1 Mürin, ekewe re Kiriat-jearim ra feito, ra angei än ewe Samol mi Lapalap we pworofel o uweela ngeni imwen Apinatap mi nom won eu chuk. Iwe, ra apini nöün we mwän Eleasar pwe epwe tümwünü än ewe Samol mi Lapalap we pworofel. ✡2.Sam 6.2-4; 1.Kron 13.5-7

2 Iwe, a la ekoch fansoun seni ewe rän ewe pworofel a nom lon Kiriat-jearim, ina epwe ükükün rüe ier. Mürin, chon Israel meinisin ra siö ngeni ewe Samol mi Lapalap pwe epwe alisiir. 3 Iwe, Samuel a üreni chon Israel meinisin, “Are oua kul ngeni ewe Samol mi Lapalap ren unusen lelukemi, oupwe pöütala ekewe koten ekis me ekewe uluulun ewe anüfefin Astarot mi nom remi o atolongakemi fän nemenien ewe Samol mi Lapalap, pwe oupwe angang ngeni i chök. Mürin epwe angasakemi seni fän nemenien ekewe chon Filistia.” 4 Iei mine chon Israel ra pöütala ekewe uluulun Paal me Astarot o angang ngeni ewe Samol mi Lapalap chök.

5 Mürin, Samuel a üreni ekewe chon Israel meinisin, “Oupwe mwicheto lon Mispa, nge ngang üpwe iotek ngeni ewe Samol mi Lapalap fän itemi.” 6 Iei mine ra mwichfengen lon Mispa. Iwe, ra üfi koluk o ninätiu me mwen ewe Samol mi Lapalap, ra pwal echikefel lon ewe ränin o pwärätä, “Äm aia tipis ngeni ewe Samol mi Lapalap.” Iwe, Samuel a soukapwüngün Israel lon Mispa. 7 Nge lupwen ekewe chon Filistia ra rongorong pwe ekewe aramasen Israel ra mwichefengen lon Mispa, ekewe samolun chon Filistia fiti nöür sounfiu ra feito pwe repwe maun ngeni chon Israel. Lupwen ekewe aramasen Israel ra rongorong usun, ra niuokusiti ekewe chon Filistia. 8 Iwe, ra üreni Samuel, “Kosap ükütiu le siö ngeni ewe Samol mi Lapalap ach we Kot fän item, pwe i epwe amanauakem seni fän nemenien ekewe chon Filistia.” 9 Mürin, Samuel a angei eman lam mi chüen ün oupw o eäni asoren kek mi unus ngeni ewe Samol mi Lapalap. Iwe, Samuel a siö ngeni ewe Samol mi Lapalap fän iten chon Israel, nge ewe Samol mi Lapalap a aüselinga. 10 Lupwen Samuel a eäni ewe asoren kek, ekewe chon Filistia ra kaneto pwe repwe maun ngeni chon Israel. Nge ewe Samol mi Lapalap a apüngü chopulap mi leüömong ngeni ekewe chon Filistia lon ewe ränin, pwe ra rukorukfengen o kuf me mwen ekewe chon Israel. 11 Nge ekewe chon Israel ra towu seni Mispa, ra tapweri ekewe chon Filistia o nirela lepekin al tori fän Pet-kar.

12 Mürin, Samuel a eki eföü fau o aüetä lefilen Mispa me Jesana. Iwe, a aita ngeni Epineser *wewen Epineser föün alilis, pun a apasa, “Tori iei ewe Samol mi Lapalap a alisikich.” 13 Iei usun ekewe chon Filistia ra kuf, nge resap chüen tolong lon fanüen chon Israel. Iwe, ewe Samol mi Lapalap a ü ngeni ekewe chon Filistia lon unusen ränin manauen Samuel. 14 Iwe, ekewe chon Filistia ra aliwini ngeni chon Israel ekewe telinimw ra liapeni seniir lefilen Ekron me Kat. Iei usun ekewe chon Israel ra angeesefäli fanüer mi nom fän nemenien ekewe chon Filistia. A pwal wor kinamwe lefilen chon Israel me chon Amor.

15 Iwe, Samuel a soukapwüng lon Israel lon ükükün ränin manauan meinisin. 16 Iteiten ier a feila Petel, Kilkal me Mispa o eäni kapwüng ngeni chon Israel lon ekei leni meinisin. 17 Mürin, Samuel a liwiniti imwan lon Rama. Ikenan a pwal eäni kapwüng ngeni chon Israel. Iwe, a senätä eu rongen asor ngeni ewe Samol mi Lapalap lon Rama.