1 Iwe, Naeman ewe meilapen mwichen sounfiu nöün ewe kingen Siria i eman mwän mi itetekia me iteföüla me ren an samol, pun ewe Samol mi Lapalap a ewinna ekewe chon Siria ren Naeman. Ätei eman sounfiu mi fokun pwora, nge a rupun pwötür. 2 Nge a fis, pwe lupwen ekewe chon Siria ra kütta liaper lon Israel, ra uweela eman kükün nengin seni ei fanü. Ei nengin a angang ngeni pwülüen Naeman. 3 Iwe, ei nengin a kapas ngeni an samol fefin, “Amwo ai samol epwe feila ren ewe soufos mi nom lon Samaria. I epwe amoela an rupun pwötür.” 4 Lupwen Naeman a rong ei pworaus, a feila ren an samol ewe king o üreni, “Iön me iön usun alon ewe nengin seni ewe fanü Israel.” 5 Iwe, ewe kingen Siria a üreni Naeman, “Kopwe feila, nge ngang üpwe ngonuk echö toropwe kopwe uwala ren ewe kingen Israel.” Iei mine Naeman a feila, nge a pwal uwala ilik ngeröü föün moni silifer, wonongeröü föün moni kolt me engol üf mi mürina. 6 A pwal uwala ewe toropwe ren ewe kingen Israel. Iei masouen ewe toropwe, “Lupwen ei toropwe a toruk, kopwe silei pwe ngang üa tinala reöm nei na chon angang Naeman, pwe kopwe amoela an rupun pwötür.” 7 Nge lupwen ewe kingen Israel a aleani ewe toropwe, a kamwei üfan lon an rükö o üra, “Ifa usun, ngang Kot pwe üpwe tongeni niela eman o amanaua? Pwota a tinato rei ei mwän pwe üpwe amoela an rupun pwötür? A fat pwe a kütta eu popun pwe epwe fitikoko ngeniei.”

8 Nge lupwen ewe soufos Elisa a rong pwe ewe kingen Israel a kamwei üfan, a tinala pworaus ren o üreni, “Pwota ka kamwei üfom fän om rükö? Kopwe tinato rei ewe mwän, pwe epwe mefi pwe mi wor eman soufos lon Israel.” 9 Iei mine Naeman a feila fän waan oris me woken o üla ünükün asamalapen imwen Elisa. 10 Nge Elisa a tinala eman chon künö ren pwe epwe üreni, “Kopwe feila o tütü fän fisu lon ewe chanpupu Jortan. Iwe, inisum epwe kiliöch o limöch.” 11 Nge Naeman a feila fän an song o üra, “Üa fokun ekieki pwe ewe soufos epwe towu rei, epwe ütä o köri iten ewe Samol mi Lapalap an we Kot, epwe amwökütükütü pöün won ewe ia a rupun pwötür ie, pwe epwe mola. 12 Ifa usun, ekewe chanpupu Apana me Farpar mi nom lon Tamaskus resap mürina seni ekewe chanpupun Israel meinisin? Ifa usun, üsap tongeni tütü lor o limöch?” Iei mine Naeman a kul o feila fän an lingeringer. 13 Nge nöün kewe chon angang ra kaneto ren o üreni, “Semem, are ewe soufos epwe ürenuk pwe kopwe föri och mi weires, ifa usun, kosap föri? Nge pwota kosap mochen apwönüetä alon, lupwen a apasa, pwe kopwe chök tütü pwe kopwe limöch?” 14 Iei mine Naeman a feila ren ewe chanpupu Jortan o tütiu lon fän fisu, usun mine Elisa a kapas ngeni. Iwe, inisin Naeman a kiliöch o limöch usun chök inisin eman mönükol. ✡Luk 4.27

15 Mürin, Naeman me nöün kewe chon angang ra liwiniti Elisa. Iwe, a ütä fän mesan o üra, “Iei ükärän silei pwe esap wor eman Kot won unusen fanüfan lükün ewe Koten Israel. Kose mochen kopwe angei eu lifang seniei ngang noum chon angang.” 16 Nge Elisa a üra, “Mwo manauen ewe Samol mi Lapalap, ewe üa angang ngeni, üsap angei och senuk.” Iwe, Naeman a pesei ngeni pwe epwe angei, nge Elisa esap mochen. 17 Mürin, Naeman a üra, “Are kosap mochen angei eu lifang, üa tüngor ngonuk, pwe kopwe mwüt ngeniei pwe üpwe uwei och pwül ükükün uwosen ruoman aas. Pun seni ikenai ngang noum chon angang üsap chüen mochen eäni asoren kek ika och sokun asor ngeni eman kot lükün ewe Samol mi Lapalap. 18 Eu chök üa äleäl, pwe ewe Samol mi Lapalap epwe amusaeila, are üpwe eti ai samol le feila lon imwen ewe anü Rimon pwe epwe fel ikenan. Are üa amwöchätä pöün o eti le chapetiu me lon imwen ewe anü Rimon, ewe Samol mi Lapalap epwe amusala ei föför üa föri.” 19 Iwe, Elisa a üreni Naeman, “Kopwe feila fän kinamwe.” Mürin Naeman a feila. Nge lupwen a ekis chök toauala seni Elisa, 20 Kehasi nöün Elisa we chon angang a üra, “Ai samol a mwüt ngeni Naeman ewe re Siria pwe epwe feila, nge esap angei och seni mine a uwato. Mwo manauen ewe Samol mi Lapalap, üpwe säla mürin o angei och seni.” 21 Iei mine Kehasi a tapwela mürin Naeman. Nge lupwen Naeman a küna pwe eman a säto mürin, a tötiu seni waan woken pwe epwe churi. Iwe, a aisini, “Ifa usun, a öch pworausom?” 22 Kehasi a üreni, “Ewer, a öch pworausei. Ai samol a tiniei pwe üpwe ürenuk: Iei chök ruoman alüal seni ewe mwichen soufos ra feito rei seni chukuchukutän ewe fanü Efraim. Üa tüngor ngonuk, pwe kopwe ngeniir ülüngat ngeröü föün moni silifer me ruachö üf mi mürina.” 23 Nge Naeman a üreni, “Kose mochen kopwe angei wonongeröü föün moni silifer.” Iwe, Naeman a pesei Kehasi o uwalong wonongeröü föün moni silifer lon ruu tuk, a pwal angei ruachö üf mi mürina o iseniretä won ruoman nöün kewe chon angang. Iwe, ra akomwola fän ekewe pisek me mwen Kehasi. 24 Lupwen ra tori ewe chuk ia imwen Elisa a nom ie, Kehasi a angei seniir ekewe pisek o iseniir lon ewe imw. Mürin a tinala ekewe ruoman mwän, iwe, ra feila. 25 Nge Kehasi a tolong lon ewe imw o ütä fän mesen an samol. Iwe, Elisa a aisini, “Kehasi, ia ka feito me ie?” Kehasi a pälüeni, “Ngang noum chon angang üsap feila ekis.” 26 Nge Elisa a üreni, “Ifa usun, ngüni esap nom reöm, lupwen ewe mwän a tötiu seni waan woken pwe epwe sounuk? Ifa usun, iei fansoun pwe kopwe angei moni me üf, tanipin olif me wain, sip me kow, chon angang mwän me chon angang fefin? 27 Iei mine ewe rupun pwötür mi nom won Naeman epwe tökuk me mwirimwirum kana tori feilfeilachök.” Iwe, lupwen Kehasi a towu seni fän mesen Elisa, a rupun pwötür, pwe ünüchan a pwechepwech usun snow.