1 Iwe, lupwen Saul a liwinto seni an tapweri ekewe chon Filistia, eman a üreni, “Tafit a nom lon ewe fanüapön Engeti.” 2 Mürin, Saul a angei ülüngeröü mwän mi sipeöch le maun seni lon unusen Israel o feila pwe epwe kütta Tafit me nöün kewe aramas arap ngeni ekewe Achauen Kuuch mi mwacho. 3 Iwe, a tori ekewe lenien sip mi nom lepekin al, ia a wor ie eu föimw. Saul a tolong lon ewe föimw pwe epwe ngasala, nge Tafit me nöün kewe mwän ra mot epichikin ewe föimw. ✡Kölf 57; 142 4 Iwe, nöün Tafit kewe aramas ra üreni, “Iei ewe rän ewe Samol mi Lapalap a kapas ngonuk usun, pwe epwe atolonga chon oputom fän nemenemom, nge en kopwe föri ngeni mine a öch me reöm.” Mürin, Tafit a anifa Saul o pökü lepwülün üfan owokot, nge Saul esap mefi. 5 Nge mürin, Tafit a mengiringir lon lelukan, pokiten a pökü lepwülün üfen Saul. 6 Iwe, a üreni nöün kewe aramas, “Ewe Samol mi Lapalap epwe epeti ai üpwe afeiengaua ai samol pwe üpwe angetä won, pun i ewe mi kepit me ren ewe Samol mi Lapalap.” ✡1.Sam 26.11 7 Iei usun Tafit a fönöü nöün kewe aramas ren ekei kapas, nge esap mwüt ngeniir pwe repwe niela Saul. Iwe, Saul a ütä, a towu seni ewe föimw o feila won alan.

8 Mürin, Tafit a pwal ütä, a towu seni ewe föimw o kökköla mürin Saul, “Ai samol me ai king.” Nge lupwen Saul a nennesökür, Tafit a chapetiu lepwül o asamolu. 9 Iwe, Tafit a üreni Saul, “Pwota ka aüselinga alon ekewe aramas mi apasa pwe Tafit a ekiekin afeiengauok? 10 Ikenai ka püsin küna pwe ewe Samol mi Lapalap a atolongok fän nemeniei me lon ewe föimw. Ekoch nei kewe aramas ra peseei pwe üpwe niikela, nge ngang üa achikok. Üa üreniir pwe üsap angetä womw, en ai samol, pun en ewe mi kepit me ren ewe Samol mi Lapalap.’ 11 Nengeni, semei, ka küna lepwülün üfom owokot me lepei. Üa pökü lepwülün üfom owokot, nge üsap niikela. Iei kopwe mefi o silei pwe esap wor och ai ekiek mi ngau ika rawangau ngonuk. Ngang üsap tipis ngonuk, nge en ka fen elliapaei pwe kopwe nieila. 12 Amwo ewe Samol mi Lapalap epwe atowu iö a pwüng leich, i epwe pwal ngonuk chappen om föför ngeniei, nge ngang üsap angetä womw. 13 Usun mwiitunen ekewe re lom a apasa, ‘Eman aramas mi ngau chök a föri föför mi ngau.’ Nge ngang üsap fokun angetä womw. 14 Ifa usun, iö en ewe kingen Israel ka ekiekin niela? Iö ka tapweri? Ka tapweri eman kolak mi mäla ika eman kütoulom? ✡1.Sam 26.20 15 Iei mine ewe Samol mi Lapalap epwe soukapwüng o atowu iö a pwüng leich. I epwe nenengeni ei lapalap o peniei, epwe pwal angasaei seni lepoum.”

16 Iwe, lupwen Tafit a wes le kapas ngeni Saul, Saul a üra, “Ifa usun, iei wesewesen mweliom nei mwän Tafit?” Mürin, Saul a kechü fän leüömong. 17 A üreni Tafit, “En ka pwüng lap seniei. Ka liwini ngeniei mine a mürina, nge ngang üa liwini ngonuk mine a ngau. 18 Ikenai ka pwärätä usun om kirikiröch ngeniei. Ewe Samol mi Lapalap a atolongaei fän nemeniom, nge en kosap nieila. 19 Ifa usun, ika eman mwän epwe seretä won chon oputan, epwe tongeni amanaua? Amwo ewe Samol mi Lapalap epwe liwini ngonuk mine a mürina ren mine ka föri ngeniei ikenai. 20 Iei üa silei pwe en kopwe wesewesen king, nge ewe mwün Israel epwe fisitä reöm. 21 Iei mine kopwe pwon ngeniei fän akapel fän iten ewe Samol mi Lapalap pwe kosap ärala mwirimwiri, kosap pwal amoela itei me iten chon leimwen semei.” 22 Iwe, Tafit a eäni ei pwon fän akapel ngeni Saul. Mürin, Saul a liwiniti lenian, nge Tafit me nöün kewe aramas ra feitä ren ewe lenien op mi pöchökül.