1 Lon ewe chök ier, lepoputän mwün Setekia ewe kingen Juta, lon alimuen maramen ewe arüanün ierin an nemenem, eman soufos seni Kipeon itan Hanania nöün Asur we mwän a kapas ngeniei me lon imwen ewe Samol mi Lapalap me fän mesen ekewe souasor me ekewe aramas meinisin. A apasa, ✡2.King 24.18-20; 2.Kron 36.11-13 2 “Iei alon ewe Samol mi Unusen Manaman, ewe Koten Israel: Üa kupi ewe waas än ewe kingen Papilon. 3 Mürin ükükün ruu ier üpwe aliwinato lon ei leni pisekin imwen ewe Samol mi Lapalap meinisin Nepukatnesar ewe kingen Papilon a angei o uweerela Papilon. 4 Üpwe pwal aliwinato ngeni ei leni Jehoiachin ewe kingen Juta nöün Jehoiakim we mwän me ekewe chon oola meinisin seni Juta mi feila Papilon, pun üpwe kupi ewe waas än ewe kingen Papilon. Ngang ewe Samol mi Lapalap üa kapas.”

5 Mürin üa kapas ngeni ewe soufos Hanania me fän mesen ekewe souasor me ekewe aramas meinisin mi nom lon imwen ewe Samol mi Lapalap. 6 Iwe, üa üra, “Amen. Amwo ewe Samol mi Lapalap epwe föri iei usun. Amwo ewe Samol mi Lapalap epwe apwönüetä ekewe kapas ka osuni o aliwinato seni Papilon pisekin imwen ewe Samol mi Lapalap me ekewe chon oola meinisin. 7 Nge kopwe rongorong ei kapas üpwe ürenuk me ekei aramas meinisin. 8 Ekewe soufos mi akom mwom me mwei ra osuni seni me lomlom usun maun, lengita me mätter fän äsengesin chomong fanü me mwü mi lap. 9 Nge eman soufos mi osuni usun kinamwe a chök sil pwe i eman soufos ewe Samol mi Lapalap a wesewesen tinato, lupwen an kapasen osuni a pwönüetä.”

10 Mürin ewe soufos Hanania a angei ewe waas seni won üei o kupi. 11 Iwe, Hanania a apasa me fän mesen ekewe aramas meinisin, “Iei alon ewe Samol mi Lapalap: Iei usun üpwe angei ewe waas Nepukatnesar ewe kingen Papilon a ämwäralong won üen chon ekewe mwü meinisin o kupi mürin ruu ier.” Mürin üa feila.

12 Iwe, ekoch fansoun mürin än ewe soufos Hanania angei ewe waas seni won üei o kupi, ewe Samol mi Lapalap a üreniei, 13 “Kopwe feila o üreni Hanania pwe iei alon ewe Samol mi Lapalap, ‘En ka kupi ewe waas seni mwüch, nge ngang üpwe akasiwili ngeni efoch waas seni mächä.’ 14 Pun iei alon ewe Samol mi Unusen Manaman, ewe Koten Israel, ‘Ngang üpwe ämwärätä won üen chon ekei mwü meinisin efoch waasen angangochou seni mächä, pwe repwe angang ngeni Nepukatnesar ewe kingen Papilon. Üpwe pwal föri pwe ekewe manmwacho mwo nge repwe angang ngeni.’ ” 15 Mürin üa üreni ewe soufos Hanania, “Kopwe rongorong Hanania, ewe Samol mi Lapalap esap tinuk, nge en ka föri pwe ekei aramas ra lükü mine a chofana. 16 Iei mine ewe Samol mi Lapalap a apasa pwe epwe angeek seni won fanüfan. Lon ei chök ier kopwe mäla, pun ka üreni ekewe aramas pwe repwe ü ngeni ewe Samol mi Lapalap.” 17 Iwe, lon ewe chök ier lon ewe afisuen maram, ewe soufos Hanania a mäla.