1 Iwe, lon ewe engolun ierin mwün Setekia ewe kingen Juta, iei engol me waluen ierin mwün Nepukatnesar, ewe Samol mi Lapalap a kapas ngeni Jeremaia. ✡2.King 25.1-7 2 Lon ewe fansoun nöün ewe kingen Papilon mwichen sounfiu a pwelifeili Jerusalem fän pisekin maun. Nge ewe soufos Jeremaia a kalapusolong lon ewe lenien chon mas mi nom lon imwen ewe kingen Juta. 3 Pun Setekia ewe kingen Juta a kalapusei Jeremaia o atipisi pokiten an osuni o üra pwe iei alon ewe Samol mi Lapalap, “Üpwe atolonga ei telinimw lepöün ewe kingen Papilon pwe epwe liapeni. 4 Nge Setekia esap tongeni sü seni ekewe chon Papilon. Iwe, epwe fokun tolong lepöün ewe kingen Papilon, epwe küna ren mesan o püsin kapas newenewen ngeni. 5 Iwe, Nepukatnesar epwe uweela Setekia Papilon. Epwe nonom ikenan tori ngang üpwe ämwa. Inamwo ika a maun ngeni ekewe chon Papilon, nge esap win.”

6 Iwe, Jeremaia a apasa, “Ewe Samol mi Lapalap a üreniei, 7 ‘Hanamel nöün Salum we mwän pwin semom epwe feito reöm o ürenuk pwe kopwe möni fanüan mi nom Anatot, pun a wor om pwüüng pwe kopwe möni pokiten en märärin.’ 8 Mürin, Hanamel pwii we a feito rei lon ewe lenien chon mas, usun mine ewe Samol mi Lapalap a fen kapas ngeniei won. Iwe, a üreniei, ‘Kopwe möni fanüei we mi nom Anatot lon ewe fanü Peniamin pwe kopwe fanüeni, pun a wor om pwüüng won.’ Mürin üa silei pwe iei wesewesen alon ewe Samol mi Lapalap ngeniei.

9 Iwe, üa möni ewe fanü lon Anatot seni Hanamel pwii we o aükü ngeni ewe moni ükükün engol me füföü föün silifer. 10 Üa saini ewe toropwen atipeeu, üa appachala o impwangei, üa kütta chon pwärätä o aükü ngeni ewe moni won kilo. 11 Mürin, üa angei ekewe ruachö toropwen atipeeuin kamö, ewe mi appach o impwang a makelong lon pwüngün me lapalapen ai kamö, pwal ewe echö mi suk, 12 o ngeni Paruk nöün Neria we mwän, nge Neria nöün Maseia. Üa ngeni me fän mesen Hanamel pwii we, fän mesen ekewe chon pwärätä mi saini ewe toropwen atipeeuin kamö, pwal fän mesen ekewe re Juta meinisin mi mot lon ewe lenien chon mas. 13 Üa üreni Paruk me fän meser meinisin, 14 ‘Ewe Samol mi Unusen Manaman ewe Koten Israel a allük pwe üpwe angei ekewe toropwen atipeeuin kamö, ewe mi appach o impwang me ewe mi suk, o atolongeer lon eu pör mi för seni pwül, pwe repwe tongeni nonom fansoun langatam. 15 Pun ewe Samol mi Unusen Manaman ewe Koten Israel a apasa pwe aramas repwe kamösefäl imw me fanü me tanipin wain lon ei fanü.’

16 Mürin ai ngeni Paruk nöün Neria we mwän ewe toropwen atipeeuin kamö, üa iotek ngeni ewe Samol mi Lapalap o üra, 17 ‘Ai Kot Samol mi Lapalap! En ewe mi föri läng me fanüfan ren om manaman mi watte pwal ren poum mi pöchökül. Esap wor och mine a weires ngonuk. 18 Ka eäni om tong ellet ngeni ngeröü, nge ka liwini än samasam tipis won nöür kana me mwirir. En ewe Kot mi tekia o manaman, itom ewe Samol mi Unusen Manaman. 19 Om öüröür a tekia, om föför ra manaman. Ka küna meinisin mine aramas ra föri, ka liwini ngeni eman me eman ükükün an föför. 20 Me lom ka föri asisil me manaman me lon ewe fanü Isip. Nge tori ikenai ka chüen föriir me lon Israel pwal me lein chon ekewe mwü meinisin. Iei mine ikenai itom a iteföüla ekis meinisin. 21 Ka emwenawu noum aramasen Israel seni Isip fän asisil me manaman, fän poum mi pöchökül o aköüpöü mi fokun eniuokusu chon oputer. 22 Ka ngeniir ei fanü ka fen pwon fän akapel, pwe kopwe ngeni ar kewe lewo, eu fanü mi pwülüöch o fanüeres. 23 Nge lupwen ra tolong lon ei fanü o fanüeni, resap aleasochis ngonuk ika föri pwüngün om allük. Resap fokun föri och usun mine ka allük ngeniir pwe repwe föri. Iei mine ka awarato wor ekei feiengau meinisin. 24 Ekewe chon Papilon ra senätä ewe ororen maun pwelin ünükün ewe telinimw. Iwe, ra maun ngeni pwe repwe liapeni. Pokiten ewe maun, ewe lengita me ewe mätter, ewe telinimw epwe oolong lepöür. Ka püsin küna pwe a fisitä mine ka kapas usun. 25 Nge en ai Kot, Samol mi Lapalap, ka üreniei pwe üpwe möni eu fanü ren moni fän mesen chon pwärätä, inamwo ika ewe telinimw a kan ngeni an epwe oolong lepöün ekewe chon Papilon.’ ”

26 Mürin, ewe Samol mi Lapalap a üreni Jeremaia, 27 “Nengeni, ngang ewe Samol mi Lapalap än ekewe mönümanau meinisin Kot. Esap fokun wor och mine a weires ngeniei. 28 Iei mine ngang ewe Samol mi Lapalap üa apasa: Üpwe atolonga ei telinimw lepöün Nepukatnesar ewe kingen Papilon me nöün sounfiu pwe repwe liapeni. ✡2.King 25.1-11; 2.Kron 36.17-21 29 Ekewe chon Papilon mi maun ngeni ei telinimw repwe tolong lon o kenala. Repwe kenifengeni me ekewe imw chon Juta ra keni apach mi pwokus wor ngeni ewe anü Paal, ia ra pwal ninätiu ie asoren ün ngeni pwal ekoch kot pwe repwe asongaei. 30 Pun ekewe chon Israel me chon Juta resap föri och, nge ra chök föri mine a ngau me fän mesei o asongaei ren angangen pöür, seni ewe fansoun a popuetä mwür. 31 Chon ei telinimw ra äpwächa ai song me lingeringer seni ewe fansoun ei telinimw a kaütä tori ikenai. Iei mine üpwe ataela ei telinimw 32 pokiten ekewe föföringau meinisin chon Israel me chon Juta ra föri pwe repwe asongaei, ir me ar kewe king, nöür kewe nöüwis, nöür kewe souasor me soufos, ekewe re Juta me ekewe chon Jerusalem. 33 Ra kulu sökürür ngeniei, nge resap kul ngeniei. Inamwo ika üa ököüröüreer, nge resap mochen aüseling ngeniei. 34 Ra fen anomu ar kewe uluulun anümwäl mi anioput lon ewe imwenfel a föü itei won, pwe repwe alimengaua. ✡2.King 23.10; Jer 7.30-31; 19.1-6 35 Ra senätä rongen asor fän iten ewe anü Paal lon ewe lemolun Hinom, pwe repwe eäni asor nöür ät me nengin ngeni ewe anü Molok. Üsap allük ngeniir, esap pwal tolong lon ai ekiek, pwe repwe föri ei sokun föför mi anioput o emweni chon Juta ngeni tipis.” ✡2.King 23.10; Jer 7.31; Lif 18.21

36 Ewe Samol mi Lapalap, ewe Koten Israel a üreni Jeremaia, “Ekewe aramas ra apasa pwe ei telinimw epwe tolong lepöün ewe kingen Papilon ren maun, ren lengita me mätter. Nge iei kopwe rongorong mine ngang üa apasa: 37 Üpwe achufengeni ekewe aramas seni ekewe fanü meinisin ia üa asürela ie fän ai song me lingeringer watte. Üpwe aliwinireto ngeni ei leni o föri pwe repwe nom fän kinamwe. 38 Iwe, ir repwe nei aramas, nge ngang üpwe ar Kot. 39 Üpwe ngeniir eu chök letip me eu chök ekiek, pwe repwe meninitiei fansoun meinisin fän iten püsin feiöchür me feiöchün nöür me mwirir. 40 Üpwe eäni ngeniir eu pwon epwe nom tori feilfeilachök, pwe üsap ükütiu le afeiöchüür. Iwe, üpwe atolonga lon leluker ar repwe niuokusitiei, pwe resap chüen kul seniei. 41 Üpwe pwapwaiti ai üpwe afeiöchüür, üpwe pwal fotukiretiu lon ei fanü fän allükülük ren unusen letipei me lelukei. 42 Usun üa awarato ei feiengau watte won ekei aramas, iei usun üpwe pwal awarato wor ekei feiöch meinisin üa pwon ngeniir. 43 Aramas repwe möni tanipin ei fanü, ei fanü ra kapas usun pwe eu fanüpö ia esap wor aramas ika man ra nom ie, pwal eu fanü mi oolong lepöün chon Papilon. 44 Aramas repwe möni ekewe tanipi ren moni, repwe saini ekewe toropwen atipeeuin kamö, repwe impwangei o appacha me fän mesen chon pwärätä. Ei epwe fis lon ewe fanü Peniamin, lon ekewe sop ünükün Jerusalem, lon ekewe telinimwen Juta, lon telinimwen ewe fanü mi chukuchukutä, pwal lon telinimwen ewe fanü mi chukutekison me ewe fanü Nekep. Üpwe aliwinisefäli ekewe aramas ngeni fanüer. Ngang ewe Samol mi Lapalap üa kapas.”