1 Iwe, ekewe chon Sif ra feito ren Saul me lon Kipea o apasa, “Tafit a op won ewe chukun Hakila mi nom akawenewenen Jesimon.” ✡Kölf 54 2 Iei mine Saul a feila ren ewe fanüapön Sif fiti ülüngeröü re Israel mi sipeöch le maun, pwe epwe kütta Tafit ikenan. 3 Iwe, Saul a nom ünükün ewe al won ewe chukun Hakila akawenewenen Jesimon. Nge Tafit a chök nonom lon ewe fanüapö. Lupwen Tafit a rongorong pwe Saul a tapweralong lon ewe fanüapö, 4 a tinala chon operiir. Iwe, a silei me rer pwe Saul a wesewesen feito. 5 Mürin, Tafit a feila ren ewe leni ia Saul a nom ie. Iwe, a küna ewe ia Saul a möür ie me Apner nöün Ner we mwän, ewe meilapen nöün mwichen sounfiu. Saul a kon lukalapen ewe ia ra nom ie, nge ewe mwichen sounfiu ra kon pwelin ünükün.

6 Mürin, Tafit a aisini Ahimelek ewe re Hit me Apisai pwin Joap nöün Seruia we mwän, “Iö epwe etiei le feitiu ren Saul lon ewe leni ia a nom ie?” Iwe, Apisai a pälüeni, “Ngang üpwe etuk le feitiu.” 7 Iei mine Tafit me Apisai ra feitiu ren ewe mwichen sounfiu lepwin o küna Saul pwe a möür lukalapen ewe leni. Wokun siles a fotetiu lepwül asen möküran, nge Apner me ewe mwichen sounfiu ra möür pwelin ünükün. 8 Mürin, Apisai a üreni Tafit, “Ikenai Kot a atolonga ätei mi oput en fän nemeniom. Iei mine kopwe mwüt ngeniei pwe üpwe apwera Saul ngeni ewe pwül ren ai posu ngeni woki ei siles fän eu chök, nge üsap posu fän ruu.” 9 Nge Tafit a üreni Apisai, “Kosap niela ätewe. Pun iö a tongeni angeetä won nöün ewe Samol mi Lapalap mi kepit, nge esap tipis?” 10 Iwe, Tafit a pwal üra, “Mwo manauen ewe Samol mi Lapalap, üa silei pwe Kot epwe püsin niela, ika epwe tori an mäla, ika epwe mäla lon maun. 11 Ewe Samol mi Lapalap epwe epeti ai üpwe angeetä won nöün we mi kepit. Nge iei sipwe angei wokun siles mi nom asen möküran me an rumen koluk pwe sipwe feila.” ✡1.Sam 24.6 12 Iwe, Tafit a angei ewe siles me ewe rumen koluk seni asen möküren Saul, mürin ra feila. Esap wor eman a küna ika silei mine ra föri, esap pwal wor eman mi nennela. Pun ir meinisin ra möür, pokiten ewe Samol mi Lapalap a awarato eu möürüchou wor.

13 Mürin, Tafit a feila pekilan ewe lemol me epek o ütä won ungen ewe chuk, nge toauen lefiler a men toau. 14 Iwe, Tafit a kökkö ngeni ewe mwichen sounfiu pwal ngeni Apner o aisini, “Apner, ifa usun, ka tongeni rongorong mweliei?” Mürin, Apner a pälüeni, “En iö ka köri ewe king?” 15 Tafit a üreni Apner, “Ifa usun, sap en eman mwän? Iö a wewe ngonuk me lon Israel? Pwota kosap mamasaöchü om samol me om king? Pun eman me lein ekewe aramas a tolong pwe epwe niela ewe king om we samol. 16 En kosap föri wisom, Apner. Mwo manauen ewe Samol mi Lapalap, ämi meinisin oupwe mäla, pun ousap mamasaöchü ämi samol nöün ewe Samol mi Lapalap mi kepit. Oupwe nennefetal. Ia a nom ie wokun ewe king siles me an rumen koluk mi nom asen möküran?”

17 Iwe, Saul a silleni ngingin Tafit o ais, “Ifa usun, sap iei mweliom nei mwän Tafit?” Nge Tafit a pälüeni, “Ewer, ai samol me ai king.” 18 A pwal üra, “Pwota en ai samol ka chök tatapweriei ngang noum chon angang? Met üa föri? Met sokun föför üa tipis ngonuk won? 19 Iei mine ai samol me ai king kopwe rongorong aloi ngang noum chon angang. Are ewe Samol mi Lapalap a amwökütükütuk pwe kopwe ü ngeniei, amwo epwe etiwa eu asor o siwili an ekiek. Nge are aramas ra amwökütükütuk, amwo repwe anümamau me fän mesen ewe Samol mi Lapalap. Pun ra asüeila seni fanüei, me ren ewe Samol mi Lapalap pwe üpwe süla ngeni eu fanü ia üa chök tongeni angang ngeni ekewe koten ekis ie. 20 Kosap mwütätä pwe üpwe ninnila lon fanüen chon ekis toau seni fän mesen ewe Samol mi Lapalap. Pun ewe kingen Israel a towu pwe epwe nieila usun eman kutoulom, usun eman mi kütta ewe machang itan patrich me won ekewe chuk pwe epwe liapeni.”

21 Mürin, Saul a apasa, “Ngang üa föri mine a mwäl. Kopwe liwinto, nei mwän Tafit, pun ngang üsap chüen afeiengauok pokiten manauei a aüchea me reöm ikenai. Ellet, ngang üa föri föförün eman mi umwes, üa pwal fokun mwäl.” 22 Nge Tafit a apasa, “Iei wokum we siles, ai king. Eman lein ekewe alüal epwe feito o angei. 23 Ewe Samol mi Lapalap a liwiniöchü iteiten aramas fän iten an föförün pwüng me an allükülük. Ikenai ewe Samol mi Lapalap a atolongok fän nemeniei, nge ngang üsap angeetä wom en nöün ewe Samol mi Lapalap we mi kepit. 24 Nengeni, usun manauom a aüchea me rei, iei usun manauei epwe aüchea me ren ewe Samol mi Lapalap, epwe pwal angasaei seni ekewe riaföü meinisin.” 25 Mürin, Saul a üreni Tafit, “Kot epwe afeiöchuk nei mwän Tafit. Kopwe föri föför mi lapalap o asopöchüür.” Iwe, Tafit a feila lon alan, nge Saul a liwiniti lenian.