1 Ifa usun, oua ekieki pwe aia püsin sikäsinikem? Ika epwe lomot ngenikem äm aipwe uwala remi ika tüngor senikemi toropwen allükülük usun ekoch ra föri? 2 Püsin ämi nöüm toropwen allükülük, a mak won letipem, pwe aramas repwe tongeni silei o aleani. 3 A fat pwe püsin Kraist a makkei ei toropwe o tinato rech. Esap mak ren ink, nge ren Ngünün ewe Kot mi manau, esap mak won fau mi chöpöp, nge a mak won letipen aramas. ✡Eks 24.12; Jer 31.33; Is 11.19; 36.26

4 Aia apasa ei, pun a wor äm apilükülük won Kot ren Kraist. 5 Esap wor och rem äm aipwe tongeni apasa, pwe a wor äm lipwäköch le föri ei angang, pwe äm lipwäköch a pop seni Kot. 6 I ewe mi alipwäköchükem äm aipwe chon angang ngeni ewe pwon mi fö. Ei pwon esap fis ren allük mi mak, nge a fis ren Ngünmifel, pun ewe allük mi mak a afisätä mäla, nge ewe Ngünmifel a ngenikich manau. ✡Jer 31.31

7 Ekewe Allük ra rup ren mesen mak won ekewe fau mi chöpöp o än Kot ling a pwä lupwen a tori aramas. Inamwo ika saramaramen won mesen Moses a kisikisila, nge a fokun saram pwe ekewe chon Israel resap tongeni nenengeni won mesan. Ika ekewe Allük mi afisätä mäla ra toriir lon ena sokun ling, ✡Eks 34.29 8 epwe fen ifan me watten ewe ling lon angangen ewe Ngünmifel? 9 Are ewe angang mi atoto liwiningau ngeni aramas a ling, epwe fen ifan me watten ewe ling mi atoto ach pwüng? 10 Pun mine a ling me lom, esap chüen ling ikenai, are sia awewe ngeni ewe ling mi fokun lapalap. 11 Are a wor ling lon ewe pwonen lom mi chök nom ekis chök fansoun, epwe fen ifan me watten ewe ling lon ewe pwon mi fö mi nonom tori feilfeilachök!

12 Pokiten mi wor rem ei sokun apilükülük, äm aia pwora le kapas. 13 Aisap wewe ngeni Moses mi pwölüela won mesan ren echö mangaku, pwe ekewe chon Israel resap tongeni küna pwe ewe ling a kisikisila o wesila. ✡Eks 34.33 14 Nge letiper a kopüngüla, tori ikenai ekiekin letiper a pwölüla ren ewe chök pwölüpwöl, lupwen ra aleani ekewe puken ewe pwonen lom. Ewe pwölüpwöl a särifila ren Kraist chök. 15 Tori mwo nge ikenai, iteiten fansoun ar aleani än Moses kewe Allük, ewe pwölüpwöl a chüen pwölüela ekiekin letiper. 16 Nge ewe pwölüpwöl a särifila, lupwen eman aramas a kul ngeni ach Samol. ✡Eks 34.34 17 Iwe, ach Samol, i ewe Ngün, nge ia Ngünün ach Samol a nom ie, ikenan a wor ngasala. 18 Nge kich meinisin esap pwölüpwöl won mesach, sia nenengeni lingen ach Samol o lingela ren. A awilikich ngeni eu ling tori pwal eu ling, tori sipwe fokun wewe ngeni i lon ususun. Ei a pop seni ach Samol, i ewe Ngünmifel.