20
Koluk a puwu seni lon ewe achau
20.1-13
(Eks 17.1-7)
Iwe, lon aeuin maram ekewe aramasen Israel meinisin ra tori ewe fanüapön Sin o nonom lon Kates. Nge Miriam a mäla o peias ikenan.
Iwe, ikenan esap wor koluk fän iten ekewe aramas. Iei mine ra mwichefengen o ü ngeni Moses me Aaron. Iwe, ekewe aramas ra anini ngeni Moses o üreni, “Amwo aia eti pwim kewe ra mäla fän mesen ewe Samol mi Lapalap. Pwota oua emwenato nöün ewe Samol mi Lapalap mwichen aramas lon ei fanüapö pwe aipwe mäla ikei, äm me nöüm kewe man? Pwota oua emwenikeemiwu seni Isip o emwenikeemilong lon ei leni mi ngau. Ei leni esap eu lenien fot föün wiich, esap pwal mär irä fiik me irän wain me apel won. Iwe, esap pwal wor ünümem koluk ikei.” Mürin, Moses me Aaron ra feila seni ekewe aramas, ra feila ren asamalapen ewe imwenfel seni mangaku o chapetiu lepwül. Iwe, lingen ewe Samol mi Lapalap a pwä ngeniir, nge ewe Samol mi Lapalap a üreni Moses, “Kopwe angei ewe wok mi nom ren ewe pworofel o emwichato ekewe aramas meinisin, ämi me Aaron pwiüm we. Oupwe fos me fän meser ngeni ewe achau pwe epwe atowu kolukun lon. Iei usun kopwe atowu koluk seni lon ewe achau fän iter, pwe kopwe aünü ekewe aramas me nöür man.” Iwe, Moses a angei ewe wok usun ewe Samol mi Lapalap a allük ngeni.
10 Iwe, Moses me Aaron ra emwichafengeni ekewe aramas meinisin mwen ewe achau. Iwe, Moses a üreniir, “Oupwe rongorong, ämi chon ü ngeniei. Ifa usun, äm aipwe atowu koluk seni lon ei achau fän itemi?” 11 Mürin, Moses a aitiela wokun o wichi ewe achau fän ruu. Iwe, ewe koluk a pumongowu, pwe ekewe aramas me nöür kewe man ra ün. 12 Nge ewe Samol mi Lapalap a üreni Moses me Aaron, “Pokiten ousap lüküei, ousap pwal apiniöchüei me fän mesen ekewe aramasen Israel, iei mine ousap emwenirelong lon ewe fanü üpwe ngeniir.” 13 Ei a fis me arun ewe kolukun Meripa * wewen Meripa anini, ewe ia ekewe aramasen Israel ra anini ngeni ewe Samol mi Lapalap ie, nge i a pwärätä me leir pwe a pin.
Chon Etom resap mwütätä än chon Israel repwe sai lon fanüer
20.14-21
14 Iwe, Moses a tinala chon künö seni lon Kates ren ewe kingen Etom pwe repwe üreni, “Iei alon pwiüm kewe chon Israel: En ka püsin silei usun ewe riaföü a torikem. 15 Ka silei usun än äm kewe lewo feila Isip. Iwe, äm aia nonom lon Isip fansoun langatam. Nge ekewe chon Isip ra ariaföüükem me äm kewe lewo. 16 Iwe, lupwen aia siö ngeni ewe Samol mi Lapalap, a rong äm siö o tinato eman chon läng pwe epwe emwenikeemiwu seni Isip. Iwe, iei aia nom lon Kates, eu telinimw mi nom ünükün fanüom. 17 Kose mochen kopwe mwüt ngenikem pwe aipwe pwerelong lon fanüom. Äm aisap pwerelong lon om tanipin wiich ika tanipin wain, aisap pwal ün koluk seni ekewe chönüttu. Äm aipwe chök fetal won än ewe king alelap, nge aisap kul ngeni pelifichin ika pelimöngün tori aipwe pwerewu seni fanüom.” 18 Nge ewe kingen Etom a pälüeni, “Ousap fokun pwerelong lon fanüei, pun are oupwe pwerelong, äm aipwe maun ngenikemi.” 19 Iwe, ekewe aramasen Israel ra üreni, “Äm aipwe chök fetal won ewe alelap. Nge are äm me nöüm man aipwe ün seni om koluk, aipwe möni. Kopwe chök mwüt ngenikem pwe aipwe pwerelong, esap pwal wor och lükün.” 20 Nge ewe kingen Etom a pälüeni, “Ousap fokun pwerelong lon fanüei.” Iwe, ewe kingen Etom fiti chomong nöün sounfiu ra towu pwe repwe maun ngeniir. 21 Iwe, pokiten ekewe chon Etom resap mwüt ngeni chon Israel pwe repwe pwerelong lon fanüer, iei mine ekewe chon Israel ra kul seni o pwerela won efoch al.
Aaron a mäla me won ewe chuk Hor
20.22-29
22 Iwe, ekewe aramasen Israel meinisin ra sai seni Kates o tori ewe chuk Hor. 23 Iwe, ewe Samol mi Lapalap a üreni Moses me Aaron me fäsonun ewe chuk Hor won kiännin ewe fanü Etom, 24 “Aaron epwe mäla o chufengen me an kewe lewo. Pun Aaron esap tolong lon ewe fanü üpwe ngeni ekewe aramasen Israel, pokiten oua ü ngeni ai allük arun ewe kolukun Meripa. 25 Kopwe emwenätä Aaron me Eleasar nöün we mwän won ewe chuk Hor. 26 Mürin, kopwe pwiliti seni Aaron üfan kewe üföüfen souasor o aüföüfätä won Eleasar. Iwe, Aaron epwe mäla ikenan o chufengen me an kewe lewo.” 27 Iwe, Moses a föri usun mine ewe Samol mi Lapalap a allük ngeni. Ra mwinetä won ewe chuk Hor fän mesen ekewe aramas meinisin. 28 Iwe, Moses a pwiliti seni Aaron üfan kewe o aüföüfätä won Eleasar nöün we mwän. Iwe, Aaron a mäla ikenan won ungen ewe chuk. Mürin, Moses me Eleasar ra feitiu me won ewe chuk. Eks 29.29; Num 33.38; Tut 10.6 29 Nge lupwen ekewe aramasen Israel meinisin ra silei pwe Aaron a mäla, ir meinisin ra kechüeiti Aaron lon ükükün ilik rän.

*20:13: wewen Meripa anini

20:28: Eks 29.29; Num 33.38; Tut 10.6