1 Iwe, ekewe chon Israel meinisin ra towu seni ewe fanüapön Sin o sai seni eu leni tori pwal eu, usun ewe Samol mi Lapalap a allük ngeniir. Iwe, ra tori Refitim o aüetä imwer. Nge ikenan esap wor ünümer koluk. 2 Iei mine ekewe aramas ra anini ngeni Moses o üreni, “Kopwe aünükem koluk.” Iwe, Moses a üreniir, “Pwota oua anini ngeniei? Pwota oua sotuni ewe Samol mi Lapalap?” 3 Nge ekewe aramas ra fokun kakan koluk, pwe ra lal ngeni Moses o apasa, “Pwota ka emwenikeemiwu seni Isip? Ifa usun, kopwe niikem me nöüm pwal nöüm pwiin man ren om emwenikeemito lon ei leni ese wor koluk lon?” 4 Iwe, Moses a siö ngeni ewe Samol mi Lapalap, “Met üpwe föri ngeni ekei aramas? Arapakan chök ar repwe monei ngeniei fau.” 5 Mürin, ewe Samol mi Lapalap a kapas ngeni Moses, “Kopwe nuki ekoch seni ekewe souakomwen Israel o akomwola mwen ekewe aramas. Kopwe feila o uwei ewe wok ka wichi ngeni ewe chanpupu Nil. 6 Ngang üpwe ütä o sounuk won ewe achau mi nom lepekin ewe chuk Horep. Kopwe wichi ewe achau pwe koluk epwe puwu seni, pwe ekewe aramas repwe tongeni ün.” Iwe, Moses a föri iei usun fän mesen ekewe souakomwen Israel. 7 Iwe, a aita ngeni ewe leni Massa *wewen Massa sosot me Meripa †wewen Meripa anini, pun ekewe aramasen Israel ra anini ngeni Moses, ra pwal sotuni ewe Samol mi Lapalap ren ar apasa, “Ifa usun, ewe Samol mi Lapalap a nom leich ika esap?” ✡Num 20.2-13

8 Iwe, chon Amalek ra war pwe repwe maun ngeni chon Israel lon Refitim. 9 Nge Moses a üreni Josua, “Kopwe filätä ekoch mwän o feila pwe kopwe maun ngeni ekewe chon Amalek. Nge lesor ngang üpwe ütä won ungen ewe chuk fän ewe wokun Kot mi nom lepei.” 10 Josua a föri mine Moses a üreni, a feila o maun ngeni ekewe chon Amalek. Nge Moses, Aaron me Hur ra feitä won ungen ewe chuk. 11 Iwe, lupwen Moses a aitietä pöün, chon Israel ra win. Nge lupwen a uwätiu pöün, chon Amalek ra win. 12 Nge pöün Moses a malülü. Iei mine ra angei eföü fau o amotätiu Moses won. Nge Aaron me Hur ra amwöchätä pöün, eman epek pwal eman epek. Iei usun pöün Moses ra itifochetä tori akkar a tuputiu. 13 Iwe, Josua a akufu ekewe sounfiun Amalek meinisin o nirela.

14 Mürin, ewe Samol mi Lapalap a üreni Moses, “Kopwe makei ei pworaus lon eu puk pwe aramas repwe chechemeni. Kopwe pwal üreni Josua pwe üpwe fokun arosala ekewe chon Amalek, pwe esap wor eman epwe chechemeniir me won fanüfan. ✡Tut 25.17-19; 1.Sam 15.2-9 15 Iwe, Moses a senätä eu rongen asor o aita ngeni ‘Ewe Samol mi Lapalap ai filaik’ ‡lon kapasen Ipru Yahweh-nissi. 16 A apasa, “Pokiten ekewe chon Amalek ra maun ngeni ekewe chon Israel, ewe Samol mi Lapalap epwe maun ngeni ekewe chon Amalek seni eu täppin aramas tori eu täppin.”