26
Aramas ra kütta manauen Jeremaia
26.1-24
1 Iwe, lepoputän mwün Joiakim ewe kingen Juta nöün Josia we mwän, ewe Samol mi Lapalap a üreniei, ✡2.King 23.36–24.6; 2.Kron 36.5-7 2 “Kopwe ütä lon ewe leni lükün ewe imwenfel o kapas ngeni chon ekewe telinimwen Juta meinisin mi feito pwe repwe fel lon ewe imwenfel. Kopwe üreniir meinisin mine üa allük ngonuk, nge kosap likiti eu kapas. 3 Eli repwe rongorong o kul seni ar kewe lapalap mi ngau, pwe ngang üpwe siwili ai ekiekin afeiengaueer üa ekiekin föri ngeniir pokiten ar kewe föför mi ngau. 4 Iwe, kopwe üreniir, pwe iei aloi ngang ewe Samol mi Lapalap, ‘Are ousap mochen aüselingaei o aleasochis ngeni ai kewe allük üa ngenikemi, 5 are ousap afäli alon nei kewe chon angang ekewe soufos, chokewe üa soun tinirela remi, nge ämi ousap aüselingeer, 6 mürin üpwe föri pwe ei imwenfel epwe wewe ngeni ewe lon Silo, nge chon ekewe mwü meinisin won fanüfan repwe eäni ottek iten ei telinimw.’ ” ✡Jos 18.1; Kölf 78.60; Jer 7.12-14
7 Iwe, ekewe souasor me ekewe soufos, pwal ekewe aramas meinisin ra rongorong ekei kapas Jeremaia a apasa me lon imwen ewe Samol mi Lapalap. 8 Nge lupwen Jeremaia a wes le apasatä meinisin mine ewe Samol mi Lapalap a allük ngeni pwe epwe üreni ekewe aramas, mürin ekewe souasor me ekewe soufos pwal ekewe aramas meinisin ra turufi o apasa, “Kopwe fokun mäla. 9 Pwota ka osuni fän iten ewe Samol mi Lapalap o üra pwe ei imwenfel epwe wewe ngeni ewe lon Silo, nge ei telinimw epwe tala pwe esap so?” Iwe, ekewe aramas meinisin ra pweliela Jeremaia me lon imwen ewe Samol mi Lapalap.
10 Nge lupwen ekewe nöüwisen Juta ra rongorong ekei pworaus, ra feila seni imwen ewe king o feila ren imwen ewe Samol mi Lapalap. Iwe, ra mot won ar lenien mot lon ewe Asamalap mi Fö me lon imwen ewe Samol mi Lapalap. 11 Mürin, ekewe souasor me ekewe soufos ra üreni ekewe nöüwis me ekewe aramas meinisin, “A pwüng ngeni ei mwän an epwe mäla, pun a osuni talan ei telinimw, usun oua fen püsin rongorong.”
12 Mürin, Jeremaia a kapas ngeni ekewe nöüwis me ekewe aramas meinisin, “Ewe Samol mi Lapalap a tinieito pwe üpwe osuni talan ei imwenfel me ei telinimw, usun oua fen rongorong. 13 Iei mine oupwe siwili ämi kewe lapalap me ämi kewe föför o aleasochis ngeni alon ewe Samol mi Lapalap ämi we Kot, mürin ewe Samol mi Lapalap epwe siwili an ekiekin afeiengauakemi usun a fen apasa. 14 Nge ngang üa nom fän nemeniemi. Oupwe föri ngeniei mine a mürina o pwüng me remi. 15 Nge oupwe chök silei pwe ika oua nieila, oupwe atoto womi pwal won ei telinimw me aramasen lon liwinin chan eman esap wor an tipis. Pun a let pwe ewe Samol mi Lapalap a tinieito remi pwe üpwe asile ngenikemi ekei kapas meinisin.”
16 Mürin, ekewe nöüwis me ekewe aramas meinisin ra üreni ekewe souasor me ekewe soufos, “Ese pwüng ngeni ei mwän an epwe mäla, pun a kapas ngenikem fän alon ewe Samol mi Lapalap ach we Kot.” 17 Iwe, ekoch me lein ekewe souakomwen ewe fanü ra ütä o kapas ngeni ekewe aramas meinisin mi mwichefengen, 18 “Mika seni Moroset a osuni lon fansoun Hiskia ewe kingen Juta o üreni ekewe aramasen Juta meinisin, ‘Iei alon ewe Samol mi Unusen Manaman:
Sion epwe tutä usun eu mälämäl.
Jerusalem epwe wiliti eu ioien pipi,
nge ewe chuk ia ewe imwenfel a nom ie epwe wiliti eu wöllap.’ ✡Mik 3.12 19 Ifa usun, ewe king Hiskia me chon Juta meinisin ra niela Mik? Ifa usun, Hiskia esap niuokusiti ewe Samol mi Lapalap o kütta an ümöümöch me ren? Ifa usun, ewe Samol mi Lapalap esap siwili an ekiekin afeiengaueer a fen kapas usun? Nge iei kich sipwele awarato feiengau watte woch.” 20 (Iwe, mi pwal wor eman mwän mi osuni fän iten ewe Samol mi Lapalap, itan Uria nöün Semaia we mwän seni Kiriat-jearim. Ätei a osuni usun feiengauen ei telinimw me ei fanü lon ititin chök ekewe kapas Jeremaia a eäni. 21 Nge lupwen ewe king Jehoiakim me nöün sounfiu pwal ekewe nöüwis meinisin ra rongorong an kewe kapas, ewe king a kütta Uria pwe epwe niela. Nge lupwen Uria a rong usun, a niuokus o süla Isip. 22 Mürin ewe king Jehoiakim a tinala Isip Elnatan nöün Akpor we mwän me pwal ekoch mwän, pwe repwe turufi. 23 Iwe, ra turufi Uria me lon Isip o emwenala ren ewe king Jehoiakim. Ätei a niela Uria o moneela somän lon lenien peiasen ekewe aramas kis.)
24 Nge Ahikam nöün Safan we mwän a tümwünü Jeremaia seni ekewe aramas, pwe resap niela.