1 Iwe, me lom Elisa a üreni ewe fin Shunem, mine nöün ewe ät i a amanaua, “Kopwe feila ämi me chon leimwom, kopwe siamü ia ka tongeni nom ie. Pun ewe Samol mi Lapalap epwe awarato eu lengita won ei fanü lon ükükün fisu ier.” ✡2.King 4.8-37 2 Iei mine ewe fefin a föri usun mine Elisa a üreni. Ra feila me chon leimwan o siamü lon fanüen chon Filistia lon ükükün fisu ier. 3 Nge wesin ekewe fisu ier, lupwen ewe fefin a liwinto seni fanüen chon Filistia, a feila ren ewe king o tüngorei pwe epwe angeesefäli imwan me fanüan. 4 Lon ei otun ewe king a kakapas ngeni Kehasi nöün Elisa we chon angang o üreni, “Kopwe apworausa ngeniei ekewe manaman meinisin mi amwarar Elisa a föri.” 5 Nge lupwen Kehasi a apworausa ngeni ewe king usun än Elisa amanaua ewe ät, lon ei chök otun ewe fefin, mine nöün ewe ät Elisa a amanaua, a feito ren ewe king pwe epwe tüngorei an epwe angeesefäli imwan me fanüan. Iwe, Kehasi a üra, “Ai samol me ai king, iei i ewe fefin, pwal iei nöün we ät Elisa a amanaua.” 6 Iwe, lupwen ewe king a aisini ewe fefin are mi let ei pworaus, neminewe a alleta. Iei mine ewe king a filätä eman nöüwis fän iten neminewe o üreni pwe epwe aliwinisefäli meinisin mine än ewe fefin fiti liwinin uän fanüan seni ewe fansoun a feila seni ewe fanü tori ei fansoun.

7 Iwe, Elisa a feila Tamaskus. Lon ei otun Penhatat ewe kingen Siria a samau. Iwe, lupwen ra üreni ewe king pwe Elisa a feito, 8 ewe king a üreni eman lein nöün kewe nöüwis itan Hasael, “Kopwe angei eu lifang o feila churi Elisa, kopwe tüngor ngeni pwe epwe aisini ewe Samol mi Lapalap ika üpwe pöchökül seni ai samau.” 9 Iei mine Hasael a feila pwe epwe churi Elisa o uwala eu lifang ren, sokopaten pisek seni Tamaskus, ükükün uwosen faik kamel. Nge lupwen a feito ren Elisa, a üreni, “Noum mwän Penhatat ewe kingen Siria a tinieito reöm, pwe üpwe aisinuk ika epwe pöchökül seni an samau.” 10 Elisa a üreni, “Kopwe feila o üreni pwe epwe pöchökül. Nge ewe Samol mi Lapalap a pwäri ngeniei pwe epwe mäla.” 11 Iwe, Elisa a siwil wowon o newenewen ngeni Hasael tori Hasael a säw. Mürin Elisa a kechü. 12 Nge Hasael a ais, “Ai samol, pwota ka kechü?” Elisa a pälüeni, “Pokiten üa silei ekewe föför mi ngau kopwe föri ngeni ekewe aramasen Israel. Kopwe kenala ar kewe leni mi pöchökül o niela nöür kewe alüal ren ketilas, kopwe pwal apunätiu nöür kewe semirit, pwe repwe tatakis, o tineni luken ekewe fefin mi pwopwo.” 13 Iwe, Hasael a ais, “Met aücheai ngang noum chon angang mi usun chök eman kolak, pwe üpwe föri ekei sokun föför mi amwarar?” Nge Elisa a pälüeni, “Ewe Samol mi Lapalap a pwäri ngeniei pwe kopwe kingen Siria.” ✡1.King 19.15 14 Mürin, Hasael a feil seni Elisa o liwiniti Penhatat. Iwe, Penhatat a aisini, “Met Elisa a ürenuk?” Hasael a pälüeni, “A üreniei pwe kopwe pöchökülsefäl.” 15 Nge sorotän ewe rän Hasael a angei echö pilangket, a achöchönü o emeresala won mesen ewe king pwe a mäla. Iwe, Hasael a siwili Penhatat lon wisan wisen king.

16 Iwe, lon alimuen ierin mwün Joram nöün Ahap we mwän ewe kingen Israel, Jehoram nöün Jehosafat we mwän a tolong lon wisan wisen king o nemeni Juta, 17 lupwen a ierini ilik me ruu. A nom lon Jerusalem o nemenem lon ükükün walu ier. 18 Iwe, a tipis usun ekewe kingen Israel o föföringau usun chon leimwen Ahap, pun a pwülüeni nöün Ahap we fefin. Iwe, a föri mine a ngau me fän mesen ewe Samol mi Lapalap. 19 Nge ewe Samol mi Lapalap esap mochen ataela Juta fän iten nöün we chon angang Tafit, pun a pwon ngeni pwe epwe wor eman mwirimwirin epwe nemenem fansoun meinisin. ✡1.King 11.36

20 Iwe, lupwen fansoun mwün Jehoram, ekewe chon Etom ra ü ngeni Juta o seikätä püsin eman ar king. ✡Ken 27.40 21 Mürin, Jehoram fiti waan kewe woken meinisin ra feila tori Sair. Ikenan ekewe sounfiun Etom ra pwelifeiliir. Nge Jehoram me nöün kewe meilapen waan kewe woken ra sü seniir lepwin, pwal nöün kewe sounfiu ra süla ngeni lenier. 22 Iei usun chon Etom ra ütä, nge resap chüen nom fän nemenien Juta tori ikenai. Lon ewe chök fansoun Lipna a pwal ütä won mwün. 23 Nge lusun pworausen än Jehoram föför meinisin a mak lon puken uruwon ekewe kingen Juta. 24 Iwe, Jehoram a mäla, nge ra peiaseni ren an kewe lewo lon ewe telinimwen Tafit. Nge Ahasia nöün we mwän a siwili lon wisan wisen king.

25 Iwe, lon engol me ruuen ierin mwün Joram nöün Ahap we mwän ewe kingen Israel, Ahasia nöün Jehoram we a tolong lon wisan wisen king o nemeni Juta, 26 lupwen a ierini rüe me ruu. A nom lon Jerusalem o nemenem lon ükükün eu ier. Iten inan we Atalia, neminewe i nöün nöün Omri fefin, nge Omri i ewe kingen Israel. 27 Ahasia a tipis usun chon leimwen Ahap o föri mine a ngau me fän mesen ewe Samol mi Lapalap. Ahasia a chök föri usun mine ir ra föri, pun a pwülüeni eman fefin seni chon leimwen Ahap.

28 Iwe, ewe king Ahasia a eti ewe king Joram nöün Ahap we mwän le maun ngeni Hasael ewe kingen Siria me lon Ramot-kiliat. Ikenan ekewe sounfiun Siria ra akinasa Joram. 29 Iwe, ewe king Joram a liwinsefäl ngeni Jesrel, pwe epwe onoson o pöchökülsefäl seni kinasan kewe me ren chon Siria. Nge Ahasia ewe kingen Juta a feila Jesrel, pwe epwe churi Joram, pun a samau.