1 Mürin, ewe king Josia a titi ekewe souakomwen Juta me Jerusalem, nge ir meinisin ra mwicheto ren. 2 Iwe, ewe king a feila ren imwen ewe Samol mi Lapalap, nge ekewe souakomwen Juta me ekewe chon Jerusalem meinisin, pwal ekewe souasor me soufos, ekewe aramas kis me aramas lap meinisin ra eti. Ewe king a aleani ngeniir kapasen lon ewe puken pwon ra küna me lon imwen ewe Samol mi Lapalap. 3 Nge ewe king a ütä lon lenian ren ewe ür o eäni eu pwon me fän mesen ewe Samol mi Lapalap, pwe epwe aleasochis ngeni ewe Samol mi Lapalap o apwönüetä an kewe allük me pwüüng ren unusen lelukan me unusen ngünün. Epwe pwal föri pwüngün kapasen ewe pwon mi mak lon ei puk. Iwe, ekewe aramas meinisin ra tipeeu pwe repwe eti le apwönüetä ewe pwon.

4 Mürin, ewe king a allük ngeni ewe souasor mi lap Hilkia me ekewe souasor ir kisin fan, pwal ngeni ekewe chon mamasa asamalapen ewe imwenfel, pwe repwe atowu seni ewe imwenfel ekewe pisek meinisin aramas ra aea fän iten ar fel ngeni ewe anü Paal me ewe anüfefin Asera, pwal ngeni ekewe fün läng meinisin. Iwe, ewe king a kenirela lükün Jerusalem arap ngeni ewe lemolun Kitron o uweela falanger ngeni Petel. 5 A pwal asüela ekewe souasor mi angang ngeni anümwäl, chokewe ekewe kingen Juta ra filiretä pwe repwe keni apach mi pwokus lon ekewe lenien fel won ekewe leni tekia, lon ekewe telinimwen Juta, pwal pwelin ünükün Jerusalem. Ewe king a asüela chokewe meinisin mi keni apach mi pwokus ngeni ewe anü Paal, ngeni akkar me maram, ngeni ekewe muchiechien fü me ekewe fün läng meinisin. 6 Iwe, a uwawu uluulun ewe anüfefin Asera seni imwen ewe Samol mi Lapalap o uwala lükün Jerusalem lon ewe lemolun Kitron. Ikenan a kenala, a üsi molian tori a wiliti falang o moneela won lenien peiasen ekewe aramas. ✡2.King 21.3; 2.Kron 33.3 7 Ewe king a pwal atai ekewe imw mi nom ren imwen ewe Samol mi Lapalap, imwen ekewe mwän mi fangala inisir fän iten lisowu fän iten ekewe anü. Ikenan ekewe fefin ra pwal türüni mangaku fän iten ewe anüfefin Asera. 8 Iwe, ewe king a titi ekewe souasor meinisin seni ekewe telinimwen Juta o atai pinin ekewe lenien fel won ekewe leni tekia seni Kepa tori Persepa, ia ekewe souasor ra keni apach mi pwokus ie. A pwal ataela ekewe rongen asor ngeni anü mi nom arun ewe asamalapen Josua kepinan ewe telinimw pelimöngün ewe asamalapen tolong lon ewe telinimw. 9 Nge ekewe souasorun ekewe lenien fel won ekewe leni tekia resap tongeni föri angangen asor won än ewe Samol mi Lapalap rongen asor lon Jerusalem. Nge ra tongeni mongö pilawa esap wor iis lon usun chök chiechier kewe souasor. 10 Iwe, ewe king Josia a pwal atai pinin Tofet ewe lenien fel ngeni anü mi nom lon ewe lemolun Pen-hinom, pwe esap chüen wor eman epwe tongeni kenala nöün ät ika nöün nengin pwe eu asor ngeni Molok. ✡Jer 7.31; 32.35; Lif 18.21 11 A atowu ekewe oris ekewe kingen Juta ra apiniir fän iten ar fel ngeni akkar, ra piin nom ren ewe lenien tolong ngeni imwen ewe Samol mi Lapalap arun rumwen Natan-melek, eman nöüwis tekia. A pwal kenala ekewe woken ra wawa lon ar fel ngeni akkar. 12 Iwe, ewe king Josia a ataela ekewe rongen asor ekewe kingen Juta ra senätä won ewe rumwen Ahas mi nom asan. A pwal ataela ekewe rongen asor Manasa a senätä lon ekewe ruu leni mi nom mwen imwen ewe Samol mi Lapalap. A atatakisiir o moneela pipir lon ewe lemolun Kitron. ✡2.King 21.5; 2.Kron 33.5 13 Iwe, ewe king Josia a atai pinin ekewe lenien fel won ekewe leni tekia mi nom peliötiuen Jerusalem me peliörün ewe Chukun Olif. Ekei lenien fel Salomon ewe kingen Israel a aüetä fän iten Astarot än chon Siton we anüfefin mi anioput, fän iten Kemos än chon Moap we kot mi anioput, pwal fän iten Molok än chon Amon we kot mi anioput. ✡1.King 11.7 14 Ewe king Josia a atatakisi ekewe ür mi pin o pöküetiu ekewe uluulun ewe anüfefin Asera, a pwal amasoua lenier kewe ren chün aramas.

15 Iwe, ewe king a pwal ataela ewe rongen asor mi nom Petel, ewe lenien fel won ewe leni tekia Jeropoam nöün Nepat we mwän a aüetä, ätewe a emweni chon Israel ngeni tipis. A atatakisi föün ei rongen asor tori a wiliti pipisüsü, a pwal kenala uluulun ewe anüfefin Asera. ✡1.King 12.33 16 Mürin, Josia a nenefeil, nge lupwen a küna ekoch peias mi nom won ewe chuk, a tinala aramas pwe repwe uwato chün ekewe somä seni lon ekewe peias. Iwe, a kenala ekewe chü won ewe rongen asor. Iei usun a atai pinin ewe rongen asor, usun ewe soufos a fen apasa, lupwen a osuni ekewe mettoch fän alon ewe Samol mi Lapalap. ✡1.King 13.2 17 Mürin, ewe king a ais, “Peiasen iö ewe üa küna ewe föün achem won?” Nge ekewe mwänin ewe telinimw Petel ra üreni, “Iei peiasen ewe soufos mi feito seni Juta o osuni ekei mettoch en ka föri ngeni ei rongen asor.” ✡1.King 13.30-32 18 Iwe, ewe king a üra, “Oupwe chök likiti. Esap wor eman epwe amwökütü chün.” Iei mine ra likiti chün, pwal chün ewe soufos seni Samaria. 19 Josia a pwal ataela ekewe lenien fel meinisin won ekewe leni tekia mi nom lon ekewe telinimwen Samaria, ekewe kingen Israel ra aüretä o asonga ewe Samol mi Lapalap rer. A föri ngeniir ükükün meinisin mine a föri me lon Petel. 20 Iwe, a niela me won ekewe rongen asor ekewe souasor meinisin mi angang lon ekewe lenien fel won ekewe leni tekia, a pwal kenala chün aramas wor. Mürin a liwiniti Jerusalem.

21 Iwe, ewe king Josia a allük ngeni ekewe aramas meinisin, “Oupwe föri ewe Pasofer ngeni ewe Samol mi Lapalap ämi we Kot, usun a mak lon ei puken pwon.” 22 Esap wor eu Pasofer mi wewe ngeni ei seni ewe fansoun ekewe soukapwüng ra nemeni Israel, ika lupwen fansoun ekewe kingen Israel, ika ekewe kingen Juta. 23 Lon engol me waluen ierin mwün ewe king Josia ekewe aramas ra föri ei Pasofer ngeni ewe Samol mi Lapalap me lon Jerusalem.

24 Iwe, ewe king Josia a pwal asüela ekewe watawa me sourong o pöütala ekewe anün leimw, ekewe uluulun anümwäl me ekewe mettoch meinisin mi anioput a küna me lon ewe fanü Juta pwal lon Jerusalem. Ei a föri pwe epwe anüküchara kapasen ewe allük mi mak lon ewe puk, ewe souasor Hilkia a küna me lon imwen ewe Samol mi Lapalap. 25 Esap wor eman king mi manau me mwen Josia ika me mürin, a wewe ngeni lon an angang ngeni ewe Samol mi Lapalap ren unusen lelukan, ren unusen ngünün pwal ren unusen an pöchökül, pun a aleasochisi än Moses kewe allük meinisin.

26 Nge ewe Samol mi Lapalap esap ükütiu seni an lingeringer mi fokun watte, pun a chüen song ngeni chon Juta, pokiten ekewe föför meinisin Manasa a föri. 27 Iwe, ewe Samol mi Lapalap a üra, “Üpwe atowu chon Juta seni fän mesei, usun üa atowu chon Israel. Üpwe pöütala ei telinimw Jerusalem üa filätä, pwal ewe imwenfel üa apasa usun pwe aramas repwe fel ngeniei ie.”

28 Nge lusun pworausen än ewe king Josia föför meinisin a mak lon puken uruwon ekewe kingen Juta. 29 Lupwen fansoun än Josia nemenem, Farao Neko ewe kingen Isip a feila ngeni ewe chanpupu Oifrat, pwe epwe alisi ewe kingen Asiria. Iwe, ewe king Josia a feila pwe epwe maun ngeni. Nge lupwen ra maunfengen, Farao Neko a niela Josia me lon Mekito. 30 Iwe, nöün chon angang ra uwala inisin won efoch woken seni Mekito tori Jerusalem o peiaseni lon püsin peiasan. Iwe, aramasen ewe fanü ra filätä Joahas nöün Josia we mwän, ra epiti o seikätä, pwe epwe siwili saman we lon wisan wisen king.

31 Iwe, Joahas a ierini rüe me ülüngat, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram. Iten inan Hamutal nöün Jeremaia fefin seni Lipna. 32 Joahas a föri mine a ngau me fän mesen ewe Samol mi Lapalap, usun chök mine an kewe lewo ra föri. 33 Iwe, Farao Neko a fötekini Joahas me lon Ripla lon ewe fanü Hamat, pwe esap chüen tongeni nemeni Juta. A pwal angei takises seni chon Juta ükükün fisu ngeröü limepükü paun silifer me fik me limu paun kolt. 34 Farao Neko a seikätä Eliakim nöün Josia we mwän, pwe epwe siwili saman we lon wisan wisen king. Iwe, a siwili itan ngeni Jehoiakim. Nge Farao Neko a uwala Joahas Isip. Iwe Joahas a mäla ikenan. ✡Jer 22.11-12 35 Iwe, Jehoiakim a ngeni Farao ewe silifer me ewe kolt won ükükün an mochen. A angei takisesin ewe fanü o angei silifer me kolt seni iteiten eman me eman chon ewe fanü won aükükün an tufich, pwe epwe wor mine epwe ngeni Farao Neko.

36 Iwe, Jehoiakim a ierini rüe me limu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Iten inan Sepita nöün Petaia fefin seni Ruma. ✡Jer 22.18-19; 26.1-6; 35.1-19 37 Nge Jehoiakim a föri mine a ngau me fän mesen ewe Samol mi Lapalap, usun chök mine an kewe lewo ra föri.