1 Iwe, lupwen Rehopoam a tori Jerusalem, a amwichafengeni ükükün ipükü walik ngeröü sounfiu mi kefil seni ekewe ainangen Juta me Peniamin, pun a ekiekin maun ngeni Israel o aliwinisefäli mwün. 2 Nge ewe Samol mi Lapalap a üreni ewe soufos Semaia, 3 pwe epwe kapas ngeni Rehopoam nöün Salomon we mwän ewe kingen Juta, pwal ngeni ekewe chon Israel meinisin mi nom lon Juta me Peniamin, 4 “Iei alon ngang ewe Samol mi Lapalap, ‘Ousap feila pwe oupwe maun ngeni pwimi kewe chon Israel. Oupwe liwiniti en me lenian, pun ei mettoch mi fis a feito seniei.’ ” Iwe, ra aleasochisi alon ewe Samol mi Lapalap o liwinla, nge resap feila maun ngeni Jeropoam.

5 Iwe, Rehopoam a imweimw lon Jerusalem o apöchöküla tittin ekei telinimw me lon Juta me Peniamin: 6 Petleem, Etam, Tekoa, 7 Pet-sur, Soko me Atulam, 8 Kat, Maresa, Sif, 9 Atoraim, Lakis, Aseka, 10 Sora, Aialon me Hepron. 11 Iwe, a pwal apöchöküla ekewe imwen maun lon ekei telinimw o anomu meilapen sounfiu lor. A iseis mongö, apüra me wain lor. 12 A pwal iseis tittin maun me siles lon ekei telinimw meinisin o fokun apöchöküleer. Iei usun a atolonga Juta me Peniamin fän nemenian.

13 Iwe, ekewe souasor me ekewe mwän seni ewe ainangen Lefi mi nom lemenen Israel ra likitala lenier, ia ra nom ie, o feito ren Rehopoam. 14 Ekewe mwän seni ewe ainangen Lefi ra mwo nge likitala fanüer, imwer me pisekir o feila Juta me Jerusalem, pokiten Jeropoam me nöün kewe mwän ra asürela, pwe resap tongeni föri angangen wiser wisen souasor ngeni ewe Samol mi Lapalap. 15 Nge Jeropoam a püsin filätä nöün souasor pwe repwe angang lon ekewe lenien fel won ekewe leni tekia, pwal ngeni ekewe uluulun kuuch me ekewe uluulun kow i a föri. ✡1.King 12.31 16 Iwe, chokewe mi mochen fel ngeni ewe Samol mi Lapalap, ewe Koten Israel, ren wesewesen leluker me lein chon ekewe ainangen Israel meinisin ra tapwela mürin chon ewe ainangen Lefi ngeni Jerusalem, pwe repwe tongeni asor ngeni ewe Samol mi Lapalap än ar kewe lewo we Kot. 17 Iwe, ra apöchöküla mwün Juta o ürenätä Rehopoam nöün Salomon we mwän lon ükükün ülüngat ier, pun ra föri usun mine ra fen föri lon mwün Tafit me Salomon.

18 Iwe, Rehopoam a pwülüeni Mahalat nöün Jerimot we fefin, nge Jerimot nöün Tafit we mwän. Iten inen Mahalat Apihail nöün Eliap we fefin, nge Eliap nöün Jesi we mwän. 19 Mahalat a nöüni ülüman mwän me won Rehopoam iter Jeus, Semaria me Saham. 20 Mürin, Rehopoam a pwülüeni Maka nöün Apsalom we fefin. Nge neminewe a nöüni me won Apia, Atai, Sisa me Selomit. 21 Rehopoam a echeni Maka nöün Apsalom we fefin lap seni pwülüan kewe me ülüpwülüan kewe meinisin. Iwe, a wor ükükün engol me waluman pwülüan me wone ülüpwülüan, a pwal wor ükükün rüe me waluman nöün mwän me wone nöün fefin. 22 Rehopoam a pwal filätä Apia nöün Maka we mwän, pwe epwe samol lap me lein pwin kewe, pun a ekiekin seikätä pwe epwe king. 23 Iwe, Rehopoam a tipachem lon an föför, pun a awisa nöün kewe mwän pwe repwe nom lon ekewe telinimw mi pchökül tittir meinisin lemenen ekewe fanü Juta me Peniamin. A pwal ngeniir chomong mongö o ngeniir chomong pwülüer.