1 Iwe, lupwen Tafit a wes me kapas ngeni Saul, Jonatan nöün Saul we a pwipwi ngeni Tafit seni lon letipan o echeni usun an püsin echeni. 2 Lon ewe ränin Saul a angei Tafit pwe epwe nom ren, nge esap chüen mochen mwüt ngeni pwe epwe liwiniti imwen saman. 3 Mürin, Jonatan a eäni eu pwon ngeni Tafit pwe repwe pwipwifengen tori feilfeilachök, pun a echeni usun an echeni püsin manauan. 4 Jonatan a pwilitawu üfan a üföüf o ngeni Tafit, a pwal ngeni üfan üfen maun, pwal mwo nge nöün ketilas, nöün likapich me an pelit. 5 Iwe, a fisiöch än Tafit angang ekis meinisin ia Saul a tinala ie. Iei mine Saul a seikätä pwe epwe eman chon nemeni sounfiu. Ei akot ekewe aramas me nöün Saul kewe meilapen sounfiu ra fokun tipeeu ngeni.

6 Lupwen ekewe sounfiu ra liwiniti lenier mürin än Tafit niela Koliat, ekewe fefin ra towu seni ekewe telinimwen Israel meinisin pwe repwe churi ewe king Saul. Ra köl fän pwapwa o pworuk fän pisekin kaktai me pisekin ettik. 7 Iwe, lupwen ekewe fefin ra pworuk, ra eäni lon ar köl, “Saul a niela ngeröü, nge Tafit a niela lap seni engol ngeröü.” ✡1.Sam 21.11; 29.5 8 Mürin, Saul a fokun song, pun a oput ekei kapas. Iwe, a apasa, “Ra ngeni Tafit lap seni engol ngeröü, nge ngang ra ngeniei ngeröü. Met chüen mangen an epwe nemeni ewe mwü?” 9 Iwe, Saul a meselolowo ngeni Tafit seni lon ewe ränin feila.

10 Nge sorotän ewe rän, eman ngün mi afeiengau seni Kot a feitiu won Saul pwe a arochorochfeil lon imwan. Lon ei otun Tafit a ettiki ewe kitar, usun a föri iteiten rän, nge Saul a amwöchü efoch siles lepöün. 11 Iwe, Saul a posu ngeni Tafit ewe siles, pun a ekiekin apwera ngeni ewe tit. Nge Tafit a mär seni fän ruu.

12 Iwe, Saul a niuokusiti Tafit, pun ewe Samol mi Lapalap a eti Tafit, nge a likitala i. 13 Iei mine Saul a tinala Tafit seni fän mesan o seikätä pwe epwe meilapen engeröü sounfiu. Iwe, Tafit a emweni ekewe mwän le maun. 14 Iwe, a fisiöch än Tafit angang meinisin, pun ewe Samol mi Lapalap a eti. 15 Nge lupwen Saul a küna pwe än Tafit angang a fisiöch, a lapala an niuokusiti. 16 Nge ekewe chon Israel me chon Juta meinisin ra tongei Tafit, pun i a fokun emwenöchüür le maun.

17 Mürin, Saul a üreni Tafit, “Iei i nei finichi Merap, üpwe ngonuk pwe pwülüom. Nge kopwe chök angang ngeniei fän pwora o eäni än ewe Samol mi Lapalap maun.” Pun Saul a ekieki, “Ekewe chon Filistia repwe niela Tafit, nge sap ngang.” 18 Nge Tafit a üreni Saul, “Ngang iö, nge iön aramasei me familien semei me lon Israel pwe üpwe pwülüeni nöün king?” 19 Nge lupwen a tori fansoun pwe Merap nöün Saul we föpwül epwe le itä pwülüeni Tafit, Saul a apwüpwülüa ngeni Atriel ewe re Mehola.

20 Iwe, Mikal nöün Saul we föpwül a efich Tafit. Iwe, lupwen ra asile ngeni Saul ei pworaus, a fokun sani. 21 Pun Saul a ekieki, “Üpwe apwüpwülüa Mikal ngeni Tafit, pwe epwe eu lenien likatup ngeni, nge ekewe chon Filistia repwe niela.” Iei mine Saul a üreni Tafit fän aruuan, “Iei üpwe apwüpwülüa ngonuk nei.” 22 Mürin, Saul a allük ngeni nöün kewe chon angang, pwe repwe kapas ngeni Tafit le monomon o üra, “Ewe king a fokun sanuk, pwal nöün kewe nöüwis meinisin ra echenuk. Iei a tori otun om kopwe pwülüeni nöün ewe king.” 23 Iwe, nöün Saul kewe chon angang ra apworausa ekei kapas ngeni Tafit. Nge Tafit a üra, “Ifa usun, oua ekieki pwe a mecheres ngeniei ai üpwe pwülüeni nöün ewe king? Ngang eman aramas mi wöüngau, esap pwal wor itei.” 24 Iwe, nöün Saul kewe chon angang ra asile ngeni Saul mine Tafit a apasa. 25 Mürin, Saul a üreniir pwe repwe asile ngeni Tafit, “Ewe king esap mochen och kiis, chilon chök ipükü ünüchen ewe kükün inis seni ekewe chon Filistia, pwe epwe ngeni chon oputan chappen ar föför.” Iei usun Saul a ekieki pwe ekewe chon Filistia repwe niela Tafit. 26 Nge lupwen nöün Saul kewe chon angang ra üreni Tafit ekei kapas, Tafit a pwapwaiti pwe epwe pwülüeni nöün ewe king föpwül. Iwe, mwen an epwe müch ewe fansoun mi kaüküla, 27 Tafit me nöün sounfiu ra feila o niela rüepükü re Filistia. Iwe, a uwato ünüchen kükün inisir o aleaniretiu ngeni ewe king, pwe epwe tongeni pwülüeni nöün. Mürin Saul a ngeni Tafit nöün föpwül Mikal pwe pwülüan. 28 Lupwen Saul a küna o mefi pwe ewe Samol mi Lapalap a eti Tafit, nge Mikal nöün föpwül a pwal tongei, 29 a lapala an niuokusiti Tafit. Iei mine Saul a oput Tafit lon ränin manauan meinisin.

30 Iwe, iteiten fansoun, lupwen ekewe samolun Filistia ra feito pwe repwe maun, Tafit a angangöch le maun lap seni nöün Saul kewe meilapen sounfiu. Iei mine Tafit a fokun iteföüla.