1 Iwe, ekewe chon Filistia ra amwichafengeni ar mwichen sounfiu pwe repwe maun. Ra achufengeniir lon Soko, eu telinimwen Juta, o nonom lon Efes-tamim lefilen Soko me Aseka. 2 Nge Saul me ekewe re Israel ra pwal mwichefengen o nom lon ewe lemolun Ela. Ikenan ra atettel lon tettelir pwe repwe maun ngeni ekewe re Filistia. 3 Ekewe re Filistia ra nom won eu chuk me epek, nge ekewe re Israel ra nom won eu chuk me pwal epek, nge eu lemol a nom lefiler. 4 Iwe, a towu eman mwän mi pwora seni lenien sounfiun Filistia itan Koliat seni Kat, ükükün langataman tiu fiit. 5 A imweimw eu akau seni piras, a pwal üföüf echö sekit, choun ina epwe ükükün ipükü rüe me limu paun piras. 6 A wor chechen pechen seni piras, nge efoch kükün siles seni piras a nom won sökürün. 7 Amwüchün wokun siles a oumong usun chök öün efoch öüün waaseres, nge choun ewe mas mi nom mesen wokun siles ina epwe ükükün engol me limu paun mächä. Iwe, nöün chon uwei an tittin maun a akom mwan. 8 Koliat a ütä o puchörüla ren ekewe re Israel o apasa, “Pwota oua feito o atettelikemi pwe oupwe maun? Ifa usun, sap ngang eman re Filistia, nge ämi nöün Saul amanau? Oupwe filätä eman mwän fän itemi, epwe feito rei o fiu ngeniei. 9 Are a akufuei o nieila, äm aipwe nöümi amanau. Nge are ngang üa akufu o niela, ämi oupwe nöüm amanau.” 10 Mürin, ewe re Filistia a üra, “Üpwe apälüa ekewe re Israel ikenai, oupwe tinato rei eman mwän pwe aipwe fiu.” 11 Lupwen Saul me ekewe re Israel meinisin ra rongorong än ewe re Filistia kei kapas, ra rükö o fokun niuokus.

12 Iwe, Tafit nöün Jesi eman re Efrat seni Petleem lon Juta. Jesi a wor waluman nöün mwän. Lon fansoun mwün Saul, ewe mwän a fen chinlap o ieritam. 13 Iwe, nöün Jesi kewe ülüman mwän mi watte ra eti Saul le maun. Ewe mwänichi itan Eliap tapweto Apinatap, nge ewe aülümanün Sama. 14 Nge Tafit ewe setiputur. Iwe, lupwen ekewe ülüman mi watte ra eti Saul, 15 Tafit a akaliwin lefilen ewe leni ia Saul a nom ie me Petleem, pwe epwe tümwünü nöün saman sip. 16 Iwe, lon ükükün faik rän ewe re Filistia a pwäto, a ütä iteiten lesosor me lekuniol o witi iö epwe fiu ngeni.

17 Lon eu rän Jesi a üreni Tafit nöün we mwän, “Kopwe angei ilik paun föün wiich mi tün me ekei engol fochun pilawa fän iten pwiüm kewe o müttir uweerela ngeni ewe ia ra nom ie. 18 Kopwe pwal angei ekei engol chiis o uweerela ren ewe meilapen sounfiu. Kopwe pii usun pwiüm kewe o uwato och pisekin pwärätä seniir.”

19 Lon ei fansoun ewe king Saul me pwin Tafit kewe, pwal ekewe re Israel ra nom lon ewe lemolun Ela pwe repwe maun ngeni ekewe re Filistia. 20 Iwe, Tafit a pwätä lesosorusich o likitala ekewe sip ren eman chon tümwün, a angei ekewe mongö o feila, usun Jesi a allük ngeni. A tori ewe lenien sounfiu, lupwen ekewe sounfiun Israel ra towu lon ewe wirasen maun fän ar akarükaken maun. 21 Iwe, ekewe re Israel me ekewe re Filistia ra tötöfengen pwe repwe maun, eu mwichen sounfiu me pwal eu ra awesewesfengen. 22 Nge Tafit a likiti ekewe mongö ngeni ewe chon tümwünü pisek, a säla ren ewe mwichen sounfiu o kapong ngeni pwin kewe. 23 Lupwen a chüen kapas ngeniir, Koliat ewe mwän mi pwora eman re Filistia seni Kat a towu seni ewe mwichen sounfiun Filistia o üra ekewe kapas usun chök me mwan. Iwe, Tafit a rongorong an kewe kapas.

24 Nge lupwen ekewe re Israel ra küna ewe mwän, meinisin ra sü seni, pun ra fokun niuokus. 25 Iwe, ekewe re Israel ra kapasfengen lefiler, “Oua küna ei mwän mi feito? Ellet a feito pwe epwe apälüa Israel. Iö mi niela ätei, ewe king epwe lifang ngeni pisek mi chomong, epwe pwal apwüpwülüa ngeni nöün fefin o angasala chon leimwen saman seni takises me lon Israel.” 26 Tafit a aisini ekewe mwän mi nom ünükün, “Met epwe fis ngeni ewe mwän mi niela ei re Filistia o uwei seni Israel ewe itengau? Pun iö ei re Filistia esap sirkomsais, pwe epwe apälüa ewe mwichen sounfiu nöün ewe Kot mi manau?” 27 Iwe, ekewe aramas ra pälüeni lon ewe chök pälüen, “Iei usun epwe fis ngeni ewe mwän mi niela ätenan.”

28 Nge Eliap pwin Tafit watte a rong mine Tafit a eäni kapas ngeni ekewe mwän. Iwe, Eliap a fokun song ngeni Tafit o üreni, “Pwota ka feito ikei? Iö ka likiti ngeni ekewe ekoch sip lon ewe fanüapö? Üa silei om lamalamtekia me ekiekingauen lelukom. Pun ka chök feito pwe kopwe katol ewe maun.” 29 Iwe, Tafit a ais, “Meta üa föri iei? Üsap mwo nge ais och?” 30 Mürin, a kul seni pwin we o kul ngeni pwal eman. Iwe, a pwal fos ngeni lon ewe chök ititin, nge ekewe aramas ra pälüeni usun chök mesemwan.

31 Iwe, ekoch ekewe re Israel ra rongorong mine Tafit a apasa o apworausa ngeni Saul. Mürin, Saul a titi Tafit. 32 Tafit a üreni Saul, “Ai king, esap wor eman epwe niueiti ei re Filistia. Pun ngang noum ei chon angang üpwe feila o fiu ngeni.” 33 Nge Saul a üreni Tafit, “En kosap pwäk le feila fiu ngeni ewe re Filistia, pun en eman chök alüalät, nge i eman soumaun seni lealüalün.” 34 Tafit a üreni Saul, “Ngang noum ei chon angang üa wisen tümwünü sip fän iten semei. Iwe, lupwen a feito eman laion ika eman pear o turufi eman nienifön sip seni ewe pwiin sip, 35 üa tapweri, üa fiu ngeni o amanaua ewe man seni leawan. Nge lupwen ewe manmwacho a ü ngeniei, üa turufi ölüsan, üa fiu ngeni o niela. 36 Ngang noum ei chon angang üa fen kakawet laion me pear. Iwe, ei re Filistia esap sirkomsais epwe usun chök ekewe manmwacho, pun a apälüa ewe mwichen sounfiu nöün ewe Kot mi manau. 37 Ewe Samol mi Lapalap mi amanauaei seni ewe laion me ewe pear epwe pwal amanauaei seni ei re Filistia.” Saul a üreni Tafit, “Kole feila, ewe Samol mi Lapalap epwe etuk.” 38 Mürin, Saul a aüföüfa Tafit ngeni üfan üföüfen maun. A eimweimwa ngeni eu akau mi för seni piras o aüföüfa ngeni echö sekit mächä. 39 Iwe, Tafit a pwal rietä nöün Saul ketilas won üfan o sotuni le fetal, nge esap tongeni, pun esap örüniir. Mürin, Tafit a üreni Saul, “Üsap tongeni fetal fän ekei pisek.” Iei mine Tafit a pwilitätiu ekei üf. 40 Mürin a angei wokun, a fili limeföü fau mi motoutou seni ewe öüwö o isenirelong lon an pwotou. Iwe, a feila o kan ngeni ewe re Filistia fän nöün öülül.

41 Iwe, ewe re Filistia a pwal feito o kan ngeni Tafit, nge nöün chon uwei an tittin maun a akom mwan. 42 Nge lupwen a nenengeni Tafit, a küna pwe Tafit a chüen eman alüalät, a woparapar o äteöch. 43 Iwe, a turunufasei. A üreni Tafit, “Ifa usun, ngang eman kolak pwe ka feito rei fän wok?” Iwe, a otteki ngeni Tafit iten an kewe kot. 44 A üreni Tafit, “Kopwe feito rei, ngang üpwe aochocha ngeni ekewe machang me ekewe manmwacho fitukom.” 45 Mürin, Tafit a üreni ewe re Filistia, “En ka feito rei fän efoch ketilas, efoch fisika me efoch siles. Nge ngang üa feila reöm fän iten ewe Samol mi Unusen Manaman, ewe Kot än ewe mwichen sounfiun Israel en ka apälüa. 46 Ikenai ewe Samol mi Lapalap epwe atolongok lepei, nge ngang üpwe niikela o pöküela üom. Üpwe pwal ngeni ekewe machang me ekewe manmwacho somän ekewe sounfiun Filisita. Mürin, aramasen fanüfan meinisin repwe silei pwe mi wor eman Kot lon Israel. 47 Nge chokei meinisin mi nom ikei repwe silei pwe ewe Samol mi Lapalap a amanaua nöün aramas sap ren ketilas me siles. Pun ewe maun än ewe Samol mi Lapalap, nge i epwe atolongakemi meinisin fän nemeniem.”

48 Iwe, lupwen ewe re Filistia a kaneto pwe epwe fiu ngeni Tafit, Tafit a müttir sä ngeni ewe wirasen maun pwe epwe fiu ngeni. 49 Iwe, Tafit a rölong lon an we pwotou, a angei eföü fau o anomu lon an we öülül. Mürin a nouti ewe fau o küw won eten mesen Koliat. Iwe, ewe fau a kokolong lon eten mesan pwe a turula o chapala won pwül.

50 Iei usun Tafit a akufu o niela Koliat ren eu öülün me eföü fau, nge sap ren ketilas. ✡2.Sam 21.19 51 Mürin, Tafit a säla o ütä won Koliat. A üttawu nöün Koliat we ketilas me lon sittan o pöküela üan. Iwe, lupwen ekewe re Filistia ra küna pwe nöür soumaun a mäla, ra sü. ✡1.Sam 21.9 52 Nge ekewe re Israel me re Juta ra ütä fän arükak o tapweri ekewe re Filistia tori Kat pwal tori asamalapen ewe telinimw Ekron. Iwe, ekewe re Filistia mi kinas ra turula o mäla won ewe al ngeni Sa-araim, pwal ngeni Kat me Ekron. 53 Lupwen ekewe re Israel ra liwinto seni ar tapweri ekewe re Filistia, ra angei ekewe pisek mi nom lon ewe lenien sounfiun Filistia. 54 Nge Tafit a angei möküren Koliat o uwala Jerusalem, nge än Koliat kewe pisekin maun a uwala lon imwan.

55 Iwe, lupwen Saul a küna pwe Tafit a feila pwe epwe fiu ngeni ewe re Filistia, a aisini Apner ewe chon nemeni ewe mwichen sounfiu, “Apner, nöün iö ewe alüalät?” Nge Apner a pälüeni, “Mwo manauom ai king, üsap silei.” 56 Ewe king a apasa, “Kopwe aisfetal ika nöün iö ewe alüal.” 57 Lupwen Tafit a liwinto seni an niela Koliat, Apner a emwenala ren Saul, nge möküren Koliat a chüen nom lepöün. 58 Iwe, Saul a aisini, “En nöün iö?” Nge Tafit a pälüeni, “Ngang nöün noum chon angang Jesi ewe re Petleem.”