1 Iei mine üa ekiekietä pwe üsap chüen liwinsefälitikemi, pun üsap mochen oupwe letipeta. 2 Pun are üpwe föri pwe oupwe letipeta, iö chök epwe chüen echipaei, nge chokewe chök ra küna letipeta rei? 3 Iei popun üa makkei ena toropwe ngenikemi, pun üsap mochen feila remi o küna letipeta ren chokewe ürürün pwe repwe apwapwaei. Pun üa mefi, pwe lupwen ngang üa pwapwa, pwal ämi meinisin oupwe pwapwa. 4 Pun üa mak ngenikemi fän watten weires me riaföün letipei, pwal fän watten chönün mesei. Üsap mochen pwe oupwe küna letipeta, nge üa mochen pwe oupwe mefi alololun ewe chen üa eäni ngenikemi meinisin.

5 Iwe, are eman a afisätä än eman letipeta, esap föri ngeniei, nge a föri ngenikemi meinisin, ika ngeni ekoch me leimi. Üa apasa ei, pun üsap mochen pöchökül ngeni ätewe mi föri ei sokun föför. 6 A naf fän iten ei aramas pwe a küna apwüng lon ei ükükün me ren chomong leimi. 7 Nge iei oupwe amusala tipisin ätewe o echipa letipan, pwe esap tolong lon letipeta mi fokun watte, pwe epwe fangatä an souläng. 8 Iei mine üa tüngor ngenikemi ämi oupwe asile ngeni pwe oua wesewesen tongei. 9 Iei popun üa makkei ngenikemi ena toropwe, pun üa mochen sotunikemi, pwe üpwe silei are oua aleasochisiei lon mettoch meinisin. 10 Lupwen oua amusala tipisin eman ren met a föri, ngang üa pwal amusala an tipis. Pun are mi wor och mine üpwe amusala won, ngang üa amusala fänäsengesimi mwen mesen Kraist. 11 Üa föri ei, pwe esap wor än Satan nemenem woch, pun sia silei an ekiek.

12 Iwe, lupwen üa tori Troas pwe üpwe afalafala ewe Pworausen Manau usun Kraist, üa küna pwe ach Samol a suki eu asam ngeniei fän iten ewe angang. 13 Nge letipei esap kinamwe, pun üsap küna pwii we Titus. Iei mine üa kapong ngeni ekewe aramas ikenan o feila Masetonia. ✡Föf 20.1

14 Nge kilisou ngeni Kot! Pun lon Kraist Kot a emwenikich fansoun meinisin, pwe sipwe eti Kraist lon an win. Kot a nöünöükich, pwe sipwe achöfetalei ewe pworaus usun Kraist pwe aramas repwe silei i, usun och löpwokus mi pwopwonfeil. 15 Pun sia usun chök och pwokusun Kraist ngeni Kot, a pwopwonfeil lein chokewe mi küna manau, pwal lein chokewe mi pöütmwälila. 16 Iwe, ngeni chokewe mi pöütmwälila, iei eu pwokus mi afisätä mäla, nge ngeni chokewe mi küna manau, iei eu pwokus mi atoto manau. Iwe, iö a lipwäköch ngeni ei sokun angang? 17 Äm aisap usun ekewe chomong aramas ra aea än Kot kapas minen amömö fän iten ar repwe kütta win. Nge pokiten Kot a tinikem, äm aia kapas fän wenechar mwen mesan usun nöün Kraist chon angang.