1 Iwe, lupwen Samuel a chinlapala, a awisa nöün kewe mwän pwe repwe soukapwüng lon Israel. 2 Iten nöün we mwänichi Joel, nge iten ewe kükün Apia. Iwe, ra soukapwüng lon Persepa. 3 Nge nöün kewe mwän resap manaueni manauen semer, pwe ra chök kütta ar win, ra pwal angei lifangen amichimich o sorei pwüngün kapwüng.

4 Mürin, ekewe souakomwen chon Israel meinisin ra chufengen o feito ren Samuel lon Rama. 5 Iwe, ra üreni, “Nengeni, en ka chinlap, nge noum kewe mwän resap manaueni manauom. Iei mine kopwe filätä eman ach king epwe nemenikich, usun chök ekewe mwü meinisin. ✡Tut 17.14 6 Nge Samuel esap pwapwa ngeni ei tüngor, pwe i epwe filätä eman ar king pwe epwe nemeniir. Iwe, Samuel a iotek ngeni ewe Samol mi Lapalap. 7 Nge ewe Samol mi Lapalap a üreni Samuel, “Kopwe aüselinga alon ekewe aramas lon meinisin mine ra ürenuk. Pun resap pöütukela, nge ra pöütieila pwe üsap nöür king. 8 Usun ekewe föför meinisin ra föri ngeniei seni ewe rän üa emwenirewu seni Isip tori ikenai, pwe ra likitieila o angang ngeni pwal ekoch kot, iei usun ra pwal föri ngonuk. 9 Iei mine kopwe aüselinga alor. Nge eu chök, kopwe fokun fönöör o aiti ngeniir usun pwüngün wisen ewe king epwe nemeniir.”

10 Iei mine Samuel a apworausa än ewe Samol mi Lapalap kewe kapas meinisin ngeni ekewe aramas mi tüngor seni eman king. 11 Iwe, Samuel a apasa, “Iei usun pwüngün wisen ewe king epwe nemenikemi: Epwe angei nöümi kewe mwän o awiseer pwe repwe uwei wan kewe woken, repwe pwal nöün chon wawa oris o sä me mwen wan woken. 12 Epwe filätä ekoch pwe repwe meilapen sounfiu won ngeröü, pwal ekoch won lime. Ekoch repwe wisen tuw pwülün fanüan o kini uän an räs, nge ekoch repwe wisen föri an pisekin maun me pisekin wan woken. 13 Epwe angei nöümi kewe fefin pwe repwe chon för lö, chon kuk me chon um pilawa. 14 Epwe angei senikemi öchün ämi kewe tanipi, ämi tanipin wain me tanipin olif, o ngeni nöün kewe nöüwis. 15 Epwe pwal angei eu leengolun föün fotämi wiich me wain o ngeni nöün kewe meilap me nöün kewe nöüwis. 16 Epwe angei nöümi chon angang mwän me chon angang fefin, pwal öchün lein nöümi kow me aas, pwe repwe angang ngeni. 17 Epwe angei eu leengol seni nöümi pwiin sip, epwe pwal nöünikemi amanau. 18 Lon ena fansoun oupwe fokun siö pokiten ämi king, oua püsin filätä fän itemi, nge ewe Samol mi Lapalap esap aüselingakemi.”

19 Iwe, ekewe aramas resap fokun mochen aüselinga alon Samuel. Ra apasa, “Apwi, äm aia mochen pwe epwe wor eman äm king. 20 Mürin aipwe usun chök ekewe mwü meinisin. Epwe wor äm king epwe nemenikem, epwe akom mwem o eäni äm maun.” 21 Iwe, Samuel a rongorong än ekewe aramas kapas meinisin, mürin a asilesefäli ngeni ewe Samol mi Lapalap. 22 Nge ewe Samol mi Lapalap a üreni Samuel, “Kopwe aüselinga alor o filätä eman ar king.” Mürin Samuel a üreni ekewe re Israel pwe repwe liwinla lon en me an telinimw.