4
1 Oupwe rongorong ekei kapas, ämi fin Samaria mi kitinupula usun ekewe kow lon Pasan mi amongööch. Oua ariaföüü ekewe chon wöüngau o purätiu ekewe chon mwelele, oua pwal üreni pwülüemi kewe pwe repwe uwato ünümemi sakau. 2 Kot ewe Samol mi Lapalap mi pin a eäni eu akapel o üra, “Epwe fokun war ewe fansoun, lupwen repwe efikemiila ren ö, repwe efikemiila meinisin usun ik. 3 Repwe atokemiiwu me lon pwangen tittin ewe telinimw eman me eman seni awenewenen en me lenian o aturukemiiwu ngeni ewe chuk Hermon.” Iei usun mine ewe Samol mi Lapalap a apasa.
Chon Israel resap kaiö seni än Kot apwüng
4.4-13
4 Iei alon Kot ewe Samol mi Lapalap, “Ämi chon Israel, oupwe feila Petel o föri tipis, oupwe feila Kilkal o achomongala ämi tipis. Oupwe uwato ämi kewe asor iteiten lesosor pwal ämi kewe leengol iteiten ülüngat rän. 5 Oupwe keni pilawa mi wor iis lon pwe ämi kewe asoren kilisou o sikesik usun ämi kewe asor oua uwato seni püsin letipemi. Oupwe aingaing wor, pun iei usun oua efich.”
6 Iei alon ewe Samol mi Lapalap, “Ngang ewe mi awarato lengita lon ämi kewe telinimw meinisin, pwe esap wor enemi lon leniemi kewe. Iei mwo nge ämi ousap liwinto rei. 7 Üa pwal amwöchü senikemi üt lon fansoun epwe fokun wor üt fän iten fotämi irä. Üa apüngätiu üt won eu telinimw, nge üsap apüngätiu won pwal eu. Üt a püngütiu won eu mälämäl, nge pwal ewe eu mälämäl esap püng üt won. 8 Iei mine aramasen ekoch telinimw ra feila ngeni pwal eu telinimw fän ar moror pwe repwe ün koluk, nge esap naf ngeniir. Iei mwo nge ämi ousap liwinto rei.
9 Üa awarato moi me mesenipik won tanipimi me ämi tanipin wain pwe repwe atarala. Ekewe lifichimas ra enala ämi kewe irä fiik me irä olif. Iei mwo nge ämi ousap liwinto rei.
10 Üa tinato mätter leimi usun üa föri me lon Isip. Üa niela nöümi kewe alüal lon maun o angeala nöümi kewe oris. Üa aura pwötümi ren pwomachen ekewe somä me lon leniemi. Iei mwo nge ämi ousap liwinto rei. 11 Üa niela ekoch me leimi usun üa niela ekewe chon Sotom me Komora. Nge chokewe mi chüen manau me leimi ra usun esop mwüch a katowu seni ekkei. Iei mwo nge ämi ousap liwinto rei.” Iei usun mine ewe Samol mi Lapalap a apasa. ✡Ken 19.24
12 “Iei mine üpwe apwüngükemi, ämi chon Israel. Pokiten üpwe föri ei, ämi chon Israel oupwe amolakemiitä pwe oupwe churiei, ngang ämi we Kot.”
13 Kot ewe mi alapalapa ekewe chuk
o föri asepwäl.
A pwäri an ekiek ngeni aramas.
A föri mallen rän me rochopwak
o nemeni unusen fanüfan,
itan Kot ewe Samol mi Unusen Manaman.