewe chon tipis esap tongeni wichi lap seni fän faik. Pun are wichiwichin epwe lap seni fän faik, pwiüm we chon Israel epwe itengau me reöm. ✡2.Kor 11.24 4 Kosap föti awen eman ätemwänin kow, lupwen a puri ekewe irän wiich pwe föün repwe towu.” ✡1.Kor 9.9; 1.Tim 5.18

5 “Iwe, are ruoman pwipwi ra nonomfengen o eman me leir a mäla, nge esap wor nöün mwän, pwülüen ätewe mi mäla esap tongeni pwüpwülü ngeni eman lükün ewe famili. Pwin pwülüan epwe feito ren o pwülüeni, epwe pwal föri pwüngün pwülüen pwin ngeni neminewe. 6 Ewe aemanün nöün ät neminewe a nöüni me won epwe iteit seni iten pwin we mi fen mäla, pwe iten pwin esap mola seni lon Israel. ✡Mat 22.24; Mark 12.19; Luk 20.28 7 Nge are ewe mwän esap mochen pwülüeni pwülüen pwin we, neminewe epwe feila ren ekewe souakom leasamalapen ewe telinimw o apasa, ‘Pwin pwülüei esap mochen pwe iten pwin we epwe sopwosopwola me lon Israel. Esap mochen föri pwüngün pwülüen pwin ngeniei.’ 8 Mürin, ekewe souakom repwe körato ätewe o kapas ngeni. Nge are a chök sopwela an ekiek o üra, ‘Üsap fokun mochen pwülüeni,’ 9 pwülüen pwin we epwe feila ren fän mesen ekewe souakom, epwe pwilitawu ipwen ätewe sus o atufa won mesan. Iwe, epwe apasa, ‘Iei usun mine a fis ngeni ewe mwän esap mochen oupwätiu familien pwin, pwe epwe wor mwirimwirin.’ 10 Iwe, än ewe mwän famili me lon Israel epwe iteni: Ewe famili mi pwilipwiliwu ipwan sus.” ✡Rut 4.7-8

11 “Iwe, are ruoman mwän ra fiufengen, nge pwülüen eman leir a feito pwe epwe alisi pwülüan we seni lepöün ätewe mi awata, are a turufi an we kükün inis, 12 kopwe pöküela pöün neminewe, nge kosap tongei.

13 Kosap nöünöü ruu sokun föün kilo, eföü mi chou me eföü mi pän. 14 Kosap pwal aea ruu sokun aükük, eu mi watte me eu mi kükün. 15 Om kilo me om aükük epwe üküköch me pwüng, pwe kopwe manauatam lon ewe fanü ewe Samol mi Lapalap om we Kot epwe ngonuk. 16 Pun ewe Samol mi Lapalap om we Kot a oput chokewe meinisin mi föri ekei sokun föförün atuputup.” ✡Lif 19.35-36

17 “Iwe, oupwe chechemeni mine ekewe chon Amalek ra föri ngenikemi, lupwen oua towu seni Isip. 18 Oupwe chechemeni usun ar maun ngenikemi me won ewe al, lupwen oua apwangapwang o malülü. Pwe ra ärala ekewe mi nom mürimi, chokewe meinisin mi asaimang pokiten ar apwangapwang, nge resap meniniti Kot. 19 Iei mine, lupwen ewe Samol mi Lapalap ämi we Kot epwe ngenikemi ewe fanü o asösökemi seni chon oputakemi meinisin mi nom ünükümi, oupwe fokun niela ekewe chon Amalek, pwe esap wor eman epwe chüen chechemeniir. Ousap fokun manlükala mine üa ürenikemi.” ✡Eks 17.8-14; 1.Sam 15.2-9