1 Iwe, Rehopoam a feila Sikem, pun chon Israel meinisin ra mwichefengen ikenan, pwe repwe seikätä Rehopoam lon wisen king. 2 Nge lupwen Jeropoam nöün Nepat we mwän mi nom Isip, ewe ia a süla ie seni ewe king Salomon, a rong usun, a liwinto seni Isip. 3 Pun ekewe chon Israel ra titi i. Mürin, Jeropoam me ekewe chon Israel meinisin ra feito ren Rehopoam o üreni, 4 “Semom we a achouu ngenikem chomong angang. Iei mine kopwe apäna ngenikem ewe angang mi chou, semom we a achouu ngenikem, o amecheresikem, mürin äm aipwe angang ngonuk.” 5 Iwe, Rehopoam a üreniir, “Oupwe mwüt ngeniei ükükün ülüngat rän pwe üpwe ekieki usun ämi tüngor, mürin oupwe liwinsefälito. Iei mine ekewe aramas ra feila.

6 Mürin, ewe king Rehopoam a angei öüröüran me ren ekewe chinlap mwän, ätekewe mi angang ngeni saman we, lupwen a chüen manau. Iwe, a aisiniir, “Met ämi öüröür ngeniei, pwe üpwe pälüeni ngeni ekei aramas?” 7 Iwe, ra üreni, “Are kopwe kirikiröch ngeni ekei aramas o apwapwaar ren om fosöch ngeniir, mürin ir repwe noum chon angang fansoun meinisin.” 8 Nge Rehopoam a pöütala ewe öüröür a angei seni ekewe chinlap mwän o angei öüröüran me ren pilon kewe alüal mi angang ngeni. 9 Iwe, a aisiniir, “Met ämi öüröür, pwe sipwe pälüeni ngeni ekei aramas mi üreniei, pwe üpwe apäna ngeniir ewe angang mi chou semei we a achouu ngeniir?” 10 Iwe, pilon kewe alüal ra üreni, “Iei usun mine kopwe pälüeni ngeni ewe tüngor seni ekewe aramas: Aütüngini a öümong seni lukalapen semei we. 11 Are mi pwüng pwe semei we a achouu ngenikemi chomong angang, ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwich seni silin man mi ken.”

12 Mürin ülüngat rän Jeropoam me ekewe aramas meinisin ra feito ren ewe king Rehopoam, usun i a fen apasa. 13 Iwe, ewe king a kapas ngeni ekewe aramas fän pöchökül o pöütala öüröüran me ren ekewe chinlap mwän. 14 A kapas ngeniir fän öüröüran me ren ekewe alüal o üreniir, “Semei we a achouu ngenikemi chomong angang, nge ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwch seni silin man mi ken.” 15 Iei usun ewe king esap aüselinga än ekewe aramas tüngor. Ei a fis me ren Kot, ewe Samol mi Lapalap, pwe epwe apwönüetä an kapas a eäni ngeni Ahia ewe re Silo fän iten Jeropoam nöün Nepat we mwän.

16 Iwe, lupwen chon Israel meinisin ra küna pwe ewe king esap aüselinga ar tüngor, ra pälüeni ewe king, “Pwota sipwe chiechi ngeni Tafit me an famili. Met sokun feiöch sa angei seniir? Ämi chon Israel, oupwe liwiniti en me lenian. Rehopoam, kopwe tümwünü püsin chon leimwom.” Iei mine chon Israel meinisin ra liwiniti en me lenian. ✡2.Sam 20.1 17 Nge Rehopoam a chök nemeni ekewe chon Israel mi imweimw lon ekewe telinimwen Juta. 18 Mürin, ewe king Rehopoam a tinala Atoniram ewe meilapen ewe mwichen chon angangen kinroosi ren ekewe chon Israel, nge ir ra monei ngeni fau, iwe, a mäla. Mürin, ewe king Rehopoam a müttir tötä won wan woken o süla Jerusalem. 19 Seni ewe ränin tori ikenai ekewe chon Israel ra ü ngeni ewe mwün Tafit me mwirimwirin.