3
Wisen ewe soufos
3.1-8
1 Ämi chon Israel, oupwe rongorong ekei kapas ewe Samol mi Lapalap a apasa usumi, ämi chon ewe mwü meinisin i a emwenawu seni ewe fanü Isip. 2 “Ämi chök üa filikemiitä seni lein chon ekewe mwü meinisin won fanüfan. Nge pokiten ämi kewe tipis ra kon fokun ngau, iei mine üpwe fokun apwüngükemi.”
3 Ifa usun, ruoman aramas ra tongeni mwinemwin ika resap mwo tipeeufengen me mwan? 4 Ifa usun, eman laion epwe wörüwör me lein wöllap are esap wor liapan? Ifa usun, eman nienifön laion epwe ngüngü me lon pwangan are esap wor mine a liapeni? 5 Ifa usun, eman machang epwe tup lon eu likatup are esap wor paa lon? Ifa usun, eu likapich epwe pich are esap wor och a tup lon? 6 Ifa usun, aramas resap niuokus lupwen ra rongorong tikin rappwan maun me lon eu telinimw? Ifa usun, epwe fis feiengau lon eu telinimw, are ewe Samol mi Lapalap esap awarato? 7 Ellet, Kot ewe Samol mi Lapalap esap föri och ika esap pwäri mwo mine a ekiekietä ngeni nöün chon angang ekewe soufos. 8 Are eman laion a wörüwör, iö esap niuokus? Are Kot ewe Samol mi Lapalap a kapas, iö esap asilefeili an kapas?”
Samaria epwe feiengau
3.9–4.3
9 Oupwe asile ngeni chokewe mi nom lon ekewe imwen king me lon Astot pwal me lon Isip o üra, “Oupwe amwichafengenikemi won ekewe chukun Samaria pwe oupwe küna ewe fitikoko mi watte a fis lon, pwal ar ariaföüü aramas.” 10 Iei alon ewe Samol mi Lapalap, “Ekei aramas resap silei ar repwe föri mine a pwüng, ir chokewe mi amasoua imwer kewe imwen king ren pisek ra angei fän mwänewüs me solä. 11 Iei mine chon oputeer repwe tolong lon fanüer, repwe ataetiu ar kewe imwen maun mi pöchökül o soläni pisekir mi nom lon imwer kewe imwen king.”
12 Iei alon ewe Samol mi Lapalap, “Usun eman chon mas a angei seni awen eman laion ruofoch pechen eman sip ika eu seling chök, iei usun ekoch chök chon Israel mi nom lon Samaria repwe küna manau me lein chokewe mi mot won ar kewe lenien mot mi pwetete lon ei fansoun.”
13 Iei alon Kot ewe Samol mi Lapalap, ewe Samol mi Unusen Manaman, “Oupwe aüselinga aloi o fönöü ekewe mwirimwirin Jakop. 14 Lon ena fansoun, lupwen üpwe apwüngü chon Israel pokiten ar tipis, üpwe atai ekewe rongen asor lon Petel. Iwe, mächän ekewe rongen asor repwe kup o turutiu lepwül. ✡2.King 23.15 15 Üpwe atai imwer kewe imweimwen lon fansoun patapat me imwer kewe imweimwen lon fansoun pwichikar. Ekewe imw mi fout ngeni ngiin äläfant repwe tatiu, nge ekewe imw watte repwe tala.” Iei usun mine ewe Samol mi Lapalap a apasa.