1 Iwe, ewe soufos Elisa a köri eman lein ekewe soufos o üreni, “Kopwe anükünükuk, kopwe angei ei rumeen lö o feila Ramot-kiliat. 2 Nge lupwen ka tori, kopwe kütta Jehu nöün Jehosafat we mwän, nge Jehosafat nöün Nimsi. Kopwe tolong ren o tüngor ngeni pwe epwe ütä seni lein chienan. Mürin, kopwe emwenalong lon eu rumwen lon. 3 Iwe, kopwe angei ei rumeen lö o ninätiu won möküran o apasa, ‘Iei alon ewe Samol mi Lapalap: Üa epituk pwe kopwe king lon Israel.’ Mürin, kopwe suki asamen ewe rum o süla, nge kosap mang.”

4 Iei mine ewe soufos alüal a feila Ramot-kiliat. 5 Nge lupwen a tori, a küna pwe ekewe meilapen sounfiu ra mwichefengen. Iwe, ewe soufos a üra, “Mi wor eu pworaus ngonuk, en meilap.” Nge Jehu a ais, “Ngeni iö me leim?” Ätewe a üra, “Ngeni en, meilap.” 6 Mürin, Jehu a ütä o tolong lon ewe imw. Nge ewe soufos alüal a ninätiu ewe lö won möküran o üreni, “Iei alon ewe Samol mi Lapalap ewe Koten Israel: Üa epituk pwe kopwe kingen nei kewe aramas o nemeni Israel. ✡1.King 19.16 7 Kopwe niela chon leimwen Ahap om we samol, pwe ngang üpwe ngeni Isipel chappen an niela nei kewe soufos, pwal chappen an niela nei kewe chon angang meinisin. 8 Pun unusen chon leimwen Ahap repwe rosola, nge üpwe ärala nöün mwän meinisin seni kükün tori watte me lon Israel. 9 Iwe, üpwe föri ngeni chon leimwen Ahap usun mine üa föri ngeni chon leimwen Jeropoam nöün Nepat we mwän, pwal ngeni chon leimwen Paasa nöün Ahia we mwän. 10 Kolak repwe ochei Isipel me lon kinikinin fanüen Jesrel, nge esap wor eman epwe peiaseni.” Mürin än ewe soufos alüal apasa ekei kapas, a suki asamen ewe rum o süla. ✡1.King 21.23

11 Iwe, lupwen Jehu a towu ren chienan kewe meilap, eman me leir a aisini, “A öch pworausom? Pwota ei alüal mi umwes a feito reöm?” Nge Jehu a pälüeniir, “Ämi oua silei ewe alüal me mine a apasa.” 12 Nge ir ra üra, “Apwi, äm aisap silei. Kopwe ürenikem iei.” Iwe, Jehu a üreniir, “Iei usun mine a eäni kapas ngeniei, ‘Iei alon ewe Samol mi Lapalap: Üpwe epituk pwe kopwe kingen Israel.’ ” 13 Mürin, ekewe meilap ra müttir angei üfer owokot o emeresirela won aeuin foson ewe latö pwe epwe ütä lon, ra pwal ettiki rappwa o kökkö, “Jehu a king.”

14 Mürin, Jehu nöün Jehosafat we mwän, nge Jehosafat nöün Nimsi mwän, a rawangauei Joram. Lon ei fansoun Joram me ekewe aramasen Israel meinisin ra peni Ramot-kiliat, pun Hasael ewe kingen Siria a maun ngeni. 15 Nge ewe king Joram a fen liwinsefäl ngeni Jesrel, pwe epwe onoson o pöchökülsefäl seni kinasan kewe me ren chon Siria, lupwen an maun ngeni Hasael ewe kingen Siria. Iwe, Jehu a üra, “Are oua tipeeu ngeni pwe üpwe king, oupwe pii pwe esap wor eman epwe sü seni ei telinimw o feila apworausa ei pworaus me lon Jesrel.” 16 Mürin, Jehu a tötä won waan woken o feila Jesrel, pun Joram a nom ikenan. Nge Ahasia ewe kingen Juta a pwal feito Jesrel pwe epwe churi Joram.

17 Iwe, ewe chon mas a ütä won ewe imw tekia lon Jesrel o küna Jehu me an mwich pwe ra feito. A üra, “Üa küna eu mwich a feito.” Joram a üreni, “Oupwe tinala eman chon wawa oris, pwe epwe churiir o aisiniir, ika ra feito fän kinamwe?” 18 Iei mine eman chon wawa oris a feila pwe epwe churiir o apasa, “Ewe king a mochen silei, ika oua feito fän kinamwe.” Nge Jehu a üreni, “Met wisom pwe kopwe ais usun kinamwe? Kopwe kul o tapweto müri.” Iwe, ewe chon mas a apworausa, “Ewe chon künö a toriir, nge esap liwinsefälito.” 19 Mürin, ewe king a tinala aruomanün chon wawa oris. Ätewe a tori ewe mwich o üra, “Ewe king a mochen silei, ika oua feito fän kinamwe.” Nge Jehu a pälüeni, “Met wisom pwe kopwe ais usun kinamwe? Kopwe kul o tapweto müri.” 20 Iwe, ewe chon mas a apworausa, “Ätewe a toriir, nge esap pwal liwinsefälito. Iwe, lapalapen chon uwei ei sai a usun chök lapalapen Jehu nöün Nimsi we mwän, pun an sai a eniweniw.”

21 Iwe, Joram a üra, “Oupwe amolätä wai woken.” Ra amolätä waan woken. Mürin, Joram ewe kingen Israel me Ahasia ewe kingen Juta ra sai won en me waan woken, pwe repwe churi Jehu. Iwe, ra churi Jehu won fanüen Napot ewe re Jesrel. 22 Nge lupwen Joram a küna Jehu, a aisini, “Ifa usun, Jehu, ka feito fän kinamwe?” Jehu a pälüeni, “Ifa usun, a tongeni fis kinamwe, are Isipel inom we a chök föföri ekewe angangen anümwäl me angangen roong?” 23 Mürin, Joram a akulu waan woken o sü, nge a kökkö ngeni Ahasia, “A fis rawangau, Ahasia.” 24 Nge Jehu a emeia an esefich fän pöchökül o peki lefilen pöüköröön Joram, pwe ewe föün esefich a küw föün ngasangasan. Iwe, a turula won waan woken o mäla. 25 Mürin, Jehu a üreni Pitkar nöün chon alilis, “Kopwe angei inisin Joram o moneela won fanüen Napot ewe re Jesrel. Kopwe chechemeni ewe fansoun en me ngang sa saipök me mürin Ahap saman we, lupwen ewe Samol mi Lapalap a eäni ei kapasen afeiengau usun, 26 ‘Nänew üa fokun küna chan Napot me nöün kewe mwän mi niiniila. Üpwe ngeni Ahap chappen an föför me won ei chök fanü.’ Iei mine kopwe angei inisin Joram o moneela won ei fanü, pwe epwe pwönüetä mine ewe Samol mi Lapalap a fen eäni pwon.” ✡1.King 21.19

27 Lupwen Ahasia ewe kingen Juta a küna mine a fis, a süla ngeni ewe telinimw Pet-hakan. Nge Jehu a tapweri o kökkö, “Oupwe pwal niela ätena.” Iwe, ra peki me lon waan woken, lupwen a sä won ewe al mi feitä Kur arap ngeni ewe telinimw Ipleam. Nge Ahasia a süla Mekito o mäla ikenan. 28 Iwe, nöün chon angang ra uwala Ahasia won efoch woken Jerusalem o peiaseni lon peiasan ren an kewe lewo lon ewe telinimwen Tafit.

29 Iwe, Ahasia a tolong lon wisan wisen king lon Juta lon engol me euin ierin mwün Joram nöün Ahap we mwän ewe kingen Israel.

30 Mürin, Jehu a feila Jesrel. Lupwen Isipel a rongorong usun, a achola ünükün föün mesan, a foutei won möküran o nenewu seni eu asammwachon imwan. 31 Iwe, lupwen Jehu a tolong lon ewe asamalap, Isipel a kötiu, “Ifa usun, ka feito fän kinamwe, en Simri, en mi niela om samol?” 32 Nge Jehu a netä ren ewe asammwacho o kökkötä, “Iö a nom won peki, iö a nom won peki?” Iwe, ruoman ika ülüman chon angang lon imwen king ra nenetiu ren. 33 Jehu a üreniir, “Oupwe aturätiu nemina.” Iei mine ra aturätiu Isipel, nge ekis chan a sükütä won ewe tit pwal won ekewe oris, lupwen ra ipweri inisin. 34 Iwe, Jehu a tolong lon imwen ewe king, a mongö o ün. Mürin a üra, “Oupwe pii ewe fefin mi anümamau o peiaseni, pun i nöün eman king.” 35 Nge lupwen ra feila pwe repwe peiaseni, ra chök küna pösökün möküran, chün pechen me chün pöün. 36 Iwe, lupwen ra liwinto ren Jehu o üreni mine a fis, a üra, “Iei usun mine ewe Samol mi Lapalap a fen apasa ngeni nöün we chon angang Elias seni Tispe, pwe kolak repwe ochei fituken Isipel me lon kinikinin fanüen Jesrel. ✡1.King 21.23 37 Nge somän Isipel epwe toropas usun koiasi won kinikinin fanüen Jesrel, pwe esor eman epwe tongeni apasa: Iei i Isipel.”