1 Iwe, Saul a kapas ngeni Jonatan nöün we mwän, pwal ngeni nöün kewe chon angang meinisin, pwe repwe niela Tafit. Nge Jonatan nöün we mwän a fokun tongei Tafit. 2 Iei mine a üreni Tafit, “Saul semei we a anennok pwe epwe niik. Kopwe afäluk lesosorun lesor, kopwe nom lon eu leni mi monomon o op. 3 Nge ngang üpwe feila o ütä ünükün semei lon ewe mälämäl, ia en ka op ie. Üpwe kapas ngeni semei usum, nge are üa silei och, üpwe asile ngonuk.” 4 Iwe, Jonatan a kapasöch usun Tafit ngeni Saul saman we o üreni, “Ai king, kosap tipis ngeni noum chon angang Tafit, pun i esap tipis ngonuk, nge an föför a fen öch ngonuk. 5 Pun a fangala manauan, lupwen a niela Koliat, nge ewe Samol mi Lapalap a afisi eu win mi lapalap fän iten chon Israel meinisin. En ka küna o fokun pwapwa ren. Pwota ka mochen tipis ngeni Tafit, eman mwän esap wor an tipis, ren om ekiekin niela, nge esap wor popun?” 6 Iwe, Saul a aüselinga alon Jonatan o pwon fän akapel, “Mwo manauen ewe Samol mi Lapalap, Tafit esap ninnila.” 7 Iei mine Jonatan a kökköri Tafit o pwäri ngeni ekei pworaus meinisin. Mürin, a emwenala Tafit ren Saul pwe a angang ngeni usun me mwan.

8 Iwe, a pwal fisisefäl maun. Nge Tafit a feila maun ngeni ekewe chon Filistia o fokun akufuur, pwe ra sü me mwan. 9 Lon eu rän eman ngün mi afeiengau seni ewe Samol mi Lapalap a feitiu won Saul, lupwen a mot lon imwan o amwöchü wokun siles lepöün. Nge Tafit a ettiki ewe kitar. 10 Iwe, Saul a angei wokun siles o ekiekin apwera Tafit ngeni ewe etiip. Nge Tafit a müttir olu wokun Saul we, pwe a chök küw ewe etiip. Iwe, Tafit a süla seni Saul.

11 Lon ewe pwinin Saul a tinala chon künö ren imwen Tafit pwe repwe aköürü Tafit, pun a ekiekin niela Tafit lon ewe sorotän. Nge Mikal pwülüen Tafit a üreni, “Are kosap kütta manauom lon ei pwinin, lesor kopwe ninnila.” ✡ Kölf 59 12 Iei mine Mikal a aürätiu Tafit me lon eu asamwacho. Iwe, Tafit a süla. 13 Mürin, Mikal a angei eu uluulun anün leimw o akonala won ewe peet, a anomu eu mangaku seni ülöülen kuuch won möküran o pwölüela fän echö chenikam. 14 Lupwen Saul a tinala ekewe chon künö pwe repwe angei Tafit, Mikal a apasa, “Tafit a samau.” 15 Nge Saul a tinsefälila ekewe chon künö pwe repwe püsin nenengeni Tafit o üreniir, “Oupwe ekieto rei Tafit won an peet pwe üpwe niela.” 16 Nge lupwen ekewe chon künö ra tolong lon ewe imw, ra küna pwe eu uluulun anün leimw a nom won ewe peet, nge eu mangaku seni ülöülen kuuch a nom won möküran. 17 Saul a aisini Mikal, “Pwota ka atupuei o mwüt ngeni ewe chon oputaei pwe a sü seniei?” Nge Mikal a pälüeni, “A üreniei pwe epwe nieila, are üsap mwüt ngeni pwe epwe sü.”

18 Iwe, Tafit a süla o sü ngeni Samuel lon Rama. A apworausa ngeni meinisin mine Saul a föri ngeni. Mürin, ir me Samuel ra feila o nom lon Naiot. 19 Iwe, a wor eman a asile ngeni Saul pwe Tafit a nom Naiot lon Rama. 20 Mürin, Saul a tinala chon künö pwe repwe turufi Tafit. Iwe, lupwen ra küna ewe mwichen soufos pwe ra osuni, nge Samuel a akom mwer, Ngünün Kot a feitiu won nöün Saul kewe chon künö pwe ra pwal osuni. 21 Lupwen ei pworaus a tori Saul, a pwal tinala eu mwichen chon künö, nge ir ra pwal osuni. Mürin, Saul a tinala chon künö fän aülüngatin, nge ir ra pwal osuni. 22 Mürin, püsin i a feila Rama o tori ewe chönüttu mi watte lon Seku. Iwe, a ais, “Ia Samuel me Tafit ra nom ie?” Eman a üra pwe ra nom Naiot lon Rama. 23 Iei mine Saul a feila ngeni Naiot lon Rama. Nge Ngünün Kot a pwal feitiu won Saul, pwe lupwen an fetal a osuni tori a tori Naiot.

24 Iwe, Saul a pwal pwilitala üfan, a pwal osuni me fän mesen Samuel o kon fän üfan üföüfen lon lon unusen ewe rän me lon unusen ewe pwin. Iei mine a fis ewe kapas, “Ifa usun, Saul a pwal eman lein ekewe soufos?” ✡ 1.Sam 10.11-12