1 Iwe, Josia a ierini walu, lupwen a tolong lon wisan wisen king. A nom lon Jerusalem o nemeni Juta lon ükükün ilik me eu ier. Iten inan Jetita nöün Ataia we fefin seni Poskat. ✡Jer 3.6 2 Josia a föri mine a pwüng me fän mesen ewe Samol mi Lapalap o föri mine Tafit an we lewo a föri, esap fokun aleasolap ngeni än Kot kewe allük.

3 Lon engol me waluen ierin mwün ewe king Josia, Josia a tinala ewe seketeri Safan ren imwen ewe Samol mi Lapalap. Iwe, Safan nöün Asalia we mwän, nge Asalia nöün Mesulam mwän. Ewe king a üreni, 4 “Kopwe feila ren ewe souasor mi lap Hilkia o üreni, pwe epwe pii ükükün ewe moni mi nom lon imwen ewe Samol mi Lapalap, ekewe mi mamasa ekewe asamalap ra ioni seni ekewe aramas. 5 Iwe, repwe ngeni ekewe souemwenin angangen ewe imwenfel ewe moni. Nge ir repwe möni ngeni ekewe chon angang mi försefäli mine a ta me won ewe imwenfel. 6 Repwe möni ngeni ekewe taikü, ekewe chon kaü imw me ekewe chon ses fau. Repwe pwal kamö won ei moni irä me fau mi fal, pwe repwe försefäli mine a ta me won ewe imwenfel. 7 Nge resap ais repootun ewe moni mi katolong lepöür, pun ekewe souemwenin angang ra wenechar.” ✡2.King 12.15

8 Iwe, ewe souasor mi lap Hilkia a üreni ewe seketeri Safan, “Üa küna ewe puken allük me lon imwen ewe Samol mi Lapalap.” Iwe, Hilkia a ngeni Safan ewe puk, nge Safan a aleani. 9 Mürin, ewe seketeri Safan a feito ren ewe king o apworausa ngeni, “Noum kewe chon angang ra angei ewe moni mi nom lon ewe imwenfel o ngeni ekewe souemwenin angangen ewe imwenfel.” 10 Safan a pwal üreni ewe king, “Ewe souasor Hilkia a ngeniei ei puk.” Iwe, Safan a aleani ewe puk ngeni ewe king.

11 Nge lupwen ewe king a rongorong kapasen ewe puken allük, a kamwei üfan fän an letipeta. 12 Mürin, ewe king a allük ngeni ewe souasor Hilkia me Ahikam nöün Safan we mwän, ngeni Akpor nöün Mikaia we mwän me ewe seketeri Safan, pwal ngeni Asaia nöün ewe king chon angang, 13 “Oupwe feila o aisini ewe Samol mi Lapalap fän itei, pwal fän iten ekewe chon Juta meinisin, usun ekewe kapas mi mak lon ei puk ra küna. Iwe, än ewe Samol mi Lapalap song a fokun watte ngenikich, pun ach kewe lewo resap aleasochis ngeni kapasen ei puk, resap pwal föri usun meinisin mine a mak lon.”

14 Iei mine ewe souasor Hilkia me Ahikam, Akpor, Safan, pwal Asaia ra feila ren ewe soufos fefin Hulta mi nom lon ewe aruuen kinikinin ewe telinimw Jerusalem, pwülüen neminei Salum nöün Tikwa we mwän, nge Tikwa nöün Haras. Salum a wisen tütümwünü üföüfen lon ewe imwenfel. Iwe, ra apworausa ngeni neminewe mine a fis. 15 Nge Hulta a üreniir, “Oupwe liwinla o üreni ewe mwän a tinikemiito rei, 16 pwe iei alon ewe Samol mi Lapalap ewe Koten Israel, ‘Üpwe awarato feiengau won ei leni, pwal won aramasan, usun meinisin mine a mak lon ewe puk ewe kingen Juta a aleani. 17 Pokiten ra likitieila o kenala apach mi pwokus ngeni pwal ekoch kot, pwe repwe asongaei ren ar kewe uluulun anümwäl ra püsin föri. Iei mine ai song epwe watte ngeni ei leni, nge esap wesila.’ 18 Nge iei usun mine oupwe üreni ewe kingen Juta mi tinikemiito pwe oupwe aisini ewe Samol mi Lapalap ewe Koten Israel, pwe iei alon, ‘Ka aüselinga ai kewe kapas mi mak lon ewe puk, 19 ka pwal apwetetei lelukom o atekisonok me fän mesei, lupwen ka rongorong mine üa apasa usun feiengauen ei leni, pwal usun feiengauen aramasan, pwe repwe wiliti och minen eniwokus me anümamau. Iwe, ka kamwei üfom o kechü fän mesei, iei popun ngang üa pwal aüselinga om iotek. 20 Iei mine lupwen kopwe mäla, kopwe mäla fän kinamwe o peias ren om kewe lewo, nge kosap küna ewe feiengau üpwe awarato won ei leni.’ ” Iwe, ekewe mwän ra liwinla o uwala ekei kapas ren ewe king.