1 Iwe, lepoputän mwün Setekia ewe kingen Juta nöün Josia we mwän, ewe Samol mi Lapalap a kapas ngeni Jeremaia, ✡2.King 24.18-20; 2.Kron 36.11-13 2 “Kopwe föri efoch om waas fiti selin o ämwäralong won üom. 3 Mürin kopwe tinala pworaus ngeni ewe kingen Etom, ewe kingen Moap, ewe kingen Amon, ewe kingen Tirus me ewe kingen Siton ren nöür kewe chon künö mi feito Jerusalem ren Setekia ewe kingen Juta. 4 Kopwe ngeniir ei pworaus fän iten ar kewe king, ‘Iei alon ewe Samol mi Unusen Manaman ewe Koten Israel ngeniir: 5 Ngang ewe mi föri fanüfan pwal aramas me man mi nom won ren ai manaman me ai pöchökül. Iwe, ngang üa filätä iö kana üpwe ngeni ekei mettoch. 6 Iei üa uwalong fän nemenien nei chon angang Nepukatnesar ewe kingen Papilon ekei fanü meinisin. Üa föri pwe ekewe manmwacho mwo nge repwe pwal angang ngeni. 7 Chon ekewe mwü meinisin repwe angang ngeni, pwal ngeni nöün me nöün nöün, tori epwe war püsin feiengauen mwün. Mürin ir repwe angang ngeni chomong mwü me king mi lap.

8 Nge are eu mwichen aramas ika chon eu mwü resap mochen angang ngeni Nepukatnesar ewe kingen Papilon o ämwäralong üwer fän ewe waas än ewe kingen Papilon, üpwe apwüngü chon ei mwü ren maun, ren lengita me mätter tori üpwe aroserela ren pöün. Ngang ewe Samol mi Lapalap üa kapas. 9 Iei mine ousap aüselinga alon nöümi kewe soufos, nöümi kewe soupwe, nöümi kewe soutan, nöümi kewe souawarawar ika nöümi kewe sourong mi ürenikemi pwe ousap wisen angang ngeni ewe kingen Papilon. 10 Pun mine ra osuni ngenikemi a chofana, epwe aselipato ämi oupwe toau seni fanüemi. Ngang üpwe asükemiila pwe oupwe rosola. 11 Nge are chon eu mwü repwe ämwäralong üwer fän ewe waas än ewe kingen Papilon o angang ngeni, üpwe mwüt ngeniir pwe repwe nom won püsin fanüer, repwe angang won o imweimw ie. Ngang ewe Samol mi Lapalap üa kapas.’ ”

12 Iwe, üa pwal kapas ngeni Setekia ewe kingen Juta lon ei chök ititin, “Oupwe ämwäralong üemi fän ewe waas än ewe kingen Papilon. Oupwe angang ngeni me nöün aramas pwe oupwe manau. 13 Pwota ämi me noum aramas oupwe mäla ren maun, ren lengita me mätter, usun ewe Samol mi Lapalap a fen apasa epwe fis ngeni chon ekewe mwü meinisin resap mochen angang ngeni ewe kingen Papilon? 14 Ousap aüselinga än ekewe soufos kapas, lupwen ra ürenikemi pwe ousap angang ngeni ewe kingen Papilon, pun mine ra osuni ngenikemi a chofana. 15 Pun ewe Samol mi Lapalap a apasa pwe esap tiniir, nge ir ra chök osuni mine a chofana fän itan. Iei popun epwe asükemiila, nge ämi oupwe mäla, ämi me ekewe soufos mi osuni ngenikemi.” 16 Mürin üa kapas ngeni ekewe souasor me ekewe aramas meinisin, pwe iei alon ewe Samol mi Lapalap, “Ousap aüseling ngeni än nöümi kewe soufos kapasen osuni ngenikemi, pwe pisekin imwen ewe Samol mi Lapalap repwe müttir liwinto seni Papilon. Pun ra chofana ngenikemi. 17 Ousap fokun aüseling ngeniir. Oupwe angang ngeni ewe kingen Papilon pwe oupwe manau. Pwota ei telinimw epwe wiliti eu leni mi ta? 18 Ika wesewesen ir soufos, nge ika pwüngün pwe ai kapas a nom rer, repwe iotekin tüngor ngeniei ngang ewe Samol mi Unusen Manaman, pwe ekewe pisek mi chüen nom lon ewe imwenfel, lon imwen ewe kingen Juta pwal lon Jerusalem resap oola Papilon.” 19 Iwe, Nepukatnesar ewe kingen Papilon a likitala ekewe ür, ewe sepien koluk mi fokun watte, ekewe kürüma me pwal ekoch pisekin ewe imwenfel, 20 lupwen a uwala Papilon Jehoiachin ewe kingen Juta nöün Jehoiakim we mwän pwal ekewe aramas tekia seni Juta me Jerusalem. 21 Iei alon ewe Samol mi Unusen Manaman, ewe Koten Israel, fän äsengesin ekewe pisek mi chüen nom lon ewe imwenfel, lon imwen ewe kingen Juta pwal lon Jerusalem, 22 “Ekei pisek repwe oola Papilon o nonom ikenan tori ewe rän üpwe pisefäliir. Mürin ngang üpwe aliwinireto o anomusefäliir lon ei leni. Ngang ewe Samol mi Lapalap üa kapas.”