1 Iwe, Poas a feila ren asamalapen ewe telinimw lon ewe lenien chulap o mottiu ikenan. Mürin, märärin Elimelek we mi fokun kan ngeni, ätewe Poas a fen kapas usun, a feito. Iwe, Poas a kökkö ngeni, “Ätenan, kopwe feito o mottiu ikei.” Iwe, a feito o mottiu. 2 Mürin Poas a fili engol ätemiritin ewe telinimw o üreniir pwe repwe pwal mottiu. Iwe, ra mottiu. 3 Mürin a üreni märärin we, “Naomi neminewe mi liwinto seni ewe fanü Moap a ekiekin amömöla eu kinikinin fanüen pwich we Elimelek. 4 Iei mine üa ekiekin pworaus ngonuk usun. Iwe, are ka mochen möni ei fanü, kopwe mönätiu iei me fän mesen ätekei mi mot ikei. Nge are kosap mochen möni, kopwe chök asile ngeniei. Pun esap wor än eman pwüüng me lukum an epwe tongeni möni, nge ngang mürum.” Iwe, a üreni, “Ngang üpwe möni ewe fanü.” 5 Iwe, Poas a üreni, “Mi öch. Nge lon ränin om kopwe möni ewe fanü seni Naomi, kopwe pwal angei Rut ewe fin Moap pwülüen ewe mi mäla, pwe kopwe aupwätiu mwirimwirin ewe mi mäla pwe repwe fanüeni fanüan.” 6 Nge ewe mwän a apasa, “Are iei usun, üsap mochen möni ewe fanü, pun mwirimwiri kewe resap tongeni fanüeni me mürin. Kopwe siwiliei le möni, pun ngang üsap tongeni möni.”

7 Iwe, iei usun örünien chon Israel me lom, pwe lupwen eman a mochen alleta an möni och seni eman ika akasiwili pisek me fanü, ewe chon amömö epwe pwiliti seni pechen eipw ipwan sus o ngeni ewe chon kamö. Iei usun ar alleta angangen amömö lon Israel. 8 Iwe, lupwen ewe mwän a apasa ngeni Poas, “Kopwe püsin möni,” a pwal pwiliti seni pechen eipw ipwan sus o ngeni Poas. ✡Tut 25.9 9 Mürin Poas a üreni ekewe ätemirit me aramas meinisin mi nom, “Ikenai ämi nei chon pwärätä pwe üa möni seni Naomi meinisin mine än Elimelek, pwal meinisin mine än Kilion me Maalon. 10 Üa pwal angei Rut ewe fin Moap pwülüen mäwe Maalon pwe üpwe pwülüeni o aupwätiu mwirimwirin ewe mi mäla, pwe repwe fanüeni fanüan. Iwe, iei usun iten ewe mi mäla esap mola me lein pwin kana pwal me lein aramasen poputän telinimwan. Ikenai ämi nei chon pwärätä.” ✡Tut 25.5-6 11 Mürin ekewe aramas meinisin me ekewe ätemirit mi nom arun asamalapen ewe telinimw ra apasa, “Fokun äm chon pwärätä. Amwo ewe Samol mi Lapalap epwe föri pwe pwülüom we epwe usun chök Rahel me Lea ra aupwätiu ekewe ainangen Israel. Amwo kopwe feiöch me lon ewe eterekesin Efrat, kopwe pwal iteüöch lon Petleem. ✡Ken 29.31 12 Amwo ewe Samol mi Lapalap epwe fang ngonuk mwirimwirum ren ei föpwül, pwe om famili epwe usun chök ewe familien Peres nöün Juta me Tamar.” ✡Ken 38.27-30

13 Iei mine Poas a pwülüeni Rut. Iwe, lupwen a kon ren, ewe Samol mi Lapalap a afeiöchü pwe a pwopwo o nöüni eman ät. 14 Iwe, ekewe fefin ra üreni Naomi, “Ousipwe mwareiti ewe Samol mi Lapalap. A fokun fang ngonuk eman mwirimwirum ikenai. Amwo itan epwe iteüöch lon Israel. 15 I epwe echipok o fokun tümwünuk lon om chinlap, pun a upu seni pwülüen noum we mi tongeek o öchü ngonuk lap seni füman noum mwän.” 16 Mürin Naomi a angei ewe semirit o anomu won afön pwe epwe tümwünü. 17 Nge ekewe fefin mi nom arun ra apasa, “Eman ät a uputiu ngeni Naomi.” Iwe, ra aita ngeni ewe ät Opet. Iwe, Opet semen Jesi, nge Jesi semen Tafit.

18 Iei mwirimwirin Peres: Peres semen Hesron, 19 Hesron semen Ram, Ram semen Aminatap, 20 Aminatap semen Nason, Nason semen Salmon, 21 Salmon semen Poas, Poas semen Opet, 22 Opet semen Jesi, nge Jesi semen Tafit.