9
Saul a kefilitä pwe epwe king
9.1–10.27
Mi wor eman mwän mi pisekisek lon ewe fanü Peniamin itan Kis, i nöün Apiel we mwän, nge Apiel nöün Seror, Seror nöün Pekorat, nge Pekorat nöün Afia seni ewe ainangen Peniamin. Iwe, a wor eman mwän itan Saul, i eman alüal mi äteöch. Esap wor eman mwän me lein ekewe aramasen Israel mi äteöch seni, a pwal langatam seni aramas meinisin seni afaran tori ulungen möküran.
Iwe, a fis pwe ekoch nöün Kis kewe aas ra mwälechela. Iei mine Kis a üreni Saul nöün we, “Kopwe angei eman lein ekewe chon angang pwe epwe etuk le feila kütta ekewe aas.” Iei mine ra feila lemenen chukuchukutän ewe fanü Efraim, pwal lemenen ewe fanü Salisa, nge resap küneer. Ra pwal feila lemenen ewe fanü Saalim, nge resap pwal nom ikenan. Mürin, ra feila lemenen ewe fanü Peniamin, nge resap küneer.
Iwe, lupwen ra tori ewe fanü Suf, Saul a üreni nöün we chon angang, “Sipwe le liwinla, pun semei epwe ükütiu le ekieki ekewe aas, nge ina epwe le aürekikich.” Nge ewe chon angang a üreni Saul, “Nengeni, mi wor eman soufos lon ei telinimw, i eman mwän mi iteföüla. Meinisin mine a apasa a fisitä. Sipwe le feila ren. Eli a tongeni pwäri ngenikich ia sipwe tongeni küna ekewe aas me ie. Mürin, Saul a üreni nöün we chon angang, “Nge are sipwe feila, met sipwe uwala ren ewe mwän? Pun anach mongö lon ach tuk a it, nge esap wor eu lifang sipwe uwala ren ewe soufos. Iwe, met echök sipwe ngeni?” Nge ewe chon angang a üreni Saul, “Iei mi wor rei eföü kükün föün moni silifer. Üpwe ngeni ewe soufos pwe epwe pwäri ngenikich ia sipwe küt ie.” Lon Israel me lom, lupwen eman aramas a feila pwe epwe aisini Kot och kapas ais, epwe apasa, “Ousipwe feila ren ewe souwo.” Pun ätewe mi iteni soufos ikenai a iteni souwo me lom. 10 Iwe, Saul a üreni nöün we chon angang, “A öch mine ka apasa. Sipwe feila ren.” Iei mine ra feila lon ewe telinimw ia ewe soufos a nom ie.
11 Iwe, lupwen ra feitä won ewe chukutekison o feila ngeni ewe telinimw, ra churi ekoch föpwül mi towu seni ewe telinimw pwe repwe üfüf koluk. Ra aisiniir, “Ifa usun, a nom ewe soufos lon enan telinimw?” 12 Nge ra pälüeni, “Ewer, a nom. A chök akomwola mwemi. Oupwe müttirila mürin. Iei ekärän chök tolong lon ewe telinimw, pun ekewe aramas repwe eäni ar asor ikenai won ewe lenien fel won ewe chuk. 13 Lon ewe otun oupwe tolong lon ewe telinimw, oupwe küna mwen än epwe feitä ren ewe lenien fel pwe epwe mongö. Pun ekewe aramas resap mongö tori epwe war, pokiten i epwe afeiöchü ewe asor. Mürin, chokewe mi kökköto repwe mongö. Oupwe müttir feitä, pun oupwe churi iei chök.” 14 Iei mine ra feitä ren ewe telinimw. Nge lupwen ra tolong lon, ra küna Samuel won ewe al pwe epwe towu o feitä ren ewe lenien fel won ewe leni tekia.
15 Iwe, ewe rän me mwen än Saul feito, ewe Samol mi Lapalap a fen pwäri ngeni Samuel, 16 “Lesor lon ei chök otun üpwe tinala reöm eman mwän seni ewe fanü Peniamin, ätewe kopwe epiti pwe epwe samol won nei kewe aramasen Israel. Epwe amanaua nei aramas seni ekewe chon Filistia. Pun üa küna ar riaföü, nge ar siö a toriei.” 17 Nge lupwen Samuel a küna Saul, ewe Samol mi Lapalap a üreni, “Ina i ewe mwän üa kapas ngonuk usun. Iei i ätewe epwe nemenem won nei aramas.” 18 Mürin, Saul a kan ngeni Samuel lon asamalapen ewe telinimw o üreni, “Kose mochen aiti ngeniei ia imwen ewe soufos a nom ie.” 19 Nge Samuel a üreni Saul, “Ngang ewe soufos. Kopwe akomwotä mwei ren ewe lenien fel, pun ikenai kopwe etiei le mongö. Nge lesosorun lesor üpwe pwäri ngonuk mine a nom lon lelukom o afeilook. 20 Nge noum kewe aas mi mwälechela ülüngat rän a la kosap chüen ekieki usur, pun ra pwä. Ifa usun, än chon Israel mochen a weneiti iö? Sap ämi me chon leimwen semom meinisin?” 21 Iwe, Saul a aisini, “Ifa usun, sap ngang eman chon Peniamin seni ewe ainang mi chokükün me lein ekewe ainangen Israel? Ifa usun, ai famili sap eu famili mi tekison seni ekewe familien ainangen Peniamin? Pwota ka fos iei usun ngeniei?”
22 Mürin, Samuel a emwenala Saul me nöün we chon angang lon ewe lenien mwich o amoteer me mwen chokewe mi kö ina epwe ükükün ilik aramas. 23 Iwe, Samuel a üreni ewe chon kuk, “Kopwe uwato ewe kinikinin fituk üa ngonuk me mwan o ürenuk pwe kopwe aimwüela.” 24 Iei mine ewe chon kuk a angei pechen ewe mönün asor me mine a pach ngeni o iseni mwen Saul. Nge Samuel a üreni, “Nengeni, iei ewe kinikin a imwüla fän itom. Kopwe mongö, pun a imwüla fän itom tori ei fansoun mi kefilitä pwe kopwe eti ekewe chon kö le mongö.” Iei mine Saul a eti Samuel le mongö lon ewe ränin.
25 Iwe, lupwen ra feitiu seni ewe lenien fel o tolong lon ewe telinimw, eu peet a molotä won eu imw fän iten Saul, Iwe, a konola o annut. 26 Nge ünümweerän Samuel a kökkötä ren Saul won ewe imw, “Kopwe pwätä pwe üpwe tinukela won om al.” Iwe, Saul a pwätä, nge i me Samuel ra feila won ewe al.
27 Iwe, lupwen ra tori lesopolan ewe telinimw, Samuel a üreni Saul, “Kopwe üreni ewe chon angang pwe epwe akomwola mwach. Nge lupwen a feila, en kopwe üla ekis fansoun pwe üpwe asile ngonuk än Kot kapas.”